బ్రహ్మణస్పతిసూక్తం సస్వర

ఋగ్వేదాంతర్గతం

గ॒ణానాం॑ త్వా గ॒ణప॑తిం హవామహే క॒విం క॑వీ॒నాము॑ప॒మశ్ర॑వస్తమం .

జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభిః॑ సీద॒ సాద॑నం .. 2.023.01..

సో॒మానం॒ స్వర॑ణం కృణు॒హి బ్ర॑హ్మణస్పతే .

క॒క్షీవం॑తం॒ య ఔ॑శి॒జః .. 1.018.01 .. 1

యో రే॒వాన్యో అ॑మీవ॒హా వ॑సు॒విత్పు॑ష్టి॒వర్ధ॑నః .

స నః॑ సిషక్తు॒ యస్తు॒రః .. 1.018.02.. 2

మా నః॒ శంసో॒ అర॑రుషో ధూ॒ర్తిః ప్రణ॒ఙ్మర్త్య॑స్య .

రక్షా॑ ణో బ్రహ్మణస్పతే .. 1.018.03.. 3

స ఘా॑ వీ॒రో న రి॑ష్యతి॒ యమింద్రో॒ బ్రహ్మ॑ణ॒స్పతిః॑ .

సోమో॑ హి॒నోతి॒ మర్త్యం॑ .. 1.018.04.. 4

త్వం తం బ్ర॑హ్మణస్పతే॒ సోమ॒ ఇంద్ర॑శ్చ॒ మర్త్యం॑ .

దక్షి॑ణా పా॒త్వంహ॑సః .. 1.018.05.. 5

ఉత్తి॑ష్ఠ బ్రహ్మణస్పతే దేవ॒యంత॑స్త్వేమహే .

ఉప॒ ప్ర యం॑తు మ॒రుతః॑ సు॒దాన॑వ॒ ఇంద్ర॑ ప్రా॒శూర్భ॑వా॒ సచా॑ .. 1.040.01.. 6

త్వామిద్ధి స॑హసస్పుత్ర॒ మర్త్య॑ ఉపబ్రూ॒తే ధనే॑ హి॒తే .

సు॒వీర్యం॑ మరుత॒ ఆ స్వశ్వ్యం॒ దధీ॑త॒ యో వ॑ ఆచ॒కే .. 1.040.02.. 7

ప్రైతు॒ బ్రహ్మ॑ణ॒స్పతిః॒ ప్ర దే॒వ్యే॑తు సూ॒నృతా॑ .

అచ్ఛా॑ వీ॒రం నర్యం॑ పం॒క్తిరా॑ధసం దే॒వా య॒జ్ఞం న॑యంతు నః .. 1.040.03.. 8

యో వా॒ఘతే॒ దదా॑తి సూ॒నరం॒ వసు॒ స ధ॑త్తే॒ అక్షి॑తి॒ శ్రవః॑ .

తస్మా॒ ఇళాం॑ సు॒వీరా॒మా య॑జామహే సు॒ప్రతూ॑ర్తిమనే॒హసం॑ .. 1.040.04.. 9

ప్ర నూ॒నం బ్రహ్మ॑ణ॒స్పతి॒ర్మంత్రం॑ వదత్యు॒క్థ్యం॑ .

యస్మి॒న్నింద్రో॒ వరు॑ణో మి॒త్రో అ॑ర్య॒మా దే॒వా ఓకాం॑సి చక్రి॒రే .. 1.040.05.. 10

తమిద్వో॑చేమా వి॒దథే॑షు శం॒భువం॒ మంత్రం॑ దేవా అనే॒హసం॑ .

ఇ॒మాం చ॒ వాచం॑ ప్రతి॒హర్య॑థా నరో॒ విశ్వేద్వా॒మా వో॑ అశ్నవత్ .. 1.040.06.. 11

కో దే॑వ॒యంత॑మశ్నవ॒జ్జనం॒ కో వృ॒క్తబ॑ర్హిషం .

ప్రప్ర॑ దా॒శ్వాన్ప॒స్త్యా॑భిరస్థితాంత॒ర్వావ॒త్క్షయం॑ దధే .. 1.040.07.. 12

ఉప॑ క్ష॒త్రం పృం॑చీ॒త హంతి॒ రాజ॑భిర్భ॒యే చి॑త్సుక్షి॒తిం ద॑ధే .

