వేదమంత్రమంజరి - 2

హరిః ఓం

.. ఓం శ్రీ గురుభ్యో నమః హరిః ఓం ..

.. మంగలాచరణం ..

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే .. 1..

అగజానన పద్మార్కం గజాననమహర్నిశం .

అనేకదం తం భక్తానాం ఏకదంతముపాస్మహే .. 2..

వాగర్థావివ సంపృక్తౌ వాగర్థప్రతిపత్తయే .

జగతః పితరౌ వందే పార్వతీపరమేశ్వరౌ .. 3..

గురుర్బ్రహ్మా గురుర్విష్ణుః గురుర్దేవో మహేశ్వరః .

గురుస్సాక్షాత్ పరబ్రహ్మ తస్మై శ్రీ గురవే నమః .. 4..

ఆంగికం భువనం యస్య వాచికం సర్వవాఙ్మయం .

ఆహార్యం చంద్ర తారాది తం నుమః సాత్వికం శివం .. 5..

సర్వమంగలమాంగల్యే శివే సర్వార్థసాధికే .

శరణ్యే త్ర్యంబకే గౌరి నారాయణి నమోఽస్తుతే .. 6..

సరస్వతి నమస్తుభ్యం వరదే కామరూపిణి .

విద్యారంభం కరిష్యామి సిద్ధిర్భవతు మే సదా .. 7..

త్వమేవ మాతా చ పితా త్వమేవ త్వమేవ బంధుశ్చ సఖా త్వమేవ .

త్వమేవ విద్యా ద్రవిణం త్వమేవ త్వమేవ సర్వం మమ దేవ దేవ .. 8..

కాయేన వాచా మనసేంద్రియైర్వా బుధ్యాత్మనా వా ప్రకృతేః స్వభావాత్ .

కరోమి యద్యత్సకలం పరస్మై నారాయణాయేతి సమర్పయామి .. 9..

ఓం అసతో మా సద్గమయ . తమసో మా జ్యోతిర్గమయ . మృత్యోర్మా అమృతం గమయ .. 10..

ఓం భూః ఓం భువః ఓం సువః ఓం మహః ఓం జనః ఓం తపః ఓం సత్యం .

ఓం తత్స॑వి॒తుర్వరే᳚ణ్యం॒ భర్గో॑దే॒వస్య॑ ధీమహి . ధియో॒ యో నః॑ ప్రచో॒దయా᳚త్ ..11..

ఓం గ॒ణానాం᳚ త్వా గ॒ణప॑తిగ్ం హవామహే క॒విం క॑వీ॒నాము॑ప॒మశ్ర॑వస్తమం .

జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభి॑స్సీద॒ సాద॑నం

.. మహాగణపతయే॒ నమః ..

ఓం ప్రణో॑ దే॒వి సర॑స్వతీ॒ వాజే॑భిర్వా॒జినీ॑వతీ . ధీ॒నామ॑వి॒త్స్ర॑యవతు ..

వాగ్దేవ్యై॒ నమః॑ ..

ఓం నమో॒ బ్రహ్మ॑ణే ధా॒రణం॑ మే అ॒స్త్వని॑రాకరణం ధా॒రయి॑తా భూయాసం॒

కర్ణ॑యోశ్శ్రు॒తం మా చ్యో᳚ఢ్వం॒ మమా॒ముష్య॒ ఓం ..

ఓం శాంతిః॒ శాంతిః॒ శాంతిః॑ .

.. పురుషసూక్తం ..

ఓం తచ్ఛం॒ యోరావృ॑ణీమహే . గా॒తుం య॒జ్ఞాయ॑ . గా॒తుం య॒జ్ఞప॑తయే . దైవీః᳚

స్వ॒స్తిర॑స్తు నః . స్వ॒స్తిర్మాను॑షేభ్యః . ఊ॒ర్ధ్వం జి॑గాతు భేష॒జం . శన్నో॑

అస్తు ద్వి॒పదే᳚ . శం చతు॑ష్పదే .. ఓం శాంతిః॒ శాంతిః॒ శాంతిః॑ ..

ఓం స॒హస్ర॑శీర్షా॒ పురు॑షః . స॒హ॒స్రా॒క్షః స॒హస్ర॑పాత్ . స భూమిం॑ వి॒శ్వతో॑

వృ॒త్వా . అత్య॑తిష్ఠద్దశాంగు॒లం . పురు॑ష ఏ॒వేదగ్ం సర్వం᳚ . యద్భూ॒తం యచ్చ॒

భవ్యం᳚ . ఉ॒తామృ॑త॒త్వస్యేశా॑నః . య॒దన్నే॑నాతి॒రోహ॑తి . ఏ॒తావా॑నస్య మహి॒మా .

అతో॒ జ్యాయాగ్॑శ్చ॒ పూరు॑షః .. 1 ..

పాదో᳚ఽస్య॒ విశ్వా॑ భూ॒తాని॑ . త్రి॒పాద॑స్యా॒మృతం॑ ది॒వి . త్రి॒పాదూ॒ర్ధ్వ

ఉదై॒త్పురు॑షః . పాదో᳚ఽస్యే॒హాఽఽభ॑వా॒త్పునః॑ . తతో॒ విష్వ॒ఙ్వ్య॑క్రామత్ .

సా॒శ॒నా॒న॒శ॒నే అ॒భి . తస్మా᳚ద్వి॒రాడ॑జాయత . వి॒రాజో॒ అధి॒ పూరు॑షః .

స జా॒తో అత్య॑రిచ్యత . ప॒శ్చాద్భూమి॒మథో॑ పు॒రః .. 2 ..

యత్పురు॑షేణ హ॒విషా᳚ . దే॒వా య॒జ్ఞమత॑న్వత . వ॒సం॒తో అ॑స్యాసీ॒దాజ్యం᳚ .

గ్రీ॒ష్మ ఇ॒ధ్మశ్శ॒రద్ధ॒విః . స॒ప్తాస్యా॑సన్పరి॒ధయః॑ . త్రిః స॒ప్త స॒మిధః॑

కృ॒తాః . దే॒వా యద్య॒జ్ఞం త॑న్వా॒నాః . అబ॑ధ్న॒న్పురు॑షం ప॒శుం . తం య॒జ్ఞం

బ॒ర్॒హిషి॒ ప్రౌక్షన్॑ . పురు॑షం జా॒తమ॑గ్ర॒తః .. 3 ..

తేన॑ దే॒వా అయ॑జంత . సా॒ధ్యా ఋష॑యశ్చ॒ యే . తస్మా᳚ద్య॒జ్ఞాత్స॑ర్వ॒హుతః॑

. సంభృ॑తం పృషదా॒జ్యం . ప॒శూగ్స్తాగ్శ్చ॑క్రే వాయ॒వ్యాన్॑ .

ఆ॒ర॒ణ్యాన్గ్రా॒మ్యాశ్చ॒ యే . తస్మా᳚ద్య॒జ్ఞాత్స॑ర్వ॒హుతః॑ . ఋచః॒ సామా॑ని జజ్ఞిరే .

ఛందాగ్ం॑సి జజ్ఞిరే॒ తస్మా᳚త్ . యజు॒స్తస్మా॑దజాయత .. 4 ..

తస్మా॒దశ్వా॑ అజాయంత . యే కే చో॑భ॒యాద॑తః . గావో॑ హ జజ్ఞిరే॒ తస్మా᳚త్ .

తస్మా᳚జ్జా॒తా అ॑జా॒వయః॑ . యత్పురు॑షం॒ వ్య॑దధుః . క॒తి॒ధా వ్య॑కల్పయన్ .

ముఖం॒ కిమ॑స్య॒ కౌ బా॒హూ . కావూ॒రూ పాదా॑వుచ్యేతే . బ్రా॒హ్మ॒ణో᳚ఽస్య॒ ముఖ॑మాసీత్ .

బా॒హూ రా॑జ॒న్యః॑ కృ॒తః .. 5 ..

ఊ॒రూ తద॑స్య॒ యద్వైశ్యః॑ . ప॒ద్భ్యాగ్ం శూ॒ద్రో అ॑జాయత . చం॒ద్రమా॒ మన॑సో జా॒తః

. చక్షోః॒ సూర్యో॑ అజాయత . ముఖా॒దింద్ర॑శ్చా॒గ్నిశ్చ॑ .  ప్రా॒ణాద్వా॒యుర॑జాయత .

నాభ్యా॑ ఆసీదం॒తరి॑క్షం . శీ॒ర్ష్ణో ద్యౌః సమ॑వర్తత . ప॒ద్భ్యాం భూమి॒ర్దిశః॒

శ్రోత్రా᳚త్ . తథా॑ లో॒కాగ్ం అ॑కల్పయన్ .. 6 ..

వేదా॒హమే॒తం పురు॑షం మ॒హాంతం᳚ . ఆ॒ది॒త్యవ॑ర్ణం॒ తమ॑స॒స్తు పా॒రే .

సర్వా॑ణి రూ॒పాణి॑ వి॒చిత్య॒ ధీరః॑ . నామా॑ని కృ॒త్వాఽభి॒వద॒న్॒, యదాస్తే᳚

. ధా॒తా పు॒రస్తా॒ద్యము॑దాజ॒హార॑ . శ॒క్రః ప్రవి॒ద్వాన్ప్ర॒దిశ॒శ్చత॑స్రః .

తమే॒వం వి॒ద్వాన॒మృత॑ ఇ॒హ భ॑వతి . నాన్యః పంథా॒ అయ॑నాయ విద్యతే . య॒జ్ఞేన॑

య॒జ్ఞమ॑యజంత దే॒వాః . తాని॒ ధర్మా॑ణి ప్రథ॒మాన్యా॑సన్ . తే హ॒ నాకం॑ మహి॒మానః॑

సచంతే . యత్ర॒ పూర్వే॑ సా॒ధ్యాః సంతి॑ దే॒వాః .. 7 ..

అ॒ద్భ్యః సంభూ॑తః పృథి॒వ్యై రసా᳚చ్చ . వి॒శ్వక॑ర్మణః॒ సమ॑వర్త॒తాధి॑

. తస్య॒ త్వష్టా॑ వి॒దధ॑ద్రూ॒పమే॑తి . తత్పురు॑షస్య॒ విశ్వ॒మాజా॑న॒మగ్రే᳚

. వేదా॒హమే॒తం పురు॑షం మ॒హాంతం᳚ . ఆ॒ది॒త్యవ॑ర్ణం॒ తమ॑సః॒ పర॑స్తాత్

. తమే॒వం వి॒ద్వాన॒మృత॑ ఇ॒హ భ॑వతి . నాన్యః పంథా॑ విద్య॒తేయ॑ఽనాయ .

ప్ర॒జాప॑తిశ్చరతి॒ గర్భే॑ అం॒తః . అ॒జాయ॑మానో బహు॒ధా విజా॑యతే .. 8 ..

తస్య॒ ధీరాః॒ పరి॑జానంతి॒ యోనిం᳚ . మరీ॑చీనాం ప॒దమి॑చ్ఛంతి వే॒ధసః॑ .

