ఓంకారేశ్వరమహాత్మ్యం

పార్వతీ -

మహాదేవమహానందకరుణామృతసాగర .

శ్రుతముత్తమమాఖ్యానం మహాకాలగణస్య చ .. 2..

కిం వాన్యత్ ప్రీతిజనకం క్షేత్రమస్తి మహేశ్వర .

క్షేత్రాణాం త్వం పతిః శంభో విశిష్టం వక్తుమర్హసి .. 3..

ఈశ్వరః -

క్షేత్రమస్త్యేకముత్కృష్టముత్ఫుల్లకమలాననే .

ఓంకారం నామ విమలం కలికల్మషనాశనం .. 4..

తత్ర శైవవరా నిత్యం నివసంతి సహస్రశః .

తే సర్వే మమ లింగార్చాం కుర్వంత్యేవ ప్రతిక్షణం .. 5..

భాసితాభాసితైర్నిత్యం శాంతా దాంతా జితేంద్రియాః .

రుద్రాక్షవరభూషాఢ్యా భాలాక్షాన్యస్తమానసాః .. 6..

తత్రాస్తి సరితాం శ్రేష్ఠా లింగసంగతరంగితా .

నర్మదా శర్మదా నిత్యం స్నానాత్పానావగాహనాత్ .. 7..

పాపౌఘసంఘభంగాఢ్యా వాతపోతసుశీతలా .

తత్రాస్తి కుండముత్కృష్టమోంకారాఖ్యం శుచిస్మితే .. 8..

తత్కుండదర్శనాదేవ మల్లోకే నివసేచ్చిరం .

తత్కుండోదకపానేన హృది లింగం ప్రజాయతే .. 9..

భావాః పిబంతి తత్కుండజలం శీతం విముక్తయే .

తృప్తిం ప్రయాంతి పితరః తత్కుండజలతర్పితాః .. 10..

సదా తత్కుండరక్షార్థం గణాః సంస్థాపితా మయా .

కుండధారప్రభృతయః శూలముద్గరపాణయః .. 11..

గజేంద్రచర్మవసనా మృగేంద్రసమవిక్రమాః .

హరీంద్రానపి తే హన్యుర్గిరీంద్రసమవిగ్రహాహ .. 12..

ధనుఃశరకరాః సర్వే జటాశోభితమస్తకాః .

అగ్నిరిత్యాదిభిర్మంత్రైర్భస్మోద్ధూలితవిగ్రహా .. 13..

సంగ్రామముఖరాః సర్వే గణా మేదురవిగ్రహాః .

కదాచిదననుజ్ఞాప్త తాన్ గణాన్ మదదర్పితః .. 14..

అప్సరోభిః పరివృతో మరుతాం పతిరుద్ధతః .

ఆరుహ్యాభ్రమునాథం తం క్రీడితుం నర్మదాజలే .. 15..

సమాజగామ త్వరితః శచ్యా సాకం శివే తదా .

తదా తం గణపాః క్రుద్ధాః సర్వే తే హ్యతిమన్యవః .. 16..

సగజం పాతయన్నబ్ధౌ శచ్యా సాకం సురేశ్వరం .

సురాంస్తదా సవరుణాన్ బిభిదుః పవనానలాన్ .. 17..

నిస్త్రింశవరధారాభిః సుతీక్ష్ణాగ్రైః శిలీముఖైః .

ముద్గరైర్బిభిదుశ్చాన్యే సవాహాయుధభూషణాన్ .. 18..

వివాహనాంస్తదా దేవాన్ స్రవద్రక్తాన్ స్ఖలత్పదాన్ .

కాందిశీకాన్ ముక్తకేశాన్ క్షణాచ్చక్రుర్గణేశ్వరాః .. 19..

అప్సరాస్తా వికన్నరాః రుదంత్యో ముక్తమూర్ధజాః .

హాహా బతేతి క్రందంత్యః స్రవద్రక్తార్ద్రవాససః .. 20..

తథా దేవగణాః సర్వే శక్రాద్యా భయకంపితాః .

ఓంకారం తత్ర తల్లింగం శరణం జగ్మురీశ్వరం .. 21..

.. ఇతి శివరహస్యాంతర్గతే శివపార్వతీసంవాదే ఓంకారేశ్వరమహాత్మ్యం ..

- .. శ్రీశివరహస్యం . భర్గాఖ్యః పంచమాంశః . అధ్యాయః 7. 2-21..