నాస్య॑ వ॒ర్తా న త॑రు॒తా మ॑హాధ॒నే నార్భే॑ అస్తి వ॒జ్రిణః॑ .. 1.040.08.. 13

గ॒ణానాం॑ త్వా గ॒ణప॑తిం హవామహే క॒విం క॑వీ॒నాము॑ప॒మశ్ర॑వస్తమం .

జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభిః॑ సీద॒ సాద॑నం .. 2.023.01.. 14

దే॒వాశ్చి॑త్తే అసుర్య॒ ప్రచే॑తసో॒ బృహ॑స్పతే య॒జ్ఞియం॑ భా॒గమా॑నశుః .

ఉ॒స్రా ఇ॑వ॒ సూర్యో॒ జ్యోతి॑షా మ॒హో విశ్వే॑షా॒మిజ్జ॑ని॒తా బ్రహ్మ॑ణామసి .. 2.023.02.. 15

ఆ వి॒బాధ్యా॑ పరి॒రాప॒స్తమాం॑సి చ॒ జ్యోతి॑ష్మంతం॒ రథ॑మృ॒తస్య॑ తిష్ఠసి .

బృహ॑స్పతే భీ॒మమ॑మిత్ర॒దంభ॑నం రక్షో॒హణం॑ గోత్ర॒భిదం॑ స్వ॒ర్విదం॑ .. 2.023.03.. 16

సు॒నీ॒తిభి॑ర్నయసి॒ త్రాయ॑సే॒ జనం॒ యస్తుభ్యం॒ దాశా॒న్న తమంహో॑ అశ్నవత్ .

బ్ర॒హ్మ॒ద్విష॒స్తప॑నో మన్యు॒మీర॑సి॒ బృహ॑స్పతే॒ మహి॒ తత్తే॑ మహిత్వ॒నం .. 2.023.04.. 17

న తమంహో॒ న దు॑రి॒తం కుత॑శ్చ॒న నారా॑తయస్తితిరు॒ర్న ద్వ॑యా॒వినః॑ .

విశ్వా॒ ఇద॑స్మాద్ధ్వ॒రసో॒ వి బా॑ధసే॒ యం సు॑గో॒పా రక్ష॑సి బ్రహ్మణస్పతే .. 2.023.05.. 18

త్వం నో॑ గో॒పాః ప॑థి॒కృద్వి॑చక్ష॒ణస్తవ॑ వ్ర॒తాయ॑ మ॒తిభి॑ర్జరామహే .

బృహ॑స్పతే॒ యో నో॑ అ॒భి హ్వరో॑ ద॒ధే స్వా తం మ॑ర్మర్తు దు॒చ్ఛునా॒ హర॑స్వతీ .. 2.023.06.. 19

ఉ॒త వా॒ యో నో॑ మ॒ర్చయా॒దనా॑గసోఽరాతీ॒వా మర్తః॑ సాను॒కో వృకః॑ .

బృహ॑స్పతే॒ అప॒ తం వ॑ర్తయా ప॒థః సు॒గం నో॑ అ॒స్యై దే॒వవీ॑తయే కృధి .. 2.023.07.. 20

త్రా॒తారం॑ త్వా త॒నూనాం॑ హవామ॒హేఽవ॑స్పర్తరధివ॒క్తార॑మస్మ॒యుం .

బృహ॑స్పతే దేవ॒నిదో॒ ని బ॑ర్హయ॒ మా దు॒రేవా॒ ఉత్త॑రం సు॒మ్నమున్న॑శన్ .. 2.023.08.. 21

త్వయా॑ వ॒యం సు॒వృధా॑ బ్రహ్మణస్పతే స్పా॒ర్హా వసు॑ మను॒ష్యా ద॑దీమహి .

యా నో॑ దూ॒రే త॒ళితో॒ యా అరా॑తయో॒ఽభి సంతి॑ జం॒భయా॒ తా అ॑న॒ప్నసః॑ .. 2.023.09.. 22

త్వయా॑ వ॒యము॑త్త॒మం ధీ॑మహే॒ వయో॒ బృహ॑స్పతే॒ పప్రి॑ణా॒ సస్ని॑నా యు॒జా .