యో దే॒వేభ్య॒ ఆత॑పతి . యో దే॒వానాం᳚ పు॒రోహి॑తః . పూర్వో॒ యో దే॒వేభ్యో॑ జా॒తః .

నమో॑ రు॒చాయ॒ బ్రాహ్మ॑యే . రుచం॑ బ్రా॒హ్మం జ॒నయం॑తః . దే॒వా అగ్రే॒ తద॑బ్రువన్ .

యస్త్వై॒వం బ్రా᳚హ్మ॒ణో వి॒ద్యాత్ . తస్య॑ దే॒వా అస॒న్ వశే᳚ .. 9 ..

హ్రీశ్చ॑ తే ల॒క్ష్మీశ్చ॒ పత్న్యౌ᳚ . అ॒హో॒రా॒త్రే పా॒ర్శ్వే . నక్ష॑త్రాణి రూ॒పం .

అ॒శ్వినౌ॒ వ్యాత్తం᳚ . ఇ॒ష్టం మ॑నిషాణ . అ॒ముం మ॑నిషాణ . సర్వం॑  మనిషాణ .. 10 ..

.. నారాయణ సూక్తం ..

ఓం స॒హ నా॑వవతు . స॒హ నౌ॑ భునక్తు . స॒హ వీ॒ర్యం॑ కరవావహై .

తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ .. ఓం శాంతిః॒ శాంతిః॒ శాంతిః॑ ..

ఓం .. స॒హ॒స్ర॒శీర్॑షం దే॒వం॒ వి॒శ్వాక్షం॑ వి॒శ్వశం॑భువం . విశ్వం॑

నా॒రాయ॑ణం దే॒వ॒మ॒క్షరం॑ పర॒మం ప॒దం . వి॒శ్వతః॒ పర॑మాన్ని॒త్యం॒ వి॒శ్వం

నా॑రాయ॒ణగ్ం హ॑రిం . విశ్వ॑మే॒వేదం పురు॑ష॒-స్తద్విశ్వ॒-ముప॑జీవతి . పతిం॒

విశ్వ॑స్యా॒త్మేశ్వ॑ర॒గ్ం॒ శాశ్వ॑తగ్ం శి॒వమ॑చ్యుతం . నా॒రాయ॒ణం మ॑హాజ్ఞే॒యం॒

వి॒శ్వాత్మా॑నం ప॒రాయ॑ణం . నా॒రాయ॒ణప॑రో జ్యో॒తి॒రా॒త్మా నా॑రాయ॒ణః ప॑రః .

నా॒రాయ॒ణప॑రం బ్ర॒హ్మ॒ త॒త్త్వం నా॑రాయ॒ణః ప॑రః . నా॒రాయ॒ణప॑రో ధ్యా॒తా॒

ధ్యా॒నం నా॑రాయ॒ణః ప॑రః . యచ్చ॑ కిం॒చిజ్జ॑గత్స॒ర్వం॒ దృ॒శ్యతే᳚

శ్రూయ॒తేఽపి॑ వా ..

అంత॑ర్బ॒హిశ్చ॑ తత్స॒ర్వం॒ వ్యా॒ప్య నా॑రాయ॒ణః స్థి॑తః . అనం॑త॒మవ్య॑యం

క॒విగ్ం స॑ము॒ద్రేఽన్తం॑ వి॒శ్వశం॑భువం . ప॒ద్మ॒కో॒శ ప్ర॑తీకా॒శ॒గ్ం॒

హృ॒దయం॑ చాప్య॒ధోము॑ఖం . అధో॑ ని॒ష్ట్యా వి॑తస్త్యాం॒తే॒ నా॒భ్యాము॑పరి॒

తిష్ఠ॑తి . జ్వా॒ల॒మా॒లాకు॑లం భా॒తీ॒ వి॒శ్వస్యా॑యత॒నం మ॑హత్ . సంత॑తగ్ం

శి॒లాభి॑స్తు॒ లంబ॑త్యాకోశ॒సన్ని॑భం . తస్యాంతే॑ సుషి॒రగ్ం సూ॒క్ష్మం తస్మిన్᳚

స॒ర్వం ప్రతి॑ష్ఠితం . తస్య॒ మధ్యే॑ మ॒హాన॑గ్ని-ర్వి॒శ్వార్చి॑-ర్వి॒శ్వతో॑ముఖః

. సోఽగ్ర॑భు॒గ్విభ॑జంతి॒ష్ఠ॒న్నాహా॑రమజ॒రః క॒విః .

తి॒ర్య॒గూ॒ర్ధ్వమ॑ధశ్శా॒యీ॒ ర॒శ్మయ॑స్తస్య॒ సంత॑తా . సం॒తా॒పయ॑తి స్వం

దే॒హమాపా॑దతల॒మస్త॑కః . తస్య॒ మధ్యే॒ వహ్ని॑శిఖా అ॒ణీయో᳚ర్ధ్వా వ్య॒వస్థి॑తః .

నీ॒లతో॑-యద॑మధ్య॒స్థా॒-ద్వి॒ద్యుల్లే॑ఖేవ॒ భాస్వ॑రా . నీ॒వార॒శూక॑వత్త॒న్వీ॒

పీ॒తా భా᳚స్వత్య॒ణూప॑మా . తస్యాః᳚ శిఖా॒యా మ॑ధ్యే ప॒రమా᳚త్మా వ్య॒వస్థి॑తః .

స బ్రహ్మ॒ స శివః॒ స హరిః॒ సేంద్రః॒ సోఽక్ష॑రః పర॒మః స్వ॒రాట్ ..

ఋ॒తగ్ం స॒త్యం ప॑రం బ్ర॒హ్మ॒ పు॒రుషం॑ కృష్ణ॒పింగ॑లం . ఊ॒ర్ధ్వరే॑తం

వి॑రూపా॒క్షం॒ వి॒శ్వరూ॑పాయ॒ వై నమో॒ నమః॑ .

ఓం నా॒రా॒య॒ణాయ॑ వి॒ద్మహే॑ వాసుదే॒వాయ॑ ధీమహి . తన్నో॑ విష్ణుః ప్రచో॒దయా᳚త్ ..

ఓం శాంతిః॒ శాంతిః॒ శాంతిః॑  ..

.. విష్ణుసూక్తం ..

ఓం విష్ణో॒ర్నుకం॑ వీ॒ర్యా॑ణి॒ ప్రవో॑చం॒ యః పార్థి॑వాని విమ॒మే రజాగ్ం॑సి॒

యో అస్క॑భాయ॒దుత్త॑రగ్ం స॒ధస్థం॑ విచక్రమా॒ణస్త్రే॒ధోరు॑గా॒యో

విష్ణో॑ర॒రాట॑మసి॒ విష్ణోః᳚ పృ॒ష్ఠమ॑సి॒ విష్ణోః॒ శ్నప్త్రే᳚స్థో॒

విష్ణో॒స్స్యూర॑సి॒ విష్ణో᳚ర్ధ్రు॒వమ॑సి వైష్ణ॒వమ॑సి॒ విష్ణ॑వే త్వా ..

తద॑స్య ప్రి॒యమ॒భిపాథో॑ అశ్యాం . నరో॒ యత్ర॑ దేవ॒యవో॒ మదం॑తి .

ఉ॒రు॒క్ర॒మస్య॒ స హి బంధు॑రి॒త్థా . విష్ణోః᳚ ప॒దే ప॑ర॒మే మధ్వ॒ ఉథ్సః॑

. ప్రతద్విష్ణు॑స్స్తవతే వీ॒ర్యా॑య . మృ॒గో న భీ॒మః కు॑చ॒రో గి॑రి॒ష్ఠాః .

యస్యో॒రుషు॑ త్రి॒షు వి॒క్రమ॑ణేషు . అధి॑క్షి॒యంతి॒ భువ॑నాని॒ విశ్వా᳚ . ప॒రో

మాత్ర॑యా త॒నువా॑ వృధాన . న తే॑ మహి॒త్వమన్వ॑శ్నువంతి ..

ఉ॒భే తే॑ విద్మ॒ రజ॑సీ పృథి॒వ్యా విష్ణో॑ దేవ॒త్వం . ప॒ర॒మస్య॑ విథ్సే .

విచ॑క్రమే పృథి॒వీమే॒ష ఏ॒తాం . క్షేత్రా॑య॒ విష్ణు॒ర్మను॑షే దశ॒స్యన్ .

ధ్రు॒వాసో॑ అస్య కీ॒రయో॒ జనా॑సః . ఊ॒రు॒క్షి॒తిగ్ం సు॒జని॑మాచకార . త్రిర్దే॒వః

పృ॑థి॒వీమే॒ష ఏ॒తాం . విచ॑క్రమే శ॒తర్చ॑సం మహి॒త్వా . ప్రవిష్ణు॑రస్తు

త॒వస॒స్తవీ॑యాన్ . త్వే॒షగ్గ్హ్య॑స్య॒ స్థవి॑రస్య॒ నామ॑ ..

అతో॑ దే॒వా అ॑వంతునో॒ యతో॒ విష్ణు᳚ర్విచక్ర॒మే . పృ॒థి॒వ్యాస్స॒ప్త ధామ॑భిః .

ఇ॒దం విష్ణు॒ర్విచ॑క్రమే త్రే॒ధా నిద॑ధే ప॒దం . సమూ॑ఢమస్య పాగ్ంసు॒రే . త్రీణి॑

ప॒దా విచ॑క్రమే॒ విష్ణు॑ర్గో॒పా అదా᳚భ్యః . తతో॒ ధర్మా॑ణి ధా॒రయన్॑ . విష్ణోః॒

కర్మా॑ణి పశ్యత॒ యతో᳚ వ్ర॒తాని॑ పస్ప॒శే . ఇంద్ర॑స్య॒ యుజ్య॒స్సఖా᳚ ..

తద్విష్ణోః᳚ పర॒మం ప॒దగ్ం సదా॑ పశ్యంతి సూ॒రయః॑ . ది॒వీవ॒ చక్షు॒రాత॑తం

. తద్విప్రా॑సో విప॒న్యవో॑ జాగృ॒వాగ్ం స॒స్సమిం॑ధతే . విష్ణో॒-ర్యత్ప॑ర॒మం

ప॒దం . పర్యా᳚ప్త్యా॒ అనం॑తరాయాయ॒ సర్వ॑స్తోమోఽతి రా॒త్ర ఉ॑త్త॒మ మహ॑ర్భవతి॒

సర్వ॒స్యాప్త్యై॒ సర్వ॑స్య॒ జిత్త్యై॒ సర్వ॑మే॒వ తేనా᳚ప్నోతి॒ సర్వం॑ జయతి .. ఓం

శాంతిః॒ శాంతిః॒ శాంతిః॑  ..

.. శ్రీసూక్తం ..

