రాత్రిసూక్తాత్మకం దేవీస్తోత్రం

శ్రీగణేశాయ నమః ..

రాత్రిదేవీం ప్రపద్యేఽహం శరణాగతవత్సలాం .

కరాలవదనాం కృష్ణాం దుష్టగ్రహవినాశినీం .. 1..

నమామి ఖడ్గహస్తాం తాం ఖేటహస్తాం భయానకాం .

వరదాభయహస్తాం చ భక్తలోకభయాపహాం .. 2..

శూలహస్తాం శంఖచక్రగదాచాపేషుధారిణీం .

చతుర్భుజామష్టభుజాం ద్విభుజామరిమర్దినీం .. 3..

అష్టాదశభుజాం లక్ష్మీం దశహస్తాం సరస్వతీం .

సర్వసంపత్ప్రదాత్రీం చ సర్వవిద్యాప్రదాయినీం .. 4..

సహస్రబాహుచరణాం సహస్రముఖలోచనాం .

సహస్రముకుటోపేతాం సహస్రచరణాంబుజాం .. 5..

పద్మయోనిముఖాబ్జస్థాం విష్ణువక్షఃస్థలస్థితాం .

శివాంకనిలయాం గౌరీం వందే మూర్తిత్రయాత్మికాం .. 6..

ఆర్భట్యా వైష్ణవీ చోగ్రా కులాని విబుధద్విషాం .

యా నిర్దహతి రక్తాక్షీ తాం వందే సింహవాహనాం .. 7..

మధుకైటభసంహారం మహిషాసురమర్దనం .

యాఽకరోన్నౌమి దుర్గాం తాం వధం శుంభనిశుంభయోః .. 8..

ఇంద్రాదిసర్వదేవానాం సూర్యాదిజ్యోతిషామపి .

సర్వశక్తిస్వరూపా యా రాత్రీం తాం ప్రణమామ్యహం .. 9..

రాత్రిసూక్తం జపేద్రాత్రౌ త్రివారం చ దినే దినే .

భూతప్రేతపిశాచాదిచోరసర్పాదినాశనం .. 10..

ఇతి శ్రీరాత్రిసూక్తాత్మకదేవీస్తోత్రం సంపూర్ణం ..