అఘోరమూర్తిస్తోత్రం

ఓం శ్రీగణేశాయ నమః .

శ్రీభైరవ ఉవాచ-

కైలాశశిఖరాసీనం భక్తానుగ్రహకామ్యయా .

పప్రచ్ఛ ప్రణతా దేవీ భైరవం విగతామయం .. 1..

బ్రహ్మాదికారణాతీతం స్వశక్త్యా నందినిర్భరం .

నమామి పరమేశానం స్వచ్ఛందం వీరనాయకం .. 2..

శ్రీదేవీ ఉవాచ-

ప్రాయశ్చిత్తేషు సర్వేషు సమయోల్లంఘనేషు చ .

మహాభయేషు ఘోరేషు తీవ్రోపద్రవభూమిషు .. 3..

ఛిద్రస్థానేషు సర్వేషు ఉపాయం వద మే ప్రభో .

యేనాయాసేన రహితో నిర్దోషశ్చ భవేన్నరః .. 4..

శ్రీభైరవ ఉవాచ -

శృణు  దేవి పరం గుహ్యం రహస్యం పరమాద్భుతం .

సర్వపాపప్రశమనం సర్వదుఃఖాభయప్రదం .. 5..

ప్రాయశ్చిత్తేషు సర్వేషు తీవ్రేష్వపి విశోధనం .

సర్వచ్ఛిద్రాపహరణం సర్వార్తివినివారణం .. 6..

సమయోల్లంఘనే ఘోరే జపాదేవ విమోచనం .

భోగమోక్షప్రదం చైవ సర్వసిద్ధిఫలావహం .. 7..

శతం జాప్యేన శుద్ధ్యంతి మహాపాతకినోఽపి యే .

తదర్ద్ధం పాతకం హంతి తత్పాదేనోపపాతకం .. 8..

కాయికం వాచికం చైవ మానసం స్పర్శదోషజం .

ప్రసాదాదిచ్ఛయా వాపి సకృజ్జపేన శుద్ధ్యతి .. 6..

యాగారంభే చ యాగాంతే పఠితవ్యం ప్రయత్నతః .

నిత్యే నైమిత్తకే కామ్యే పరస్యాప్యాత్మనోఽపి వా .. 10..

నిఛిద్రకరణం ప్రోక్తమభావపరిపూరకం .

ద్రవ్యహీనే మంత్రహీనే జ్ఞానయోగవివర్జితే .. 11..

భక్తిశ్రద్ధావిరహితే శుద్ధిశూన్యే విశేషతః .

మనోవిక్షేపదోషే చ విలోమే పశువీక్షితే .. 12..

విధిహీనే ప్రమాదే చ జప్తవ్యం సర్వకర్మసు .

నాతః పరతరో మంత్రో నాతః పరతరా స్తుతిః .. 13..

నాతః పరతరా కాచిత్సమ్యక్ సత్యం గిరా ప్రియే .

ఇయం సమయవిద్యానాం రాజరాజేశ్వరీ స్తుతిః .. 14..

పరమాప్యాయనం దేవి భైరవస్య ప్రకీర్తితం .

ప్రీణనం సర్వదేవానాం సర్వసౌభాగ్యవర్ధనం .. 15..

స్తవరాజమిమం పుణ్యం శృణుష్వావహితా ప్రియే .

ఓం నమః పరమాకాశశాయినే పరమాత్మనే .. 16..

శివాయ పరమం శాంతం గిరానందపదాయ తే .

అవాచ్యాయ ప్రమేయాయ ప్రమాత్రే విశ్వహేతవే .. 17..

మహాసామాన్యరూపాయ సత్తామాత్రైకరూపిణే .

ఘోషాదిదశధా శబ్దబీజభూతాయ శంభవే .. 18..

నమః శాంతోగ్రఘోరాది మంత్రసంరంభగర్భిణే .

రేవతీస్రజ విశ్రంభ సమాశ్లేషవిలాసినే .. 16..

నమః సమరసాస్వాదపరానందోపభోగినే .

భోగపాణయే నమస్తుభ్యం యోగీశ పూజితాత్మనే .. 20..

ద్వయనిర్మూలనోద్యోగసముల్లాసితమూర్తయే .

హరప్రసరవిక్షోభవిస్పష్టాక్షరమూర్త్తయే .. 21..

నమో మాయాస్వరూపాయ స్థాణవే పరమేష్ఠినే .

ఘోరసంసారసంభోగదాయినే స్థితికారిణే .. 22..

కాలాది క్షితిపర్యంతం పాలినే విభవే నమః .

రోహణాయ మహామోహధ్వాంతవిధ్వంసహేతవే .. 23..

హృదయాంబుజసంకోచభేదినే శివ మానవే .

భోగమోక్షఫలప్రాప్తిహేతుయోగవిధాయినే .. 24..

నమః పరమనిర్వాణదాయినే చంద్రమౌలయే .

ఘోష్యాయ సర్వమంత్రాణాం సర్వవాఙ్మయమూర్తయే .. 25..

నమః శర్వాయ సర్వాయ సర్వపాపాపహారిణే .

రవణాయ రవాంతాయ నమోఽతరావరావిణే .. 26..

నిత్యాయ సుప్రబుద్ధాయ సర్వాంతరతమాయ తే .

ఘోషాయ పరనాదాంతచరాయ ఖచరాయ తే .. 27..

నమో వాక్పతయే తుభ్యం భగాయ పరరూపిణే .

రవణాయ రతీశార్ఙ్గదేహినే చిత్రకర్మణే .. 28..

నమః శైలసుతామాత్రే విశ్వకర్త్రే మహాత్మనే .