ఓం హిర॑ణ్యవర్ణాం॒ హరి॑ణీం సు॒వర్ణ॑రజ॒తస్ర॑జాం . చం॒ద్రాం హి॒రణ్మ॑యీం ల॒క్ష్మీం

జాత॑వేదో మ॒ ఆవ॑హ .. తాం మ॒ ఆవ॑హ॒ జాత॑వేదో ల॒క్ష్మీమన॑పగా॒మినీం᳚ . యస్యాం॒

హిర॑ణ్యం విం॒దేయం॒ గామశ్వం॒ పురు॑షాన॒హం .. అ॒శ్వ॒పూ॒ర్వాం ర॑థమ॒ధ్యాం

హ॒స్తినా᳚ద-ప్ర॒బోధి॑నీం . శ్రియం॑ దే॒వీముప॑హ్వయే॒ శ్రీర్మా᳚ దే॒వీర్జు॑షతాం ..

కాం॒ సో॒స్మి॒తాం హిర॑ణ్యప్రా॒కారా॑మా॒ర్ద్రాం జ్వలం॑తీం తృ॒ప్తాం త॒ర్పయం॑తీం . ప॒ద్మే॒

స్థి॒తాం ప॒ద్మవ॑ర్ణాం॒ తామి॒హోప॑హ్వయే॒ శ్రియం .. చం॒ద్రాం ప్ర॑భా॒సాం య॒శసా॒

జ్వలం॑తీం॒ శ్రియం॑ లో॒కే దే॒వజు॑ష్టాముదా॒రాం . తాం ప॒ద్మినీ॑మీం॒ శర॑ణమ॒హం

ప్రప॑ద్యేఽల॒క్ష్మీర్మే॑ నశ్యతాం॒ త్వాం వృ॑ణే .. ఆ॒ది॒త్యవ॑ర్ణే॒ తప॒సోఽధి॑జా॒తో

వన॒స్పతి॒స్తవ॑ వృ॒క్షోఽథ బి॒ల్వః . తస్య॒ ఫలా᳚ని॒ తప॒సా ను॑దంతు

మా॒యాంత॑రా॒యాశ్చ॑ బా॒హ్యా అ॑ల॒క్ష్మీః .. ఉపై॑తు॒ మాం దే॑వస॒ఖః కీ॒ర్తిశ్చ॒

మణి॑నా స॒హ . ప్రా॒దు॒ర్భూ॒తోఽస్మి॑ రాష్ట్రే॒ఽస్మిన్ కీ॒ర్తిమృ॑ద్ధిం ద॒దాతు॑ మే ..

క్షుత్పి॑పా॒సామ॑లాం జ్యే॒ష్ఠామ॑ల॒క్ష్మీం నా॑శయా॒మ్యహం . అభూ॑తి॒మస॑మృద్ధిం॒

చ సర్వాం॒ నిర్ణు॑ద మే॒ గృహా᳚త్ .. గం॒ధ॒ద్వా॒రాం దు॑రాధ॒ర్షాం॒ ని॒త్యపు॑ష్టాం

కరీ॒షిణీం᳚ . ఈ॒శ్వరీగ్ం॑ సర్వ॑భూతా॒నాం॒ తామి॒హోప॑హ్వయే॒ శ్రియం .. మన॑సః॒

కామ॒మాకూ᳚తిం వా॒చః స॒త్యమ॑శీమహి . ప॒శూ॒నాం రూ॒పమన్న॑స్య॒ మయి॒ శ్రీః

శ్ర॑యతాం॒ యశః॑ .. క॒ర్దమే॑న ప్ర॑జాభూ॒తా॒ మ॒యి॒ సంభ॑వ క॒ర్దమ . శ్రియం॑

వా॒సయ॑ మే కు॒లే మా॒తరం॑ పద్మ॒మాలి॑నీం .. ఆపః॑ సృ॒జంతు॑ స్ని॒గ్ధా॒ని॒

చి॒క్లీ॒త వస॑ మే॒ గృహే . ని చ॑ దే॒వీం మా॒తరం॒ శ్రియం॑ వా॒సయ॑ మే కు॒లే ..

ఆ॒ర్ద్రాం పు॒ష్కరి॑ణీం పు॒ష్టిం॒ పిం॒గ॒లాం ప॑ద్మమా॒లినీం . చం॒ద్రాం హి॒రణ్మ॑యీం

ల॒క్ష్మీం జాత॑వేదో మ॒ ఆవ॑హ .. ఆ॒ర్ద్రాం యః॒ కరి॑ణీం య॒ష్టిం॒ సు॒వ॒ర్ణాం

హే॑మమా॒లినీం . సూ॒ర్యాం హి॒రణ్మ॑యీం ల॒క్ష్మీం॒ జాత॑వేదో మ॒ ఆవ॑హ .. తాం మ॒

ఆవ॑హ॒ జాత॑వేదో ల॒క్ష్మీమన॑పగా॒మినీం᳚ . యస్యాం॒ హిర॑ణ్యం॒ ప్రభూ॑తం॒ గావో॑

దా॒స్యోఽశ్వా᳚న్, విం॒దేయం॒ పురు॑షాన॒హం ..

ఓం మ॒హా॒దే॒వ్యై చ॑ వి॒ద్మహే॑ విష్ణుప॒త్న్యై చ॑ ధీమహి . తన్నో॑ లక్ష్మీః

ప్రచో॒దయా᳚త్ .. ఓం శాంతిః॒ శాంతిః॒ శాంతిః॑ ..

.. భూసూక్తం ..

ఓం భూమి॑ర్భూ॒మ్నా ద్యౌర్వ॑రి॒ణాఽన్తరి॑క్షం మహి॒త్వా . ఉ॒పస్థే॑ తే

దేవ్యదితే॒ఽగ్నిమ॑న్నా॒ద-మ॒న్నాద్యా॒యాద॑ధే .. ఆఽయంగౌః పృశ్ని॑రక్రమీ॒

దస॑నన్మా॒తరం॒ పునః॑ . పి॒తరం॑ చ ప్ర॒యంత్సువః॑ .. త్రి॒గ్ం॒శద్ధామ॒

విరా॑జతి॒ వాక్ప॑తం॒గాయ॑ శిశ్రియే . ప్రత్య॑స్య వహ॒ ద్యుభిః॑ .. అ॒స్య

ప్రా॒ణాద॑పాన॒త్యం॑తశ్చ॑రతి రోచ॒నా . వ్య॑ఖ్యన్ మహి॒షః సువః॑ ..

యత్త్వా᳚ క్రు॒ద్ధః ప॑రో॒వప॑మ॒న్యునా॒ యదవ॑ర్త్యా . సు॒కల్ప॑మగ్నే॒ తత్తవ॒

పున॒స్త్వోద్దీ॑పయామసి .. యత్తే॑ మ॒న్యుప॑రోప్తస్య పృథి॒వీమను॑దధ్వ॒సే . ఆ॒ది॒త్యా

విశ్వే॒ తద్దే॒వా వస॑వశ్చ స॒మాభ॑రన్ ..

మే॒దినీ॑ దే॒వీ వ॒సుంధ॑రా స్యా॒ద్వసు॑ధా దే॒వీ వా॒సవీ᳚ . బ్ర॒హ్మ॒వ॒ర్చ॒సః

పి॑తృ॒ణాగ్ శ్రోత్రం॒ చక్షు॒ర్మనః॑ .. దే॒వీ హిర॑ణ్యగర్భిణీ దే॒వీ ప్ర॒సూవ॑రీ

. సద॑నే స॒త్యాయ॑నే సీద . స॒ము॒ద్రవ॑తీ సావి॒త్రీహ॒ నో దే॒వీ మ॒హ్యంగీ᳚ .

మ॒హీధర॑ణీ మ॒హోవ్యథి॑ష్ఠా-శ్శృం॒గే శృం॑గే య॒జ్ఞే య॑జ్ఞే విభీ॒షిణీ᳚ ..

ఇంద్ర॑పత్నీ వ్యా॒పినీ॑ సు॒రస॑రిది॒హ . వా॒యు॒మతీ॑ జల॒శయ॑నీ శ్రి॒యంధా॒రాజా॑

స॒త్యంధో॒పరి॑మేదినీ . శ్వో॒పరి॑ధత్తం॒ పరి॑గాయ . వి॒ష్ణు॒ప॒త్నీం

మ॑హీం దే॒వీం॒ మా॒ధ॒వీం మా॑ధవ॒ప్రియాం . లక్ష్మీం᳚ ప్రి॒యస॑ఖీం దే॒వీం॒

న॒మా॒మ్యచ్యు॑తవ॒ల్లభాం ..

ఓం ధ॒ను॒ర్ధ॒రాయై॑ వి॒ద్మహే॑ సర్వసి॒ద్ధ్యై చ॑ ధీమహి . తన్నో॑ ధరా ప్రచో॒దయా᳚త్

. మ॒హీం దే॒వీం విష్ణు॑పత్నీ-మజూ॒ర్యాం . ప్ర॒తీచీ॑ మేనాగ్ం హ॒విషా॑ యజామః .

త్రే॒ధా విష్ణు॑రురుగా॒యో విచ॑క్రమే . మ॒హీం దివం॑ పృథి॒వీమం॒తరి॑క్షం .

తచ్ఛ్రో॒ణైతి॒శ్రవ॑-ఇ॒చ్ఛమా॑నా . పుణ్య॒గ్గ్॒ శ్లోకం॒ యజ॑మానాయ కృణ్వ॒తీ ..

ఓం శాంతిః॒ శాంతిః॒ శాంతిః॑ ..

.. నీళాసూక్తం ..

ఓం గృ॒ణా॒హి॒ . ఘృ॒తవ॑తీ సవిత॒రాధి॑పత్యైః॒ పయ॑స్వతీ॒రంతి॒రాశా॑నో

అస్తు . ధ్రు॒వా ది॒శాం విష్ణు॑ప॒త్న్యఘో॑రా॒ఽస్యేశా॑నా॒సహ॑సో॒యా మ॒నోతా᳚

. బృహ॒స్పతి॑-ర్మాత॒రిశ్వో॒త వా॒యుస్సం॑ధువా॒నావాతా॑ అ॒భి నో॑ గృణంతు .

వి॒ష్టం॒భో ది॒వోధ॒రుణః॑ పృథి॒వ్యా అ॒స్యేశ్యా॑నా॒ జగ॑తో॒ విష్ణు॑పత్నీ ..

ఓం శాంతిః॒ శాంతిః॒ శాంతిః॑ ..

.. దేవీసూక్తం ..

ఓం అ॒హం రు॒ద్రేభి॒ర్వసు॑భిశ్చరామ్య॒హమా᳚ది॒త్యైరు॒త వి॒శ్వదే᳚వైః .

అ॒హం మి॒త్రావరు॑ణో॒భా బి॑భర్మ్య॒హమిం᳚ద్రా॒గ్నీ అ॒హమ॒శ్వినో॒భా .. 1 ..

అ॒హం సోమ॑మాహ॒నసం᳚ బిభర్మ్య॒హం త్వష్టా᳚రము॒త పూ॒షణం॒ భగం᳚ .