మా నో॑ దుః॒శంసో॑ అభిది॒ప్సురీ॑శత॒ ప్ర సు॒శంసా॑ మ॒తిభి॑స్తారిషీమహి .. 2.023.10.. 23

అ॒నా॒ను॒దో వృ॑ష॒భో జగ్మి॑రాహ॒వం నిష్ట॑ప్తా॒ శత్రుం॒ పృత॑నాసు సాస॒హిః .

అసి॑ స॒త్య ఋ॑ణ॒యా బ్ర॑హ్మణస్పత ఉ॒గ్రస్య॑ చిద్దమి॒తా వీ॑ళుహ॒ర్షిణః॑ .. 2.023.11.. 24

అదే॑వేన॒ మన॑సా॒ యో రి॑ష॒ణ్యతి॑ శా॒సాము॒గ్రో మన్య॑మానో॒ జిఘాం॑సతి .

బృహ॑స్పతే॒ మా ప్రణ॒క్తస్య॑ నో వ॒ధో ని క॑ర్మ మ॒న్యుం దు॒రేవ॑స్య॒ శర్ధ॑తః .. 2.023.12.. 25

భరే॑షు॒ హవ్యో॒ నమ॑సోప॒సద్యో॒ గంతా॒ వాజే॑షు॒ సని॑తా॒ ధనం॑ధనం .

విశ్వా॒ ఇద॒ర్యో అ॑భిది॒ప్స్వో॒3॒॑ మృధో॒ బృహ॒స్పతి॒ర్వి వ॑వర్హా॒ రథా॑ఀ ఇవ .. 2.023.13.. 26

తేజి॑ష్ఠయా తప॒నీ ర॒క్షస॑స్తప॒ యే త్వా॑ ని॒దే ద॑ధి॒రే దృ॒ష్టవీ॑ర్యం .

ఆ॒విస్తత్కృ॑ష్వ॒ యదస॑త్త ఉ॒క్థ్యం1॒॑ బృహ॑స్పతే॒ వి ప॑రి॒రాపో॑ అర్దయ .. 2.023.14.. 27

బృహ॑స్పతే॒ అతి॒ యద॒ర్యో అర్హా॑ద్ద్యు॒మద్వి॒భాతి॒ క్రతు॑మ॒జ్జనే॑షు .

యద్దీ॒దయ॒చ్ఛవ॑స ఋతప్రజాత॒ తద॒స్మాసు॒ ద్రవి॑ణం ధేహి చి॒త్రం .. 2.023.15.. 28

మా నః॑ స్తే॒నేభ్యో॒ యే అ॒భి ద్రు॒హస్ప॒దే ని॑రా॒మిణో॑ రి॒పవోఽన్నే॑షు జాగృ॒ధుః .

ఆ దే॒వానా॒మోహ॑తే॒ వి వ్రయో॑ హృ॒ది బృహ॑స్పతే॒ న ప॒రః సామ్నో॑ విదుః .. 2.023.16.. 29

విశ్వే॑భ్యో॒ హి త్వా॒ భువ॑నేభ్య॒స్పరి॒ త్వష్టాజ॑న॒త్సామ్నః॑సామ్నః క॒విః .

స ఋ॑ణ॒చిదృ॑ణ॒యా బ్రహ్మ॑ణ॒స్పతి॑ర్ద్రు॒హో హం॒తా మ॒హ ఋ॒తస్య॑ ధ॒ర్తరి॑ .. 2.023.17.. 30

తవ॑ శ్రి॒యే వ్య॑జిహీత॒ పర్వ॑తో॒ గవాం॑ గో॒త్రము॒దసృ॑జో॒ యదం॑గిరః .

ఇంద్రే॑ణ యు॒జా తమ॑సా॒ పరీ॑వృతం॒ బృహ॑స్పతే॒ నిర॒పామౌ॑బ్జో అర్ణ॒వం .. 2.023.18.. 31

బ్రహ్మ॑ణస్పతే॒ త్వమ॒స్య యం॒తా సూ॒క్తస్య॑ బోధి॒ తన॑యం చ జిన్వ .

