సంవాద అథవా ఆఖ్యాన సూక్త ఋగ్వేద సంహితా మండల 10

హ॒యే జాయే॒ మన॑సా॒ తిష్ఠ॑ ఘోరే॒ వచాం॑సి మి॒శ్రా కృ॑ణవావహై॒ ను .

న నౌ॒ మంత్రా॒ అను॑దితాస ఏ॒తే మయ॑స్కర॒న్పర॑తరే చ॒నాహ॑న్ .. 10.095.01

కిమే॒తా వా॒చా కృ॑ణవా॒ తవా॒హం ప్రాక్ర॑మిషము॒షసా॑మగ్రి॒యేవ॑ .

పురూ॑రవః॒ పున॒రస్తం॒ పరే॑హి దురాప॒నా వాత॑ ఇవా॒హమ॑స్మి .. 10.095.02

ఇషు॒ర్న శ్రి॒య ఇ॑షు॒ధేర॑స॒నా గో॒షాః శ॑త॒సా న రంహిః॑ .

అ॒వీరే॒ క్రతౌ॒ వి ద॑విద్యుత॒న్నోరా॒ న మా॒యుం చి॑తయంత॒ ధున॑యః .. 10.095.03

సా వసు॒ దధ॑తీ॒ శ్వశు॑రాయ॒ వయ॒ ఉషో॒ యది॒ వష్ట్యంతి॑గృహాత్ .

అస్తం॑ ననక్షే॒ యస్మిం॑చా॒కందివా॒ నక్తం॑ శ్నథి॒తా వై॑త॒సేన॑ .. 10.095.04

త్రిః స్మ॒ మాహ్నః॑ శ్నథయో వైత॒సేనో॒త స్మ॒ మేఽవ్య॑త్యై పృణాసి .

పురూ॑ర॒వోఽను॑ తే॒ కేత॑మాయం॒ రాజా॑ మే వీర త॒న్వ1॒॑స్తదా॑సీః .. 10.095.05

యా సు॑జూ॒ర్ణిః శ్రేణిః॑ సు॒మ్నా॑పిర్హ్ర॒దేచ॑క్షు॒ర్న గ్రం॒థినీ॑ చర॒ణ్యుః .

తా అం॒జయో॑ఽరు॒ణయో॒ న స॑స్రుః శ్రి॒యే గావో॒ న ధే॒నవో॑ఽనవంత .. 10.095.06

సమ॑స్మిం॒జాయ॑మాన ఆసత॒ గ్నా ఉ॒తేమ॑వర్ధన్న॒ద్య1॒ః॑ స్వగూ॑ర్తాః .

మ॒హే యత్త్వా॑ పురూరవో॒ రణా॒యావ॑ర్ధయందస్యు॒హత్యా॑య దే॒వాః .. 10.095.07

సచా॒ యదా॑సు॒ జహ॑తీ॒ష్వత్క॒మమా॑నుషీషు॒ మాను॑షో ని॒షేవే॑ .

అప॑ స్మ॒ మత్త॒రసం॑తీ॒ న భు॒జ్యుస్తా అ॑త్రసన్రథ॒స్పృశో॒ నాశ్వాః॑ .. 10.095.08

యదా॑సు॒ మర్తో॑ అ॒మృతా॑సు ని॒స్పృక్సం క్షో॒ణీభిః॒ క్రతు॑భి॒ర్న పృం॒క్తే .

తా ఆ॒తయో॒ న త॒న్వః॑ శుంభత॒ స్వా అశ్వా॑సో॒ న క్రీ॒ళయో॒ దంద॑శానాః .. 10.095.09

వి॒ద్యున్న యా పతం॑తీ॒ దవి॑ద్యో॒ద్భరం॑తీ మే॒ అప్యా॒ కామ్యా॑ని .

జని॑ష్టో అ॒పో నర్యః॒ సుజా॑తః॒ ప్రోర్వశీ॑ తిరత దీ॒ర్ఘమాయుః॑ .. 10.095.10

జ॒జ్ఞి॒ష ఇ॒త్థా గో॒పీథ్యా॑య॒ హి ద॒ధాథ॒ తత్పు॑రూరవో మ॒ ఓజః॑ .

అశా॑సం త్వా వి॒దుషీ॒ సస్మి॒న్నహ॒న్న మ॒ ఆశృ॑ణోః॒ కిమ॒భుగ్వ॑దాసి .. 10.095.11

క॒దా సూ॒నుః పి॒తరం॑ జా॒త ఇ॑చ్ఛాచ్చ॒క్రన్నాశ్రు॑ వర్తయద్విజా॒నన్ .

కో దంప॑తీ॒ సమ॑నసా॒ వి యూ॑యో॒దధ॒ యద॒గ్నిః శ్వశు॑రేషు॒ దీద॑యత్ .. 10.095.12

ప్రతి॑ బ్రవాణి వ॒ర్తయ॑తే॒ అశ్రు॑ చ॒క్రన్న క్రం॑దదా॒ధ్యే॑ శి॒వాయై॑ .

ప్ర తత్తే॑ హినవా॒ యత్తే॑ అ॒స్మే పరే॒హ్యస్తం॑ న॒హి మూ॑ర॒ మాపః॑ .. 10.095.13

సు॒దే॒వో అ॒ద్య ప్ర॒పతే॒దనా॑వృత్పరా॒వతం॑ పర॒మాం గంత॒వా ఉ॑ .

అధా॒ శయీ॑త॒ నిరృ॑తేరు॒పస్థేఽధై॑నం॒ వృకా॑ రభ॒సాసో॑ అ॒ద్యుః .. 10.095.14

పురూ॑రవో॒ మా మృ॑థా॒ మా ప్ర ప॑ప్తో॒ మా త్వా॒ వృకా॑సో॒ అశి॑వాస ఉ క్షన్ .

న వై స్త్రైణా॑ని స॒ఖ్యాని॑ సంతి సాలావృ॒కాణాం॒ హృద॑యాన్యే॒తా .. 10.095.15

యద్విరూ॒పాచ॑రం॒ మర్త్యే॒ష్వవ॑సం॒ రాత్రీః॑ శ॒రద॒శ్చత॑స్రః .

ఘృ॒తస్య॑ స్తో॒కం స॒కృదహ్న॑ ఆశ్నాం॒ తాదే॒వేదం తా॑తృపా॒ణా చ॑రామి .. 10.095.16

అం॒త॒రి॒క్ష॒ప్రాం రజ॑సో వి॒మానీ॒ముప॑ శిక్షామ్యు॒ర్వశీం॒ వసి॑ష్ఠః .

ఉప॑ త్వా రా॒తిః సు॑కృ॒తస్య॒ తిష్ఠా॒న్ని వ॑ర్తస్వ॒ హృద॑యం తప్యతే మే .. 10.095.17

ఇతి॑ త్వా దే॒వా ఇ॒మ ఆ॑హురైళ॒ యథే॑మే॒తద్భవ॑సి మృ॒త్యుబం॑ధుః .

ప్ర॒జా తే॑ దే॒వాన్హ॒విషా॑ యజాతి స్వ॒ర్గ ఉ॒ త్వమపి॑ మాదయాసే .. 10.095.18