అ॒హం ద॑ధామి॒ ద్రవి॑ణం హ॒విష్మ॑తే సుప్రా॒వ్యే॒ ఏ॒ 3॒॑ యజ॑మానాయ సున్వ॒తే .. 2 ..

అ॒హం రాష్ట్రీ᳚ సం॒గమ॑నీ॒ వసూ᳚నాం చికి॒తుషీ᳚ ప్రథ॒మా య॒జ్ఞియా᳚నాం .

తాం మా᳚ దే॒వా వ్య॑దధుః పురు॒త్రా భూరి॑స్థాత్రాం॒ భూర్యా᳚ వే॒శయన్᳚తీం .. 3 ..

మయా॒ సోఽఅన్న॑మత్తి॒ యో వి॒పశ్య॑తి॒ యః ప్రాణి॑తి॒ యఈం᳚ శ్రు॒ణోత్యు॒క్తం .

అ॒మం॒తవో॒మాంత ఉప॑క్షియంతి శ్రు॒ధిశ్రు॑త శ్రద్ధి॒వం తే᳚ వదామి .. 4 ..

అ॒హమే॒వ స్వ॒యమి॒దం వ॑దామి॒ జుష్టం᳚ దే॒వేభి॑రు॒త మాను॑షేభిః .

యం కా॒మయే॒ తం త॑ము॒గ్రం కృ॑ణోమి॒ తం బ్ర॒హ్మాణం॒ తమృషిం॒ తం సు॑మే॒ధాం ..

5 ..

అ॒హం రు॒ద్రాయ॒ ధను॒రాత॑నోమి బ్రహ్మ॒ద్విషే॒ శర॑వే॒హంత॒ వా ఉ॑ .

అ॒హం జనా᳚య స॒మదం᳚ కృణోమ్య॒హం ద్యావా᳚పృథి॒వీ ఆవి॑వేశ .. 6 ..

అ॒హం సు॑వే పి॒తర॑మస్య మూ॒ర్ధన్ మమ॒ యోని॑ర॒ప్స్వ (అ॒) 1॒॑న్తః స॑ము॒ద్రే .

తతో॒ వితి॑ష్ఠే॒ భువ॒నాను॒ విశ్వో॒ తామూం ద్యాం వ॒ర్ష్మణోప॑స్పృశామి .. 7 ..

అ॒హమే॒వ వాత॑ఽఇవ॒ ప్రవా᳚మ్యా॒రభ॑మాణా॒ భువ॑నాని॒ విశ్వా᳚ .

ప॒రో ది॒వా ప॒రఏ॒నా పృ॑థి॒వ్యై తావ॑తీ మహి॒నా సంబ॑భూవ .. 8 ..

ఓం శాంతిః॒ శాంతిః॒ శాంతిః॑ ..

.. మేధాసూక్తం ..

ఓం యశ్ఛంద॑సామృష॒భో వి॒శ్వరూ॑పః . ఛందో॒భ్యోఽధ్య॒మృతా᳚థ్సంబ॒భూవ॑

. స మేంద్రో॑ మే॒ధయా᳚ స్పృణోతు . అ॒మృత॑స్య దేవ॒ధార॑ణో భూయాసం . శరీ॑రం మే॒

విచ॑ర్షణం . జి॒హ్వా మే॒ మధు॑మత్తమా . కర్ణా᳚భ్యాం॒ భూరి॒విశ్రు॑వం . బ్రహ్మ॑ణః

కో॒శో॑ఽసి మే॒ధయా పి॑హితః .  శ్రు॒తం మే॑ గోపాయ . ఓం శాంతిః॒ శాంతిః॒ శాంతిః॑  ..

ఓం మే॒ధాదే॒వీ జు॒షమా॑ణా న॒ ఆగా᳚ద్వి॒శ్వాచీ॑ భ॒ద్రా సు॑మన॒స్యమా॑నా .

త్వయా॒ జుష్టా॑ ను॒దమా॑నా దు॒రుక్తా᳚న్ బృ॒హద్వ॑దేమ వి॒దథే॑ సు॒వీరాః᳚ . త్వయా॒

జుష్ట॑ ఋ॒షిర్భ॑వతి దేవి॒ త్వయా॒ బ్రహ్మా॑ఽఽగ॒తశ్రీ॑రు॒త త్వయా᳚ . త్వయా॒

జుష్ట॑శ్చి॒త్రం విం॑దతే వసు॒ సానో॑ జుషస్వ॒ ద్రవి॑ణో న మేధే ..

మే॒ధాం మ॒ ఇంద్రో॑ దదాతు మే॒ధాం దే॒వీ సర॑స్వతీ . మే॒ధాం మే॑

అ॒శ్వినా॑వు॒భావాధ॑త్తాం॒ పుష్క॑రస్రజా . అ॒ప్స॒రాసు॑ చ॒ యా మే॒ధా

గం॑ధ॒ర్వేషు॑ చ॒ యన్మనః॑ . దైవీం᳚ మే॒ధా సర॑స్వతీ॒ సా మాం᳚ మే॒ధా

సు॒రభి॑ర్జుషతా॒గ్॒ స్వాహా᳚ . ఆమాం᳚ మే॒ధా సు॒రభి॑ర్వి॒శ్వరూ॑పా॒ హిర॑ణ్యవర్ణా॒

జగ॑తీ జగ॒మ్యా . ఊర్జ॑స్వతీ॒ పయ॑సా॒ పిన్వ॑మానా॒ సా మాం᳚ మే॒ధా సు॒ప్రతీ॑కా

జుషంతాం ..

మయి॑ మే॒ధాం మయి॑ ప్ర॒జాం మయ్య॒గ్నిస్తేజో॑ దధాతు॒ మయి॑ మే॒ధాం మయి॑ ప్ర॒జాం

మయీంద్ర॑ ఇంద్రి॒యం ద॑ధాతు॒ మయి॑ మే॒ధాం మయి॑ ప్ర॒జాం మయి॒ సూర్యో॒ భ్రాజో॑

దధాతు ..

ఓం హం॒స॒ హం॒సాయ॑ వి॒ద్మహే॑ పరమహం॒సాయ॑ ధీమహి . తన్నో॑ హంసః ప్రచో॒దయా᳚త్ ..

ఓం శాంతిః॒ శాంతిః॒ శాంతిః॑  ..

.. నవగ్రహసూక్తం ..

ఓం శుక్లాంబరధరం విష్ణుం శశివర్ణం చతుర్భుజం. ప్రసన్నవదనం ధ్యాయేత్సర్వ

విఘ్నోపశాంతయే.. ఓం భూః ఓం భువః॑ ఓగ్ం॒ సువః॑ ఓం మహః॑ ఓం జనః ఓం తపః॑ ఓగ్ం

స॒త్యం ఓం తత్స॑వి॒తుర్వరే᳚ఽణ్యం॒ భర్గో॑దే॒వస్య॑ ధీమహి ధియో॒ యో నః॑

ప్రచో॒దయా᳚ఽత్ .. ఓం ఆపో॒ జ్యోతీ॒రసో॒ఽమృతం॒ బ్రహ్మ॒ భూర్భువ॒స్సువ॒రోం ..

మమోపాత్త-సమస్త-దురితక్షయద్వారా శ్రీపరమేశ్వర ప్రీత్యర్థం ఆదిత్యాది నవగ్రహ దేవతా

ప్రసాద సిధ్యర్తం ఆదిత్యాది నవగ్రహ నమస్కారాన్ కరిష్యే..

ఓం ఆస॒త్యేన॒ రజ॑సా॒ వర్త॑మానో నివే॒శయ॑న్న॒మృతం॒ మర్త్యం॑చ .

హి॒ర॒ణ్యయే॑న సవి॒తా రథే॒నాఽఽదే॒వో యా॑తి॒భువ॑నా వి॒పశ్యన్॑ .. అ॒గ్నిం దూ॒తం

వృ॑ణీమహే॒ హోతా॑రం వి॒శ్వవే॑దసం . అ॒స్య య॒జ్ఞస్య॑ సు॒క్రతుం᳚ .. యేషా॒మీశే॑

పశు॒పతిః॑ పశూ॒నాం చతు॑ష్పదాము॒త చ॑ ద్వి॒పదాం᳚ . నిష్క్రీ॑తో॒ఽయం య॒జ్ఞియం॑

భా॒గమే॑తు రా॒యస్పోషా॒ యజ॑మానస్య సంతు .. ఓం అధిదేవతా ప్రత్యధిదేవతా సహితాయ

ఆది॑త్యాయ॒ నమః॑ .. 1 ..

ఓం ఆప్యా॑యస్వ॒ సమే॑తు తే వి॒శ్వత॑స్సోమ॒ వృష్ణి॑యం . భవా॒ వాజ॑స్య

సంగ॒థే .. అ॒ప్సుమే॒ సోమో॑ అబ్రవీదం॒తర్విశ్వా॑ని భేష॒జా . అ॒గ్నించ॑

వి॒శ్వశం॑భువ॒మాప॑శ్చ వి॒శ్వభే॑షజీః .. గౌ॒రీ మి॑మాయ సలి॒లాని॒

తక్ష॒త్యేక॑పదీ ద్వి॒పదీ॒ సా చతు॑ష్పదీ . అ॒ష్టాప॑దీ॒ నవ॑పదీ బభూ॒వుషీ॑

స॒హస్రా᳚క్షరా పర॒మే వ్యో॑మన్ .. ఓం అధిదేవతా ప్రత్యధిదేవతా సహితాయ సోమా॑య॒

నమః॑ .. 2 ..

ఓం అ॒గ్నిర్మూ॒ర్ద్ధా ది॒వః క॒కుత్పతిః॑ పృథి॒వ్యా అ॒యం . అ॒పాగ్ంరేతాగ్ం॑సి జిన్వతి ..

స్యో॒నా పృ॑థివి॒ భవా॑ఽనృక్ష॒రా ని॒వేశ॑నీ . యచ్ఛా॑న॒శ్శర్మ॑ స॒ప్రథాః᳚

.. క్షేత్ర॑స్య॒ పతి॑నా వ॒యగ్ంహి॒తే నే॑వ జయామసి . గామశ్వం॑ పోషయి॒త్న్వా స నో॑

మృడాతీ॒దృశే᳚ .. ఓం అధిదేవతా ప్రత్యధిదేవతా సహితాయ అంగా॑రకాయ॒ నమః॑ .. 3 ..

ఓం ఉద్బు॑ధ్యస్వాగ్నే॒ ప్రతి॑జాగృహ్యేనమిష్టాపూ॒ర్తే సగ్ంసృ॑జేథామ॒యంచ॑ . పునః॑

కృ॒ణ్వగ్గ్స్త్వా॑ పి॒తరం॒ యువా॑నమ॒న్వాతాగ్ం॑సీ॒త్త్వయి॒ తంతు॑మే॒తం .. ఇ॒దం

విష్ణు॒ర్విచ॑క్రమే త్రే॒ధా నిద॑ధే ప॒దం . సమూ॑ఢమస్యపాగ్ం సు॒రే .. విష్ణో॑

ర॒రాట॑మసి॒ విష్ణోః᳚ పృ॒ష్ఠమ॑సి॒ విష్ణో॒శ్శ్నప్త్రే᳚స్థో॒ విష్ణో॒స్స్యూర॑సి॒

విష్ణో᳚ర్ధ్రు॒వమ॑సి వైష్ణ॒వమ॑సి॒ విష్ణ॑వే త్వా .. ఓం అధిదేవతా ప్రత్యధిదేవతా

సహితాయ బుధా॑య॒ నమః॑ .. 4 ..

