మన్యుసూక్తం

ఋగ్వేదసంహితాయాం దశమం మండలం, 83 త్ర్యశీతితమం సూక్తం,

ఋషిః మన్యుస్తాపసః, దేవతా మన్యుః, ఛందః 1 విరాడ్జగతీ, 2 త్రిష్టుప్,

3, 6 విరాట్త్రిష్టుప్, 4 పాదనిచృత్త్రిష్టుప్, 5, 7 నిచృత్త్రిష్టుప్,

స్వరః 1 నిషాదః, 2-7 ధైవతః ..

ఋగ్వేదసంహితాయాం దశమం మండలం, 84 చతురశీతితమం సూక్తం,

ఋషిః మన్యుస్తాపసః, దేవతా మన్యుః, ఛందః 1, 3 త్రిష్టుప్, 2 భురిక్త్రిష్టుప్,

4, 5 పాదనిచృజ్జగతీ, 6 ఆర్చీస్వరాడ్జగతీ, 7 విరాడ్జగతీ,

స్వరః 1-3 ధైవతః, 4-7 నిషాదః ..

యస్తే॑ మ॒న్యోఽవి॑ధద్వజ్ర సాయక॒ సహ॒ ఓజః॑ పుష్యతి॒ విశ్వ॑మాను॒షక్ .

సా॒హ్యామ॒ దాస॒మార్యం॒ త్వయా॑ యు॒జా సహ॑స్కృతేన॒ సహ॑సా॒ సహ॑స్వతా .. 10.083.01

మ॒న్యురింద్రో॑ మ॒న్యురే॒వాస॑ దే॒వో మ॒న్యుర్హోతా॒ వరు॑ణో జా॒తవే॑దాః .

మ॒న్యుం విశ॑ ఈళతే॒ మాను॑షీ॒ర్యాః పా॒హి నో॑ మన్యో॒ తప॑సా స॒జోషాః॑ .. 10.083.02

అ॒భీ॑హి మన్యో త॒వస॒స్తవీ॑యాం॒తప॑సా యు॒జా వి జ॑హి॒ శత్రూ॑న్ .

అ॒మి॒త్ర॒హా వృ॑త్ర॒హా ద॑స్యు॒హా చ॒ విశ్వా॒ వసూ॒న్యా భ॑రా॒ త్వం నః॑ .. 10.083.03

త్వం హి మ॑న్యో అ॒భిభూ॑త్యోజాః స్వయం॒భూర్భామో॑ అభిమాతిషా॒హః .

వి॒శ్వచ॑ర్షణిః॒ సహు॑రిః॒ సహా॑వాన॒స్మాస్వోజః॒ పృత॑నాసు ధేహి .. 10.083.04

అ॒భా॒గః సన్నప॒ పరే॑తో అస్మి॒ తవ॒ క్రత్వా॑ తవి॒షస్య॑ ప్రచేతః .

తం త్వా॑ మన్యో అక్ర॒తుర్జి॑హీళా॒హం స్వా త॒నూర్బ॑ల॒దేయా॑య॒ మేహి॑ .. 10.083.05

అ॒యం తే॑ అ॒స్మ్యుప॒ మేహ్య॒ర్వాఙ్ప్ర॑తీచీ॒నః స॑హురే విశ్వధాయః .

మన్యో॑ వజ్రిన్న॒భి మామా వ॑వృత్స్వ॒ హనా॑వ॒ దస్యూ॑ఀరు॒త బో॑ధ్యా॒పేః .. 10.083.06

అ॒భి ప్రేహి॑ దక్షిణ॒తో భ॑వా॒ మేఽధా॑ వృ॒త్రాణి॑ జంఘనావ॒ భూరి॑ .

జు॒హోమి॑ తే ధ॒రుణం॒ మధ్వో॒ అగ్ర॑ము॒భా ఉ॑పాం॒శు ప్ర॑థ॒మా పి॑బావ .. 10.083.07

త్వయా॑ మన్యో స॒రథ॑మారు॒జంతో॒ హర్ష॑మాణాసో ధృషి॒తా మ॑రుత్వః .

తి॒గ్మేష॑వ॒ ఆయు॑ధా సం॒శిశా॑నా అ॒భి ప్ర యం॑తు॒ నరో॑ అ॒గ్నిరూ॑పాః .. 10.084.01

అ॒గ్నిరి॑వ మన్యో త్విషి॒తః స॑హస్వ సేనా॒నీర్నః॑ సహురే హూ॒త ఏ॑ధి .

హ॒త్వాయ॒ శత్రూ॒న్వి భ॑జస్వ॒ వేద॒ ఓజో॒ మిమా॑నో॒ వి మృధో॑ నుదస్వ .. 10.084.02

సహ॑స్వ మన్యో అ॒భిమా॑తిమ॒స్మే రు॒జన్మృ॒ణన్ప్ర॑మృ॒ణన్ప్రేహి॒ శత్రూ॑న్ .

ఉ॒గ్రం తే॒ పాజో॑ న॒న్వా రు॑రుధ్రే వ॒శీ వశం॑ నయస ఏకజ॒ త్వం .. 10.084.03

ఏకో॑ బహూ॒నామ॑సి మన్యవీళి॒తో విశం॑విశం యు॒ధయే॒ సం శి॑శాధి .