విశ్వం॒ తద్భ॒ద్రం యదవం॑తి దే॒వా బృ॒హద్వ॑దేమ వి॒దథే॑ సు॒వీరాః॑ .. 2.023.19.. 32

సేమామ॑విడ్ఢి॒ ప్రభృ॑తిం॒ య ఈశి॑షే॒ఽయా వి॑ధేమ॒ నవ॑యా మ॒హా గి॒రా .

యథా॑ నో మీ॒ఢ్వాన్స్తవ॑తే॒ సఖా॒ తవ॒ బృహ॑స్పతే॒ సీష॑ధః॒ సోత నో॑ మ॒తిం .. 2.024.01.. 33

యో నంత్వా॒న్యన॑మ॒న్న్యోజ॑సో॒తాద॑ర్దర్మ॒న్యునా॒ శంబ॑రాణి॒ వి .

ప్రాచ్యా॑వయ॒దచ్యు॑తా॒ బ్రహ్మ॑ణ॒స్పతి॒రా చావి॑శ॒ద్వసు॑మంతం॒ వి పర్వ॑తం .. 2.024.02.. 34

తద్దే॒వానాం॑ దే॒వత॑మాయ॒ కర్త్వ॒మశ్ర॑థ్నందృ॒ళ్హావ్ర॑దంత వీళి॒తా .

ఉద్గా ఆ॑జ॒దభి॑న॒ద్బ్రహ్మ॑ణా వ॒లమగూ॑హ॒త్తమో॒ వ్య॑చక్షయ॒త్స్వః॑ .. 2.024.03.. 35

అశ్మా॑స్యమవ॒తం బ్రహ్మ॑ణ॒స్పతి॒ర్మధు॑ధారమ॒భి యమోజ॒సాతృ॑ణత్ .

తమే॒వ విశ్వే॑ పపిరే స్వ॒ర్దృశో॑ బ॒హు సా॒కం సి॑సిచు॒రుత్స॑ము॒ద్రిణం॑ .. 2.024.04.. 36

సనా॒ తా కా చి॒ద్భువ॑నా॒ భవీ॑త్వా మా॒ద్భిః శ॒రద్భి॒ర్దురో॑ వరంత వః .

అయ॑తంతా చరతో అ॒న్యద॑న్య॒దిద్యా చ॒కార॑ వ॒యునా॒ బ్రహ్మ॑ణ॒స్పతిః॑ .. 2.024.05.. 37

అ॒భి॒నక్షం॑తో అ॒భి యే తమా॑న॒శుర్ని॒ధిం ప॑ణీ॒నాం ప॑ర॒మం గుహా॑ హి॒తం .

తే వి॒ద్వాంసః॑ ప్రతి॒చక్ష్యానృ॑తా॒ పున॒ర్యత॑ ఉ॒ ఆయం॒తదుదీ॑యురా॒విశం॑ .. 2.024.06.. 38

ఋ॒తావా॑నః ప్రతి॒చక్ష్యానృ॑తా॒ పున॒రాత॒ ఆ త॑స్థుః క॒వయో॑ మ॒హస్ప॒థః .

తే బా॒హుభ్యాం॑ ధమి॒తమ॒గ్నిమశ్మ॑ని॒ నకిః॒ షో అ॒స్త్యర॑ణో జ॒హుర్హి తం .. 2.024.07.. 39

ఋ॒తజ్యే॑న క్షి॒ప్రేణ॒ బ్రహ్మ॑ణ॒స్పతి॒ర్యత్ర॒ వష్టి॒ ప్ర తద॑శ్నోతి॒ ధన్వ॑నా .

తస్య॑ సా॒ధ్వీరిష॑వో॒ యాభి॒రస్య॑తి నృ॒చక్ష॑సో దృ॒శయే॒ కర్ణ॑యోనయః .. 2.024.08.. 40

స సం॑న॒యః స వి॑న॒యః పు॒రోహి॑తః॒ స సుష్టు॑తః॒ స యు॒ధి బ్రహ్మ॑ణ॒స్పతిః॑ .