ఓం బృహ॑స్పతే॒ అతి॒యద॒ర్యో అర్హా᳚ద్ద్యు॒మద్వి॒భాతి॒ క్రతు॑మ॒జ్జనే॑షు .

యద్దీ॒దయ॒చ్చవ॑సర్తప్రజాత॒ తద॒స్మాసు॒ ద్రవి॑ణంధేహి చి॒త్రం .. ఇంద్ర॑మరుత్వ

ఇ॒హ పా॑హి॒ సోమం॒ యథా॑ శార్యా॒తే అపి॑బస్సు॒తస్య॑ . తవ॒ ప్రణీ॑తీ॒ తవ॑

శూర॒శర్మ॒న్నావి॑వాసంతి క॒వయ॑స్సుయ॒జ్ఞాః .. బ్రహ్మ॑జజ్ఞా॒నం ప్ర॑థ॒మం

పు॒రస్తా॒ద్విసీ॑మ॒తస్సు॒రుచో॑ వే॒న ఆ॑వః . సబు॒ధ్నియా॑ ఉప॒మా అ॑స్య

వి॒ష్ఠాస్స॒తశ్చ॒ యోని॒మస॑తశ్చ॒ వివః॑ .. ఓం అధిదేవతా ప్రత్యధిదేవతా సహితాయ

బృహ॒స్పత॑యే॒ నమః॑ .. 5 ..

ఓం ప్రవ॑శ్శు॒క్రాయ॑ భా॒నవే॑ భరధ్వం . హ॒వ్యం మ॒తిం చా॒గ్నయే॒ సుపూ॑తం . యో

దైవ్యా॑ని॒ మాను॑షా జ॒నూగ్ంషి॑ అం॒తర్విశ్వా॑ని వి॒ద్మ నా॒ జిగా॑తి .. ఇం॒ద్రా॒ణీమా॒సు

నారి॑షు సు॒పత్నీ॑మ॒హమ॑శ్రవం . న హ్య॑స్యా అప॒రంచ॒న జ॒రసా॒ మర॑తే॒

పతిః॑ .. ఇంద్రం॑ వో వి॒శ్వత॒స్పరి॒ హవా॑మహే॒ జనే᳚భ్యః . అ॒స్మాక॑మస్తు॒ కేవ॑లః

.. ఓం అధిదేవతా ప్రత్యధిదేవతా సహితాయ శుక్రా॑య॒ నమః॑ .. 6 ..

ఓం శన్నో॑ దే॒వీర॒భిష్ట॑య॒ ఆపో॑ భవంతు పీ॒తయే᳚ . శంయోర॒భిస్ర॑వంతు నః

.. ప్రజా॑పతే॒ న త్వదే॒తాన్య॒న్యో విశ్వా॑ జా॒తాని॒ పరి॒తా బ॑భూవ . యత్కా॑మాస్తే

జుహు॒మస్తన్నో॑ అస్తు వ॒యగ్గ్స్యా॑మ॒ పత॑యో రయీ॒ణాం .. ఇ॒మం య॑మప్రస్త॒రమాహి

సీదాఽఙ్గి॑రోభిః పి॒తృభి॑స్సంవిదా॒నః . ఆత్వా॒ మంత్రాః᳚ కవిశ॒స్తా వ॑హంత్వే॒నా

రా॑జన్, హ॒విషా॑ మాదయస్వ.. ఓం అధిదేవతా ప్రత్యధిదేవతా సహితాయ శనైశ్చ॑రాయ॒

నమః॑ .. 7 ..

ఓం కయా॑ నశ్చి॒త్ర ఆభు॑వదూ॒తీ స॒దావృ॑ధ॒స్సఖా᳚ . కయా॒ శచి॑ష్ఠయా

వృ॒తా .. ఆఽయంగౌః పృశ్ని॑రక్రమీ॒దస॑నన్మా॒తరం॒ పునః॑ . పి॒తరం॑చ

ప్ర॒యంత్సువః॑ .. యత్తే॑ దే॒వీ నిర్ఋ॑తిరాబ॒బంధ॒ దామ॑ గ్రీ॒వాస్వ॑విచ॒ర్త్యం .

ఇ॒దంతే॒ తద్విష్యా॒మ్యాయు॑షో॒ న మధ్యా॒దథా॑జీ॒వః పి॒తుమ॑ద్ధి॒ ప్రము॑క్తః ..

ఓం అధిదేవతా ప్రత్యధిదేవతా సహితాయ రాహ॑వే॒ నమః॑ .. 8 ..

ఓం కే॒తుంకృ॒ణ్వన్న॑కే॒తవే॒ పేశో॑ మర్యా అపే॒శసే᳚ . సము॒షద్భి॑రజాయథాః

.. బ్ర॒హ్మా దే॒వానాం᳚ పద॒వీః క॑వీ॒నామృషి॒ర్విప్రా॑ణాం మహి॒షో మృ॒గాణాం᳚ .

శ్యే॒నోగృధ్రా॑ణా॒గ్॒స్వధి॑తి॒ర్వనా॑నా॒గ్ం॒ సోమః॑ ప॒విత్ర॒మత్యే॑తి॒ రేభన్॑

.. సచి॑త్ర చి॒త్రం చి॒తయన్᳚తమ॒స్మే చిత్ర॑క్షత్ర చి॒త్రత॑మం వయో॒ధాం .

చం॒ద్రం ర॒యిం పు॑రు॒వీరం᳚ బృ॒హంతం॒ చంద్ర॑చం॒ద్రాభి॑ర్గృణ॒తే యు॑వస్వ ..

ఓం అధిదేవతా ప్రత్యధిదేవతా సహితేభ్యః కేతు॑భ్యో॒ నమః॑ .. 9 ..

.. ఓం ఆదిత్యాది నవగ్రహ దేవ॑తాభ్యో॒ నమో॒ నమః॑ ..

.. ఓం శాంతిః॒ శాంతిః॒ శాంతిః॑ ..

.. దశశాంతయః  ..

ఓం భ॒ద్రం కర్ణే॑భిః శృణు॒యామ॑ దేవాః . భ॒ద్రం ప॑శ్యేమా॒క్షభి॒ర్యజ॑త్రాః

. స్థి॒రైరంగై᳚స్తుష్టు॒వాగ్ంస॑స్త॒నూభిః॑ . వ్యశే॑మ దే॒వహి॑తం॒ యదాయుః॑ .

స్వ॒స్తి న॒ ఇంద్రో॑ వృ॒ద్ధశ్ర॑వాః . స్వ॒స్తి నః॑ పూ॒షా వి॒శ్వవే॑దాః . స్వ॒స్తి

న॒స్తార్క్ష్యో॒ అరి॑ష్టనేమిః . స్వ॒స్తి నో॒ బృహ॒స్పతి॑ర్దధాతు .. ఓం శాంతిః॒ శాంతిః॒

శాంతిః॑ ..

ఓం నమో॒ బ్రహ్మ॑ణే॒ నమో॑ అస్త్వ॒గ్నయే॒ నమః॑ పృథి॒వ్యై నమ॒ ఓష॑ధీభ్యః .

నమో॑ వా॒చే నమో॑ వా॒చస్పత॑యే॒ నమో॒ విష్ణ॑వే బృహ॒తే క॑రోమి .. ఓం శాంతిః॒

శాంతిః॒ శాంతిః॑ ..

ఓం నమో॑ వా॒చే యా చో॑ది॒తా యా చాను॑దితా॒ తస్యై॑ వా॒చే నమో॒ నమో॑ వా॒చే నమో॑

వా॒చస్పత॑యే॒ నమ॒ ఋషి॑భ్యో మంత్ర॒కృద్భ్యో॒ మంత్ర॑పతిభ్యో॒ మామామృష॑యో

మంత్ర॒కృతో॑ మంత్ర॒పత॑యః॒ పరా॑దు॒ర్మా ఽహమృషీ᳚న్మంత్ర॒కృతో॑

మంత్ర॒పతీ॒న్పరా॑దాం వైశ్వదే॒వీం వాచ॑ముద్యాసగ్ం శి॒వామద॑స్తాం॒ జుష్టాం᳚

దే॒వేభ్యః॒ శర్మ॑ మే॒ ద్యౌః శర్మ॑పృథి॒వీ శర్మ॒ విశ్వ॑మి॒దం జగ॑త్ .

శర్మ॑ చం॒ద్రశ్చ॒ సూర్య॑శ్చ॒ శర్మ॑ బ్రహ్మప్రజాప॒తీ . భూ॒తం వ॑దిష్యే॒

భువ॑నం వదిష్యే॒ తేజో॑ వదిష్యే॒ యశో॑ వదిష్యే॒ తపో॑ వదిష్యే॒  బ్రహ్మ॑ వదిష్యే

స॒త్యం వ॑దిష్యే॒ తస్మా॑ అ॒హమి॒దము॑ప॒స్తర॑ణ॒ముప॑స్తృణ ఉప॒స్తర॑ణం

మే ప్ర॒జాయై॑ పశూ॒నాం భూ॑యాదుప॒స్తర॑ణమ॒హం ప్ర॒జాయై॑ పశూ॒నాం భూ॑యాసం॒

ప్రాణా॑పానౌ మృ॒త్యోర్మా॑పాతం॒ ప్రాణ॑పానౌ॒ మా మా॑ హాసిష్టం॒ మధు॑ మనిష్యే॒ మధు॑

జనిష్యే॒ మధు॑ వక్ష్యామి॒ మధు॑ వదిష్యామి॒ మధు॑మతీం దే॒వేభ్యో॒ వాచ॑ముద్యాసగ్ం

శుశ్రూ॒షేణ్యాం᳚ మను॒ష్యే᳚భ్య॒స్తం మా॑ దే॒వా అ॑వంతు శో॒భాయై॑ పి॒తరోఽను॑మదంతు

.. ఓం శాంతిః॒ శాంతిః॒ శాంతిః॑ ..

ఓం శం నో॒ వాతః॑ పవతాం మాత॒రిశ్వా॒ శం న॑స్తపతు॒ సూర్యః॑ . అహా॑ని॒ శం భ॑వంతు

న॒శ్శగ్ం రాత్రిః॒ ప్రతి॑ ధీయతాం . శము॒షానో॒ వ్యు॑చ్ఛతు॒ శమా॑ది॒త్య ఉదే॑తు నః .

శి॒వా న॒శ్శంత॑మాభవ సుమృడీ॒కా సర॑స్వతి .