నమో మారప్రతిష్ఠాయ సర్వంతిపదగాయ తే .. 26..

నమః సమస్తతత్త్వాయ వ్యాపినే చిత్స్వరూపిణే .

ఖేద్వారాయ భద్రాయ నమస్తే రూపరూపిణే .. 30..

పరాపరపరిస్పందమందిరాయ నమోఽస్తు తే .

భరితాఖిలవిశ్వాయ యోగగమ్యాయ యోగినే .. 31..

నమః సర్వేశ్వరేశాయ మహాహంసాయ శంభవే .

చర్వ్యాయ చర్వణీయాయ చర్వకాయ చరాయ చ .. 32..

రవీందుసంధిసంస్థాయ మహాచక్రేశ తే నమః .

సర్వానుస్యూతరూపాయ సర్వాచ్ఛాదకశక్తయే .. 33..

సర్వభక్షాయ శర్వాయ నమస్తే సర్వరూపిణే .

రమ్యాయ వల్లభాక్రాంతదేహార్ధాయ వినోదినే .. 34..

నమః ప్రసన్నదుష్ప్రాపసౌభాగ్యఫలదాయినే .

తన్మహేశాయ తత్త్వాయ వేదినే భవభేదినే .. 35..

మహాభైరవనాథాయ భక్తిగమ్యాయ తే నమః .

శక్తిగర్భప్రబోధాయ శరణ్యాయ శరీరిణే .. 36..

శాంతిపుష్ట్యాదిసాధ్యాయ సాధకాయ నమో నమః .

రవత్కుండలినీగర్భప్రబోధప్రాప్తశక్తయే .. 37..

తత్స్ఫోటనపటుప్రౌఢపరమాక్షరరూపిణే .

సమస్తవ్యస్తసంగ్రస్తరశ్మిజాలోదయాత్మనే .. 38..

నమస్తుభ్యం మహాసేనరూపిణే విశ్వగర్భిణే .

రేవారవసముద్భూతవహ్నిజ్వాలావభాసినే .. 36..

ఘనీభూతవికల్పాంధ్యవిశ్వబంధవిలాపినే .

భోగినీస్పందనారూఢప్రౌఢమాలబ్ధగర్విణే .. 40..

నమస్తే సర్వభక్షాయ పరమామృతలోభినే .

నభకోటిసమావేశభరితాఖిలసృష్టయే  .. 41..

నమః శక్తిశరీరాయ కోటిద్వితయసంగినే .

మహామోహసమాక్రాంతజీవవర్గవిబోధినే .. 42..

మహేశ్వరాయ జగతాం నమః కారణబంధవే .

స్తేనోన్మూలనదక్షైకత్రితయే విశ్వమూర్త్తయే .. 43..

నమస్తేఽస్తు మహాదేవనామ్నే పరసుధాత్మనే .

రుగ్ద్రావిణే మహావీర్య రురువంశవినాశినే .. 44..

రుద్రాయ ద్రావితాశేషబంధనాయ నమో నమః .

ద్రవత్యరరసాస్వాదచర్వణోద్యుక్తయే నమః .. 45..

నమస్త్రిదశపూజ్యాయ సర్వకారణహేతవే .

రూపాతీత నమస్తుభ్యం నమస్తే బహురూపిణే .. 46..

త్ర్యంబకాయ త్రిధా మాతశ్చారిణే చ త్రిచక్షుషే .

పేశలోపాయలభ్యాయ భక్తిభాజాం మహాత్మనాం .. 47..

దుర్లభాయ మహాక్రాంతచేతసాం తు నమో నమః .

భయప్రదాయ దుష్టానాం భవాయ భయభేదినే .. 48..

భవ్యాయ త్వన్మయానాం తు సర్వదాయ నమో నమః .

అణూనాం ముక్తయే ఘోరఘోరసంసారదాయినే .. 46..

ఘోరాతిఘోరమూఢానాం తిరస్కర్త్రే నమోఽస్తు తే .

ఇత్యేవం స్తోత్రరాజేంద్రం మహాభైరవభాషితం .. 50..

యోగినీనాం పరం సారం న దద్యాద్యస్య కస్యాచిత్ .

అదీక్షితే శఠే  క్రూరే నిస్సత్యే శుచివర్జితే .. 51..

నాస్తికే చ ఖలే మూర్ఖే ప్రమత్తే విలుప్తేఽలసే .

గురుశాస్త్రసదాచారదూషకే కలహప్రియే .. 52..

నిర్దయే చుంబకే క్షుద్రే సమయఘ్నేఽథ దాంభికే .

దాక్షిణ్యరహితే పాపే ధర్మహీనేఽథ గర్వితే .. 53..

పశూనాం సన్నిధౌ దేవి నోచ్చార్యం సర్వథా క్వచిత్ .

అస్య సంస్మృతమాత్రస్య విఘ్నా నశ్యంతి సర్వశః .. 54..

గుహ్యకా యాతుధానాశ్చ వేతాలా రాక్షసాదయః .

డామరాశ్చ పిశాచాశ్చ క్రూరసత్త్వాశ్చ పూతనాః .. 55..

బ్యాధిదుర్భిక్షదౌర్భాగ్యమారిమోహవిషాదయః .

గజవ్యాఘ్రాదయో దుష్టాః పలాయంతే చ సర్వశః .

సర్వే దుష్టాః ప్రణశ్యంతి ఇత్యాజ్ఞా పారమేశ్వరీ .. 56..

.. ఇతి అఘోరస్తోత్రం సమాప్తం ..

.. శుభమస్తు ..