చా॒క్ష్మో యద్వాజం॒ భర॑తే మ॒తీ ధనాదిత్సూర్య॑స్తపతి తప్య॒తుర్వృథా॑ .. 2.024.09.. 41

వి॒భు ప్ర॒భు ప్ర॑థ॒మం మే॒హనా॑వతో॒ బృహ॒స్పతేః॑ సువి॒దత్రా॑ణి॒ రాధ్యా॑ .

ఇ॒మా సా॒తాని॑ వే॒న్యస్య॑ వా॒జినో॒ యేన॒ జనా॑ ఉ॒భయే॑ భుంజ॒తే విశః॑ .. 2.024.10.. 42

యోఽవ॑రే వృ॒జనే॑ వి॒శ్వథా॑ వి॒భుర్మ॒హాము॑ ర॒ణ్వః శవ॑సా వ॒వక్షి॑థ .

స దే॒వో దే॒వాన్ప్రతి॑ పప్రథే పృ॒థు విశ్వేదు॒ తా ప॑రి॒భూర్బ్రహ్మ॑ణ॒స్పతిః॑ .. 2.024.11.. 43

విశ్వం॑ స॒త్యం మ॑ఘవానా యు॒వోరిదాప॑శ్చ॒న ప్ర మి॑నంతి వ్ర॒తం వాం॑ .

అచ్ఛేం॑ద్రాబ్రహ్మణస్పతీ హ॒విర్నోఽన్నం॒ యుజే॑వ వా॒జినా॑ జిగాతం .. 2.024.12.. 44

ఉ॒తాశి॑ష్ఠా॒ అను॑ శృణ్వంతి॒ వహ్న॑యః స॒భేయో॒ విప్రో॑ భరతే మ॒తీ ధనా॑ .

వీ॒ళు॒ద్వేషా॒ అను॒ వశ॑ ఋ॒ణమా॑ద॒దిః స హ॑ వా॒జీ స॑మి॒థే బ్రహ్మ॑ణ॒స్పతిః॑ .. 2.024.13.. 45

బ్రహ్మ॑ణ॒స్పతే॑రభవద్యథావ॒శం స॒త్యో మ॒న్యుర్మహి॒ కర్మా॑ కరిష్య॒తః .

యో గా ఉ॒దాజ॒త్స ది॒వే వి చా॑భజన్మ॒హీవ॑ రీ॒తిః శవ॑సాసర॒త్పృథ॑క్ .. 2.024.14.. 46

బ్రహ్మ॑ణస్పతే సు॒యమ॑స్య వి॒శ్వహా॑ రా॒యః స్యా॑మ ర॒థ్యో॒3॒॑ వయ॑స్వతః .

వీ॒రేషు॑ వీ॒రాఀ ఉప॑ పృఙ్ధి న॒స్త్వం యదీశా॑నో॒ బ్రహ్మ॑ణా॒ వేషి॑ మే॒ హవం॑ .. 2.024.15.. 47

బ్రహ్మ॑ణస్పతే॒ త్వమ॒స్య యం॒తా సూ॒క్తస్య॑ బోధి॒ తన॑యం చ జిన్వ .

విశ్వం॒ తద్భ॒ద్రం యదవం॑తి దే॒వా బృ॒హద్వ॑దేమ వి॒దథే॑ సు॒వీరాః॑ .. 2.024.16.. 48

ఇంధా॑నో అ॒గ్నిం వ॑నవద్వనుష్య॒తః కృ॒తబ్ర॑హ్మా శూశువద్రా॒తహ॑వ్య॒ ఇత్ .

జా॒తేన॑ జా॒తమతి॒ స ప్ర స॑ర్సృతే॒ యంయం॒ యుజం॑ కృణు॒తే బ్రహ్మ॑ణ॒స్పతిః॑ .. 2.025.01.. 49

వీ॒రేభి॑ర్వీ॒రాన్వ॑నవద్వనుష్య॒తో గోభీ॑ ర॒యిం ప॑ప్రథ॒ద్బోధ॑తి॒ త్మనా॑ .