మాతే॒ వ్యో॑మ సం॒దృశి॑ . ఇడా॑యై॒వాస్త్వ॑సి వాస్తు॒ మద్వా᳚స్తు॒మంతో॑ భూయాస్మ॒

మా వాస్తో᳚-శ్ఛిథ్స్మహ్యవా॒స్తుస్స భూ॑యా॒ద్యో᳚ఽస్మాంద్వేష్టి॒ యం చ॑ వ॒యం ద్వి॒ష్మః .

ప్ర॒తి॒ష్ఠాసి॑ ప్రతి॒ష్ఠావం॑తో భూయాస్మ॒మా

ప్ర॑తి॒ష్ఠాయా᳚-శ్ఛిథ్స్మహ్యప్రతి॒ష్ఠస్స భూ॑యా॒ద్యో᳚ఽస్మాంద్వేష్టి॒ యం చ॑ వ॒యం

ద్వి॒ష్మః . ఆవా॑తవాహి భేష॒జం వివా॑తవాహి॒ యద్రపః॑ . త్వగ్ం హి వి॒శ్వభే॑షజో

దే॒వానాం᳚ దూ॒త ఈయ॑సే . ద్వావి॒మౌ వాతౌ॑ వాత॒ ఆసింధో॒రాప॑రా॒వతః॑ ..

దక్షం॑ మే అ॒న్య ఆ॒వాతు॒ పరా॒న్యోవా॑తు॒ యద్రపః॑ . యద॒దోవా॑తతే

గృ॒హే॑ఽమృత॑స్య ని॒ధిర్ హి॒తః . తతో॑ నో దేహి జీ॒వసే॒ తతో॑ నో ధేహి భేష॒జం

. తతో॑ నో॒ మహ॒ ఆవ॑హ॒ వాత॒ ఆవా॑తు భేష॒జం .

శం॒భూర్మ॑యో॒భూర్నో॑ హృ॒దేప్రణ॒ ఆయూగ్ం॑షి తారిషత్ . ఇంద్ర॑స్య గృ॒హో॑ఽసి॒ తం

త్వా॒ ప్రప॑ద్యే॒ సగు॒స్సాశ్వః॑ . స॒హ యన్మే॒ అస్తి॒ తేన॑ . భూః ప్రప॑ద్యే॒ భువః॒

ప్రప॑ద్యే॒ సువః॒ ప్రప॑ద్యే॒ భూర్భువ॒స్సువః॒ ప్రప॑ద్యే వా॒యుం ప్రప॒ద్యేనా᳚ర్తాం

దే॒వతాం॒ ప్రప॒ద్యేఽశ్మా॑నమాఖ॒ణం ప్రప॑ద్యే ప్ర॒జాప॑తేర్బ్రహ్మకో॒శం

బ్రహ్మ॒ప్రప॑ద్య॒ ఓం ప్రప॑ద్యే .

అం॒తరి॑క్షం మ ఉ॒ర్వం॑తరం॑ బృ॒హద॒గ్నయః॒ పర్వ॑తాశ్చ॒ యయా॒ వాతః॑

స్వ॒స్త్యా స్వ॑స్తి॒మాంతయా᳚ స్వ॒స్త్యా స్వ॑స్తి॒మాన॑సాని .

ప్రాణా॑పానౌ మృ॒త్యోర్మా॑పాతం॒ ప్రాణా॑పానౌ॒ మా మా॑ హాసిష్టం॒ మయి॑ మే॒ధాం మయి॑

ప్ర॒జాం మయ్య॒గ్నిస్తేజో॑ దధాతు॒ మయి॑ మే॒ధాం మయి॑ ప్ర॒జాం మయీంద్ర॑ ఇంద్రి॒యం

ద॑ధాతు॒ మయి॑ మే॒ధాం మయి॑ ప్ర॒జాం మయి॒ సూర్యో॒ భ్రాజో॑ దధాతు ..

ద్యు॒భి-ర॒క్తుభిః॒ పరి॑పాతమ॒స్మానరి॑ష్టేభిరశ్వినా॒ సౌభ॑గేభిః . తన్నో॑

మి॒త్రో వరు॑ణో మామహంతా॒మది॑తిః॒ సింధుః॑ పృథి॒వీ ఉ॒తద్యౌః . కయా॑నశ్చి॒త్ర

ఆభు॑వదూ॒తీ స॒దావృ॑ధ॒స్సఖా᳚ .

కయా॒శచి॑ష్ఠయా వృ॒తా . కస్త్వా॑ స॒త్యో మదా॑నాం॒ మగ్ంహి॑ష్ఠో మథ్స॒దంధ॑సః .

దృ॒ఢా చి॑దా॒రుజే॒ వసు॑ . అ॒భీషుణ॒స్సఖీ॑నామవి॒తా జ॑రితౄ॒ణాం .

శ॒తం భ॑వాస్యూ॒తిభిః॑ . వయ॑స్సుప॒ర్ణా ఉప॑సేదు॒రింద్రం॑ ప్రి॒యమే॑ధా॒ ఋష॑యో॒

నాధ॑మానాః . అప॑ధ్వాం॒తమూ᳚ర్ణు॒హి పూ॒ర్ధిచక్షు॑ర్ముము॒గ్ధ్య॑స్మన్ని॒ధయే॑వ

బ॒ద్ధాన్ .

శం నో॑ దే॒వీర॒భిష్ట॑య॒ ఆపో॑ భవంతు పీ॒తయే᳚ . శంయోర॒భిస్ర॑వంతు నః ..

ఈశా॑నా॒వార్యా॑ణాం॒ క్షయం॑తీశ్చర్షణీ॒నాం . అ॒పో యా॑చామి భేష॒జం .

సు॒మి॒త్రాన॒ ఆప॒ ఓష॑ధయః సంతు దుర్మి॒త్రాస్తస్మై॑ భూయాసు॒ర్యో᳚ఽస్మాంద్వేష్టి॒

యం చ॑ వ॒యం ద్వి॒ష్మః .

ఆపో॒ హిష్ఠా మ॑యో॒భువ॒స్తా న॑ ఊ॒ర్జే ద॑ధాతన . మ॒హేరణా॑య॒ చక్ష॑సే .

యో వః॑ శి॒వత॑మో రస॒స్తస్య॑ భాజయతే॒ హ నః॑ . ఉ॒శ॒తీరి॑వ మా॒త॑రః .

తస్మా॒ అరం॑గమామవో॒ యస్య॒ క్షయా॑య॒ జిన్వ॑థ . ఆపో॑ జ॒నయ॑థా చ నః .

పృ॒థి॒వీ శాం॒తా సాగ్నినా॑ శాం॒తా సామే॑ శాం॒తా శుచగ్ం॑ శమయతు . అం॒తరి॑క్షగ్ం

శాం॒తం తద్వా॒యునా॑ శాం॒తం తన్మే॑ శాం॒తగ్ం శుచగ్ం॑ శమయతు . ద్యౌశ్శాం॒తా

సాది॒త్యేన॑ శాం॒తా సా మే॑ శాం॒తా శుచగ్ం॑ శమయతు .

పృ॒థి॒వీ శాంతి॑రం॒తరి॑క్ష॒గ్ం॒

శాంతి॒-ర్ద్యౌ-శ్శాంతి॒ర్దిశ॒-శ్శాంతి॑-రవాంతరది॒శా-శ్శాంతి॑-ర॒గ్ని-శ్శాంతి॑-ర్వా॒యు-శ్శాంతి॑-రాది॒త్య-శ్శాంతి॑-శ్చం॒ద్రమా॒-శ్శాంతి॒-ర్నక్ష॑త్రాణి॒-శాంతి॒-రాప॒-శ్శాంతి॒-రోష॑ధయ॒-శ్శాంతి॒-ర్వన॒స్పత॑య॒-శ్శాంతి॒-ర్గౌ-శ్శాంతి॑-ర॒జా-శాంతి॒-రశ్వ॒-శ్శాంతిః॒

పురు॑ష॒-శ్శాంతి॒-ర్బ్రహ్మ॒-శ్శాంతి॑-ర్బ్రాహ్మ॒ణ-శ్శాంతి॒-శ్శాంతి॑-రే॒వ

శాంతి-శ్శాంతి॑-ర్మే అస్తు॒ శాంతిః॑ .

తయా॒హగ్ం శాం॒త్యా స॑ర్వశాం॒త్యా మహ్యం॑ ద్వి॒పదే॒ చతు॑ష్పదే చ॒ శాంతిం॑ కరోమి

శాంతి॑ర్మే అస్తు॒ శాంతిః॑ ..

ఏహ॒ శ్రీశ్చ॒ హ్రీశ్చ॒ ధృతి॑శ్చ॒ తపో॑ మే॒ధా ప్ర॑తి॒ష్ఠా శ్ర॒ద్ధా స॒త్యం

ధర్మ॑శ్చై॒తాని॒ మోత్తి॑ష్ఠంత॒-మనూత్తి॑ష్ఠంతు॒ మా మా॒గ్॒ శ్రీశ్చ॒ హ్రీశ్చ॒

ధృతి॑శ్చ॒ తపో॑ మే॒ధా ప్ర॑తి॒ష్ఠా శ్ర॒ద్ధా స॒త్యం ధర్మ॑శ్చై॒తాని॑ మా॒

మా హా॑సిషుః .

ఉదాయు॑షా స్వా॒యుషోదోష॑ధీనా॒గ్ం॒ రసే॒నోత్ప॒ర్జన్య॑స్య॒

శుష్మే॒ణోద॑స్థామ॒మృతా॒గ్ం॒ అను॑ . తచ్చక్షు॑ర్దే॒వహి॑తం

పు॒రస్తా᳚చ్ఛు॒క్రము॒చ్చర॑త్ .

పశ్యే॑మ శ॒రద॑శ్శ॒తం జీవే॑మ శ॒రద॑శ్శ॒తం నందా॑మ శ॒రద॑శ్శ॒తం

మోదా॑మ శ॒రద॑శ్శ॒తం భవా॑మ శ॒రద॑శ్శ॒తగ్ం శృ॒ణవా॑మ

శ॒రద॑శ్శ॒తం ప్రబ్ర॑వామ శ॒రద॑శ్శ॒తమజీ॑తాస్స్యామ శ॒రద॑శ్శ॒తం

జ్యోక్చ॒ సూర్యం॑ దృ॒శే .

య ఉద॑గాన్మహ॒తోఽర్ణవా᳚ద్వి॒భ్రాజ॑మానస్సరి॒రస్య॒ మధ్యా॒థ్సమా॑ వృష॒భో

లో॑హితా॒క్షస్సూర్యో॑ విప॒శ్చిన్మన॑సా పునాతు ..

బ్రహ్మ॑ణ॒శ్చోత॑న్యసి॒ బ్రహ్మ॑ణ ఆ॒ణీస్థో॒ బ్రహ్మ॑ణ ఆ॒వప॑నమసి ధారి॒తేయం

పృ॑థి॒వీ బ్రహ్మ॑ణా మ॒హీ ధా॑రి॒తమే॑నేన మ॒హదం॒తరి॑క్షం॒ దివం॑ దాధార

పృథి॒వీగ్ం సదే॑వాం॒ యద॒హం వేద॒ తద॒హం ధా॑రయాణి॒ మామద్వేదోఽధి॒ విస్ర॑సత్ .