అకృ॑త్తరు॒క్త్వయా॑ యు॒జా వ॒యం ద్యు॒మంతం॒ ఘోషం॑ విజ॒యాయ॑ కృణ్మహే .. 10.084.04

వి॒జే॒ష॒కృదింద్ర॑ ఇవానవబ్ర॒వో॒3॒॑ఽస్మాకం॑ మన్యో అధి॒పా భ॑వే॒హ .

ప్రి॒యం తే॒ నామ॑ సహురే గృణీమసి వి॒ద్మా తముత్సం॒ యత॑ ఆబ॒భూథ॑ .. 10.084.05

ఆభూ॑త్యా సహ॒జా వ॑జ్ర సాయక॒ సహో॑ బిభర్ష్యభిభూత॒ ఉత్త॑రం .

క్రత్వా॑ నో మన్యో స॒హ మే॒ద్యే॑ధి మహాధ॒నస్య॑ పురుహూత సం॒సృజి॑ .. 10.084.06

సంసృ॑ష్టం॒ ధన॑ము॒భయం॑ స॒మాకృ॑తమ॒స్మభ్యం॑ దత్తాం॒ వరు॑ణశ్చ మ॒న్యుః .

భియం॒ దధా॑నా॒ హృద॑యేషు॒ శత్ర॑వః॒ పరా॑జితాసో॒ అప॒ ని ల॑యంతాం .. 10.084.07

స్వరరహితం .

యస్తే మన్యోఽవిధద్వజ్ర సాయక సహ ఓజః పుష్యతి విశ్వమానుషక్ .

సాహ్యామ దాసమార్యం త్వయా యుజా సహస్కృతేన సహసా సహస్వతా .. 10.083.01

మన్యురింద్రో మన్యురేవాస దేవో మన్యుర్హోతా వరుణో జాతవేదాః .

మన్యుం విశ ఈళతే మానుషీర్యాః పాహి నో మన్యో తపసా సజోషాః .. 10.083.02

అభీహి మన్యో తవసస్తవీయాంతపసా యుజా వి జహి శత్రూన్ .

అమిత్రహా వృత్రహా దస్యుహా చ విశ్వా వసూన్యా భరా త్వం నః .. 10.083.03

త్వం హి మన్యో అభిభూత్యోజాః స్వయంభూర్భామో అభిమాతిషాహః .

విశ్వచర్షణిః సహురిః సహావానస్మాస్వోజః పృతనాసు ధేహి .. 10.083.04

అభాగః సన్నప పరేతో అస్మి తవ క్రత్వా తవిషస్య ప్రచేతః .

తం త్వా మన్యో అక్రతుర్జిహీళాహం స్వా తనూర్బలదేయాయ మేహి .. 10.083.05

అయం తే అస్మ్యుప మేహ్యర్వాఙ్ప్రతీచీనః సహురే విశ్వధాయః .

మన్యో వజ్రిన్నభి మామా వవృత్స్వ హనావ దస్యూఀరుత బోధ్యాపేః .. 10.083.06

అభి ప్రేహి దక్షిణతో భవా మేఽధా వృత్రాణి జంఘనావ భూరి .

జుహోమి తే ధరుణం మధ్వో అగ్రముభా ఉపాంశు ప్రథమా పిబావ .. 10.083.07

త్వయా మన్యో సరథమారుజంతో హర్షమాణాసో ధృషితా మరుత్వః .

తిగ్మేషవ ఆయుధా సంశిశానా అభి ప్ర యంతు నరో అగ్నిరూపాః .. 10.084.01

అగ్నిరివ మన్యో త్విషితః సహస్వ సేనానీర్నః సహురే హూత ఏధి .

హత్వాయ శత్రూన్వి భజస్వ వేద ఓజో మిమానో వి మృధో నుదస్వ .. 10.084.02

సహస్వ మన్యో అభిమాతిమస్మే రుజన్మృణన్ప్రమృణన్ప్రేహి శత్రూన్ .

ఉగ్రం తే పాజో నన్వా రురుధ్రే వశీ వశం నయస ఏకజ త్వం .. 10.084.03

ఏకో బహూనామసి మన్యవీళితో విశంవిశం యుధయే సం శిశాధి .

అకృత్తరుక్త్వయా యుజా వయం ద్యుమంతం ఘోషం విజయాయ కృణ్మహే .. 10.084.04

విజేషకృదింద్ర ఇవానవబ్రవో3ఽస్మాకం మన్యో అధిపా భవేహ .

ప్రియం తే నామ సహురే గృణీమసి విద్మా తముత్సం యత ఆబభూథ .. 10.084.05

ఆభూత్యా సహజా వజ్ర సాయక సహో బిభర్ష్యభిభూత ఉత్తరం .

క్రత్వా నో మన్యో సహ మేద్యేధి మహాధనస్య పురుహూత సంసృజి .. 10.084.06

సంసృష్టం ధనముభయం సమాకృతమస్మభ్యం దత్తాం వరుణశ్చ మన్యుః .

భియం దధానా హృదయేషు శత్రవః పరాజితాసో అప ని లయంతాం .. 10.084.07