తో॒కం చ॒ తస్య॒ తన॑యం చ వర్ధతే॒ యంయం॒ యుజం॑ కృణు॒తే బ్రహ్మ॑ణ॒స్పతిః॑ .. 2.025.02.. 50

సింధు॒ర్న క్షోదః॒ శిమీ॑వాఀ ఋఘాయ॒తో వృషే॑వ॒ వధ్రీ॑ఀర॒భి వ॒ష్ట్యోజ॑సా .

అ॒గ్నేరి॑వ॒ ప్రసి॑తి॒ర్నాహ॒ వర్త॑వే॒ యంయం॒ యుజం॑ కృణు॒తే బ్రహ్మ॑ణ॒స్పతిః॑ .. 2.025.03.. 51

తస్మా॑ అర్షంతి ది॒వ్యా అ॑స॒శ్చతః॒ స సత్వ॑భిః ప్రథ॒మో గోషు॑ గచ్ఛతి .

అని॑భృష్టతవిషిర్హం॒త్యోజ॑సా॒ యంయం॒ యుజం॑ కృణు॒తే బ్రహ్మ॑ణ॒స్పతిః॑ .. 2.025.04.. 52

తస్మా॒ ఇద్విశ్వే॑ ధునయంత॒ సింధ॒వోఽచ్ఛి॑ద్రా॒ శర్మ॑ దధిరే పు॒రూణి॑ .

దే॒వానాం॑ సు॒మ్నే సు॒భగః॒ స ఏ॑ధతే॒ యంయం॒ యుజం॑ కృణు॒తే బ్రహ్మ॑ణ॒స్పతిః॑ .. 2.025.05.. 53

ఋ॒జురిచ్ఛంసో॑ వనవద్వనుష్య॒తో దే॑వ॒యన్నిదదే॑వయంతమ॒భ్య॑సత్ .

సు॒ప్రా॒వీరిద్వ॑నవత్పృ॒త్సు దు॒ష్టరం॒ యజ్వేదయ॑జ్యో॒ర్వి భ॑జాతి॒ భోజ॑నం .. 2.026.01.. 54

యజ॑స్వ వీర॒ ప్ర వి॑హి మనాయ॒తో భ॒ద్రం మనః॑ కృణుష్వ వృత్ర॒తూర్యే॑ .

హ॒విష్కృ॑ణుష్వ సు॒భగో॒ యథాస॑సి॒ బ్రహ్మ॑ణ॒స్పతే॒రవ॒ ఆ వృ॑ణీమహే .. 2.026.02.. 55

స ఇజ్జనే॑న॒ స వి॒శా స జన్మ॑నా॒ స పు॒త్రైర్వాజం॑ భరతే॒ ధనా॒ నృభిః॑ .

దే॒వానాం॒ యః పి॒తర॑మా॒వివా॑సతి శ్ర॒ద్ధామ॑నా హ॒విషా॒ బ్రహ్మ॑ణ॒స్పతిం॑ .. 2.026.03.. 56

యో అ॑స్మై హ॒వ్యైర్ఘృ॒తవ॑ద్భి॒రవి॑ధ॒త్ప్ర తం ప్రా॒చా న॑యతి॒ బ్రహ్మ॑ణ॒స్పతిః॑ .

ఉ॒రు॒ష్యతీ॒మంహ॑సో॒ రక్ష॑తీ రి॒షోం॒3॒॑ఽహోశ్చి॑దస్మా ఉరు॒చక్రి॒రద్భు॑తః .. 2.026.04.. 57

తము॒ జ్యేష్ఠం॒ నమ॑సా హ॒విర్భిః॑ సు॒శేవం॒ బ్రహ్మ॑ణ॒స్పతిం॑ గృణీషే .

ఇంద్రం॒ శ్లోకో॒ మహి॒ దైవ్యః॑ సిషక్తు॒ యో బ్రహ్మ॑ణో దే॒వకృ॑తస్య॒ రాజా॑ .. 7.097.03.. 58

ఇ॒యం వాం॑ బ్రహ్మణస్పతే సువృ॒క్తిర్బ్రహ్మేంద్రా॑య వ॒జ్రిణే॑ అకారి .

అ॒వి॒ష్టం ధియో॑ జిగృ॒తం పురం॑ధీర్జజ॒స్తమ॒ర్యో వ॒నుషా॒మరా॑తీః .. 7.097.09.. 59

చ॒త్తో ఇ॒తశ్చ॒త్తాముతః॒ సర్వా॑ భ్రూ॒ణాన్యా॒రుషీ॑ .