మే॒ధా॒మ॒నీ॒షే మావి॑శతాగ్ం స॒మీచీ॑ భూ॒తస్య॒ భవ్య॒స్యావ॑రుధ్యై॒

సర్వ॒మాయు॑రయాణి॒ సర్వ॒మాయు॑రయాణి .

ఆ॒భిర్గీ॒ర్భిర్యదతో॑న ఊ॒నమాప్యా॑యయ హరివో॒ వర్ధ॑మానః . య॒దా స్తో॒తృభ్యో॒

మహి॑ గో॒త్రా రు॒జాసి॑ భూయిష్ఠ॒భాజో॒ అధ॑ తే స్యామ . బ్రహ్మ॒ ప్రావా॑దిష్మ॒ తన్నో॒

మా హా॑సీత్ .. ఓం శాంతిః॒ శాంతిః॒ శాంతిః॑ ..

ఓం సం త్వా॑ సించామి॒ యజు॑షా ప్ర॒జామాయు॒ర్ధనం॑ చ .. ఓం శాంతిః॒ శాంతిః॒ శాంతిః॑

..

ఓం శం నో॑ మి॒త్రః శం వరు॑ణః . శం నో॑ భవత్వర్య॒మా . శం న॒ ఇంద్రో॒

బృహ॒స్పతిః॑ . శం నో॒ విష్ణు॑రురుక్ర॒మః . నమో॒ బ్రహ్మ॑ణే . నమ॑స్తే వాయో .

త్వమే॒వ ప్ర॒త్యక్షం॒ బ్రహ్మా॑సి .  త్వమే॒వ ప్ర॒త్యక్షం॒ బ్రహ్మ॑ వదిష్యామి . ఋ॒తం

వ॑దిష్యామి . స॒త్యం వ॑దిష్యామి . తన్మామ॑వతు . తద్వ॒క్తార॑మవతు . అవ॑తు॒ మాం .

అవ॑తు వ॒క్తారం᳚ .. ఓం శాంతిః॒ శాంతిః॒ శాంతిః॑ ..

ఓం తచ్ఛం॒ యోరావృ॑ణీమహే . గా॒తుం య॒జ్ఞాయ॑ . గా॒తుం య॒జ్ఞప॑తయే . దైవీ᳚

స్వ॒స్తిర॑స్తు నః . స్వ॒స్తిర్మాను॑షేభ్యః . ఊ॒ర్ధ్వం జి॑గాతు భేష॒జం . శం నో॑

అస్తు ద్వి॒పదే᳚ . శం చతు॑ష్పదే .. ఓం శాంతిః॒ శాంతిః॒ శాంతిః॑ ..

ఓం స॒హ నా॑వవతు . స॒హ నౌ॑ భునక్తు . స॒హ వీ॒ర్యం॑ కరవావహై .

తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ .. ఓం శాంతిః॒ శాంతిః॒ శాంతిః॑ ..

.. నారాయణోపనిషత్ ..

ఓం స॒హ నా॑వవతు . స॒హ నౌ॑ భునక్తు . స॒హ వీ॒ర్యం॑ కరవావహై .

తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ .. ఓం శాంతిః॒ శాంతిః॒ శాంతిః॑ ..

ఓం అథ పురుషో హ వై నారాయణోఽకామయత ప్రజాః సృ॑జేయే॒తి . నా॒రా॒య॒ణాత్ప్రా॑ణో

జా॒యతే . మనః సర్వేంద్రి॑యాణి॒ చ . ఖం వాయుర్జ్యోతిరాపః పృథివీ విశ్వ॑స్య ధా॒రిణీ .

నా॒రా॒య॒ణాద్-బ్ర॑హ్మా జా॒యతే . నా॒రా॒య॒ణాద్-రు॑ద్రో జా॒యతే . నా॒రా॒య॒ణాదిం॑ద్రో

జా॒యతే . నా॒రా॒య॒ణాత్ప్రజాపతయః ప్ర॑జాయం॒తే . నా॒రా॒య॒ణాద్ద్వాదశాదిత్యా రుద్రా

వసవస్సర్వాణి చ ఛం॑దాగ్ం॒సి . నా॒రా॒య॒ణాదేవ సము॑త్పద్యం॒తే . నా॒రా॒య॒ణే

ప్ర॑వర్తం॒తే . నా॒రా॒య॒ణే ప్ర॑లీయం॒తే ..

ఓం . అథ నిత్యో నా॑రాయ॒ణః . బ్ర॒హ్మా నా॑రాయ॒ణః . శి॒వశ్చ॑ నారాయ॒ణః .

శ॒క్రశ్చ॑ నారాయ॒ణః . ద్యా॒వా॒పృ॒థి॒వ్యౌ చ॑ నారాయ॒ణః . కా॒లశ్చ॑

నారాయ॒ణః . ది॒శశ్చ॑ నారాయ॒ణః . ఊ॒ర్ధ్వశ్చ॑ నారాయ॒ణః . అ॒ధశ్చ॑

నారాయ॒ణః . అం॒త॒ర్బ॒హిశ్చ॑ నారాయ॒ణః . నారాయణ ఏవే॑దగ్ం స॒ర్వం . యద్భూ॒తం

యచ్చ॒ భవ్యం᳚ . నిష్కలో నిరంజనో నిర్వికల్పో నిరాఖ్యాతః శుద్ధో దేవ ఏకో॑ నారాయ॒ణః

. న ద్వి॒తీయో᳚స్తి॒ కశ్చి॑త్ . య ఏ॑వం వే॒ద . స విష్ణురేవ భవతి స విష్ణురే॑వ

భ॒వతి ..

ఓమిత్య॑గ్రే వ్యా॒హరేత్ . నమ ఇ॑తి ప॒శ్చాత్ . నా॒రా॒య॒ణాయేత్యు॑పరి॒ష్టాత్ .

ఓమి॑త్యేకా॒క్షరం . నమ ఇతి॑ ద్వే అ॒క్షరే . నా॒రా॒య॒ణాయేతి పంచా᳚క్షరా॒ణి .

ఏతద్వై నారాయణస్యాష్టాక్ష॑రం ప॒దం . యో హ వై నారాయణస్యాష్టాక్షరం పద॑మధ్యే॒తి

. అనపబ్రవస్సర్వమా॑యురే॒తి . విందతే ప్రా॑జాప॒త్యగ్ం రాయస్పోషం॑ గౌప॒త్యం .

తతోఽమృతత్వమశ్నుతే తతోఽమృతత్వమశ్ను॑త ఇ॒తి . య ఏ॑వం వే॒ద ..

ప్రత్యగానందం బ్రహ్మ పురుషం ప్రణవ॑స్వరూ॒పం . అకార ఉకార మకా॑ర ఇ॒తి . తానేకధా

సమభరత్తదేత॑దోమి॒తి . యముక్త్వా॑ ముచ్య॑తే యో॒గీ॒ జ॒న్మ॒సంసా॑రబం॒ధనాత్

. ఓం నమో నారాయణాయేతి మం॑త్రోపా॒సకః . వైకుంఠభువనలోకం॑ గమి॒ష్యతి .

తదిదం పరం పుండరీకం వి॑జ్ఞాన॒ఘనం . తస్మాత్తదిదా॑వన్మా॒త్రం . బ్రహ్మణ్యో

దేవ॑కీపు॒త్రో॒ బ్రహ్మణ్యో మ॑ధుసూ॒దనోం . సర్వభూతస్థమేకం॑ నారా॒యణం .

కారణరూపమకార ప॑రబ్ర॒హ్మోం . ఏతదథర్వ శిరో॑యోఽధీ॒తే ప్రా॒తర॑ధీయా॒నో॒

రాత్రికృతం పాపం॑ నాశ॒యతి . సా॒యమ॑ధీయా॒నో॒ దివసకృతం పాపం॑ నాశ॒యతి .

మాధ్యందినమాదిత్యాభిముఖో॑ఽధీయా॒నః॒ పంచపాతకోపపాతకా᳚త్ప్రము॒చ్యతే . సర్వ వేద

పారాయణ పు॑ణ్యం ల॒భతే . నారాయణసాయుజ్యమ॑వాప్నో॒తి॒ నారాయణ సాయుజ్యమ॑వాప్నో॒తి .

య ఏ॑వం వే॒ద . ఇత్యు॑ప॒నిష॑త్ ..

ఓం శాంతిః॒ శాంతిః॒ శాంతిః॑ ..

.. ఘోష శాంతిః ..

ఓం మి॒త్రో॑ఽసి॒ వరు॑ణోఽసి . సమ॒హం విశ్వై᳚ర్దే॒వైః . క్ష॒త్రస్య॒ నాభి॑రసి .

క్ష॒త్రస్య॒ యోని॑రసి . స్యో॒నామాసీ॑ద . సు॒షదా॒మాసీ॑ద . మా త్వా॑ హిగ్ంసీత్ . మా మా॑

హిగ్ంసీత్ . నిష॑సాద ధృ॒తవ్ర॑తో॒ వరు॑ణః . ప॒స్త్యా᳚స్వా . సామ్రా᳚జ్యాయ సు॒క్రతుః॑

. దే॒వస్య॑ త్వా సవి॒తుః ప్ర॑స॒వే . అ॒శ్వినో᳚ర్బా॒హుభ్యాం᳚ . పూ॒ష్ణో హస్తా᳚భ్యాం .

అ॒శ్వినో॒ర్భైష॑జ్యేన . తేజ॑సే బ్రహ్మవర్చ॒సాయా॒భిషిం॑చామి . దే॒వస్య॑ త్వా

సవి॒తుః ప్ర॑స॒వే . అ॒శ్వినో᳚ర్బా॒హుభ్యాం᳚ . పూ॒ష్ణో హస్తా᳚భ్యాం . సర॑స్వత్యై॒

భైష॑జ్యేన . వీ॒ర్యా॑యా॒న్నాద్యా॑యా॒భిషిం॑చామి ..

దే॒వస్య॑ త్వా సవి॒తుః ప్ర॑స॒వే . అ॒శ్వినో᳚ర్బా॒హుభ్యాం᳚ . పూ॒ష్ణో హస్తా᳚భ్యాం .

ఇంద్ర॑స్యేంద్రి॒యేణ॑ . శ్రి॒యై యశ॑సే॒ బలా॑యా॒భిషిం॑చామి .. అ॒ర్య॒మణం॒

బృహ॒స్పతి॒మింద్రం॒ దానా॑య చోదయ . వాచం॒ విష్ణు॒గ్ం॒ సర॑స్వతీగ్ం

సవి॒తారం॑ చ వా॒జినం᳚ . సోమ॒గ్ం॒ రాజా॑నం॒ వరు॑ణమ॒గ్నిమ॒న్వార॑భామహే .

ఆ॒ది॒త్యాన్, విష్ణు॒గ్ం॒ సూర్యం॑ బ్ర॒హ్మాణం॑ చ॒ బృహ॒స్పతిం᳚ . దే॒వస్య॑ త్వా

సవి॒తుః ప్ర॑స॒వే᳚ఽశ్వినో᳚ర్బా॒హుభ్యాం᳚ పూ॒ష్ణో హస్తా᳚భ్యా॒గ్ం॒ సర॑స్వత్యై

వా॒చోయం॒తుర్యం॒త్రేణా॒గ్నేస్త్వా॒ సామ్రా᳚జ్యేనా॒భిషిం॑చా॒మీంద్ర॑స్యత్వా॒

సామ్రా᳚జ్యేనా॒భిషిం॑చామి॒ బృహ॒స్పతే᳚స్త్వా॒ సామ్రా᳚జ్యేనా॒భిషిం॑చామి ..

దే॒వాస్త్వేంద్ర॑జ్యేష్ఠా॒ వరు॑ణరాజానో॒ఽధస్తా᳚చ్చో॒ పరి॑ష్టాచ్చపాంతు॒ న వా

ఏ॒తేన॑ పూ॒తో న మేధ్యో॒ న ప్రోక్షి॑తో॒యదే॑న॒మతః॑ ప్రా॒చీనం॑ ప్రో॒క్షతి॒

యత్సంచి॑త॒మాజ్యే॑న ప్రో॒క్షతి॒ తేన॑ పూ॒తస్తేన॒ మేధ్య॒స్తేన॒ ప్రోక్షి॑తః ..

వస॑వస్త్వా పు॒రస్తా॑ద॒భిషిం॑చంతు గాయ॒త్రేణ॒ ఛంద॑సా .

రు॒ద్రాస్త్వా॑ దక్షిణ॒తో॑ఽభిషిం॑చంతు॒ త్రైష్టు॑భేన॒ ఛంద॑సా

. ఆ॒ది॒త్యాస్త్వా॑ ప॒శ్చాద॒భిషిం॑చంతు॒ జాగ॑తేన॒ ఛంద॑సా .

విశ్వే᳚త్వా దే॒వా ఉ॑త్తర॒తో॑ఽభిషిం॑చం॒త్వాను॑ష్టుభేన॒ ఛంద॑సా .

బృహ॒స్పతి॑స్త్వో॒పరి॑ష్టాద॒భిషిం॑చతు॒ పాంక్తే॑న॒ ఛంద॑సా ..

ఇ॒మాగ్ం రు॒ద్రాయ॑ స్థి॒రధ॑న్వనే॒ గిరః॑ . క్షి॒ప్రేష॑వే దే॒వాయ॑ స్వ॒ధామ్నే᳚

.. అషా॑ఢాయ॒ సహ॑మానాయ మీ॒ఢుషే᳚ . తి॒గ్మాయు॑ధాయ భరతాశృ॒ణోత॑న .

త్వాద॑త్తేభీరుద్ర॒ శంత॑మేభిః . శ॒తగ్ం హి మా॑ అశీయ భేష॒జేభిః॑ . వ్య॑స్మద్ద్వేషో॑

విత॒రంవ్యగ్ంహః॑ . వ్యమీ॑వాగ్శ్చాతయస్వా॒ విషూ॑చీః ..

అర్హ॑న్బిభర్షి॒ సాయ॑కాని॒ధన్వ॑ . అర్హ॑న్ని॒ష్కం య॑జ॒తం వి॒శ్వరూ॑పం .

అర్హ॑న్ని॒దంద॑యసే॒ విశ్వమ॒బ్భు॑వం . న వా ఓజీ॑యో రుద్ర॒ త్వద॑స్తి ..

మా న॑స్తో॒కే తన॑యే॒ మా న॒ ఆయు॑షి॒ మా నో॒ గోషు॒ మా నో॒ అశ్వే॑షు రీరిషః .

వీ॒రాన్మానో॑ రుద్ర భామి॒తో వ॑ధీర్హ॒విష్మం॑తో॒ నమ॑సా విధేమ తే ..

ఆ తే॑ పితర్మరుతాగ్ం సు॒మ్నమే॑తు . మా న॒స్సూర్య॑స్య సం॒దృశో॑ యుయోథాః . అ॒భి

నో॑ వీ॒రో అర్వ॑తి క్షమేత . ప్రజా॑యేమహి రుద్ర ప్ర॒జాభిః॑ . ఏ॒వా బ॑భ్రో వృషభ

చేకితాన . యథా॑ దేవ॒ న హృ॑ణీ॒షే న హగ్ంసి॑ . హా॒వ॒న॒శ్రూర్నో॑రుద్రే॒హ బో॑ధి

. బృ॒హద్వ॑దేమ వి॒దథే॑ సు॒వీరాః᳚ ..

పరి॑ణో రు॒ద్రస్య॑ హే॒తిర్వృ॑ణక్తు॒ పరి॑త్వే॒షస్య॑ దుర్మ॒తి ర॑ఘా॒యోః . అవ॑

స్థి॒రా మ॒ఘవ॑ద్భ్యస్తనుష్వ॒ మీఢ్వ॑స్తో॒కాయ॒ తన॑యాయ మృడయ ..

స్తు॒హి శ్రు॒తం గ॑ర్త॒సదం॒ యువా॑నం మృ॒గం న భీ॒మము॑పహ॒త్నుము॒గ్రం .

మృ॒డా జ॑రి॒త్రే రు॑ద్ర॒ స్తవా॑నో అ॒న్యం తే॑ అ॒స్మన్నివ॑పంతు॒ సేనాః᳚ ..

మీఢు॑ష్టమ॒ శివ॑తమ శి॒వో నః॑ సు॒మనా॑ భవ . ప॒ర॒మే వృ॒క్ష

ఆయు॑ధన్ని॒ధాయ॒ కృత్తిం॒ వసా॑న॒ ఆచ॑ర॒ పినా॑కం॒ బిభ్ర॒దాగ॑హి ..

అర్హ॑న్బిభర్షి॒ సాయ॑కాని॒ ధన్వ॑ . అర్హ॑న్ని॒ష్కం య॑జ॒తం వి॒శ్వరూ॑పం .

అర్హ॑న్ని॒దం ద॑యసే॒ విశ్వ॒మబ్భు॑వం . న వా ఓజీ॑యో రుద్ర॒త్వద॑స్తి ..

త్వమ॑గ్నే రు॒ద్రో అసు॑రో మ॒హో ది॒వస్త్వగ్ం శర్ధో॒ మారు॑తం పృ॒క్ష ఈ॑శిషే .

త్వం వాతై॑రరు॒ణైర్యా॑సి శంగ॒యస్త్వం పూ॒షా వి॑ధ॒తః పా॑సి॒ నుత్మనా᳚ .

ఆవో॒ రాజా॑నమ॒ధ్వరస్య॑ రు॒ద్రగ్ం హోతా॑రగ్ం సత్య॒యజ॒గ్ం॒ రోద॑స్యోః . అ॒గ్నిం

పు॒రాత॑నయి॒త్నోర॒చిత్తా॒ద్ధిర॑ణ్యరూప॒మవ॑సే కృణుధ్వం ..

ఓం శాంతిః॒ శాంతిః॒ శాంతిః॑ ..

.. శాంతిమంత్రాః ..

.. ఓం శ్రీ గురుభ్యో నమః హరిః ఓం ..

ఓం స॒హ నా॑వవతు . స॒హ నౌ॑ భునక్తు . స॒హ వీ॒ర్యం॑ కరవావహై .

తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ .. ఓం శాంతిః॒ శాంతిః॒ శాంతిః॑ ..

ఓం యశ్ఛంద॑సామృష॒భో వి॒శ్వరూ॑పః . ఛందో॒భ్యోఽధ్య॒మృతా᳚థ్సంబ॒భూవ॑

. స మేంద్రో॑ మే॒ధయా᳚ స్పృణోతు . అ॒మృత॑స్య దేవ॒ధార॑ణో భూయాసం . శరీ॑రం

మే॒ విచ॑ర్షణం . జి॒హ్వా మే॒ మధు॑మత్తమా . కర్ణా᳚భ్యాం॒ భూరి॒విశ్రు॑వం .

బ్రహ్మ॑ణః కో॒శో॑ఽసి మే॒ధయా పి॑హితః . శ్రు॒తం మే॑ గోపాయ . ఓం శాంతిః॒

శాంతిః॒ శాంతిః॑ .. ఓం వాఙ్మే॒ మన॑సి॒ ప్రతి॑ష్ఠితా॒ మనో॑ మే॒ వాచి॒

ప్రతి॑ష్ఠితమా॒విరా॒వీర్మ॑ ఏధి వే॒దస్య మ॒ ఆణీ᳚స్థః శ్రు॒తం మే॒ మా

ప్రహా॑సీర॒నేనా॒ధీతే॑నాహోరా॒త్రాన్ సంద॑ధామ్యృ॒తం వ॑దిష్యామి స॒త్యం వ॑దిష్యామి॒

తన్మామ॑వతు॒ తద్వ॒క్తార॑మవ॒త్వవ॑తు॒ మామవ॑తు వ॒క్తార॒మవ॑తు వ॒క్తారం᳚ ..

ఓం శాంతిః॒ శాంతిః॒ శాంతిః॑ .. ఓం ఆప్యాయంతు మమాంగాని వాక్ప్రాణశ్చక్షుః శ్రోత్రమథో

బలమింద్రియాణి చ సర్వాణి . సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా

బ్రహ్మ నిరాకరోదనిరాకరణమస్త్వనిరాకరణం మేఽస్తు . తదాత్మని నిరతే య ఉపనిషత్సు

ధర్మాస్తే మయి సంతు తే మయి సంతు .. ఓం శాంతిః॒ శాంతిః॒ శాంతిః॑ .. ఓం భ॒ద్రం

కర్ణే॑భిః శృణు॒యామ॑ దేవాః . భ॒ద్రం ప॑శ్యేమా॒క్షభి॒ర్యజ॑త్రాః .

స్థి॒రైరంగై᳚స్తుష్టు॒వాగ్ంస॑స్త॒నూభిః॑ . వ్యశే॑మ దే॒వహి॑తం॒ యదాయుః॑

. స్వ॒స్తి న॒ ఇంద్రో॑ వృ॒ద్ధశ్ర॑వాః . స్వ॒స్తి నః॑ పూ॒షా వి॒శ్వవే॑దాః .

స్వ॒స్తి న॒స్తార్క్ష్యో॒ అరి॑ష్టనేమిః . స్వ॒స్తి నో॒ బృహ॒స్పతి॑ర్దధాతు .. ఓం శాంతిః॒

శాంతిః॒ శాంతిః॑ .. ఓం పూర్ణ॒మదః॒ పూర్ణ॒మిదం॒ పూర్ణా॒త్పూర్ణ॒ముద॒చ్యతే . పూర్ణ॒స్య

పూర్ణ॒మాదా॒య పూర్ణ॒మేవావశి॒ష్యతే .. ఓం శాంతిః॒ శాంతిః॒ శాంతిః॒ ..