అ॒రా॒య్యం॑ బ్రహ్మణస్పతే॒ తీక్ష్ణ॑శృంగోదృ॒షన్ని॑హి .. 10.155.02.. 60

అ॒దో యద్దారు॒ ప్లవ॑తే॒ సింధోః॑ పా॒రే అ॑పూరు॒షం .

తదా ర॑భస్వ దుర్హణో॒ తేన॑ గచ్ఛ పరస్త॒రం .. 10.155.03.. 61

అగ్ని॒ర్యేన॑ వి॒రాజ॑తి సూ॒ర్యో॑ యేన వి॒రాజ॑తి .

వి॒రాజ్యే॑న విరా॒జతి తేనా॒స్మాన్ బ్రహ్మ॑ణస్పతే వి॒రా॑జ సమిధం॒ కు॑రు .. 10.128.12.. 62 (From Rigveda Khilas)

యత్ర॑ బా॒ణాః సం॒పతం॑తి కుమా॒రా వి॑శి॒ఖా ఇ॑వ .

తత్రా॑ నో॒ బ్రహ్మ॑ణ॒స్పతి॒రది॑తిః॒ శర్మ॑ యచ్ఛతు వి॒శ్వాహా॒ శర్మ॑ యచ్ఛతు .. 6.075.17.. 63

యదిం॑ద్ర బ్రహ్మణస్పతేఽభిద్రో॒హం చరా॑మసి .

ప్రచే॑తా న ఆంగిర॒సో ద్వి॑ష॒తాం పా॒త్వంహ॑సః .. 10.164.04.. 64

ని షు సీ॑ద గణపతే గ॒ణేషు॒ త్వామా॑హు॒ర్విప్ర॑తమం కవీ॒నాం .

న ఋ॒తే త్వత్క్రి॑యతే॒ కిం చ॒నారే మ॒హామ॒ర్కం మ॑ఘవంచి॒త్రమ॑ర్చ .. 10.112.09.. 65

అ॒యం మే॒ హస్తో॒ భగ॑వాన॒యం మే॒ భగ॑వత్తరః .

అ॒యం మే॑ వి॒శ్వభే॑షజో॒ఽయం శి॒వాభి॑మర్శనః .. 10.060.12.. 66

ఆ తూ న॑ ఇంద్ర క్షు॒మంతం॑ చి॒త్రం గ్రా॒భం సం గృ॑భాయ .

మ॒హా॒హ॒స్తీ దక్షి॑ణేన .. 8.081.01..

వి॒ద్మా హి త్వా॑ తువికూ॒ర్మిం తు॒విదే॑ష్ణం తు॒వీమ॑ఘం .

తు॒వి॒మా॒త్రమవో॑భిః .. 8.081.02..

న॒హి త్వా॑ శూర దే॒వా న మర్తా॑సో॒ దిత్సం॑తం .

భీ॒మం న గాం వా॒రయం॑తే .. 8.081.03..

ఏతో॒ న్వింద్రం॒ స్తవా॒మేశా॑నం॒ వస్వః॑ స్వ॒రాజం॑ .

న రాధ॑సా మర్ధిషన్నః .. 8.081.04..

ప్ర స్తో॑ష॒దుప॑ గాసిష॒చ్ఛ్రవ॒త్సామ॑ గీ॒యమా॑నం .

అ॒భి రాధ॑సా జుగురత్ .. 8.081.05..

ఆ నో॑ భర॒ దక్షి॑ణేనా॒భి స॒వ్యేన॒ ప్ర మృ॑శ .

ఇంద్ర॒ మా నో॒ వసో॒ర్నిర్భా॑క్ .. 8.081.06..

ఉప॑ క్రమ॒స్వా భ॑ర ధృష॒తా ధృ॑ష్ణో॒ జనా॑నాం .

అదా॑శూష్టరస్య॒ వేదః॑ .. 8.081.07..

ఇంద్ర॒ య ఉ॒ ను తే॒ అస్తి॒ వాజో॒ విప్రే॑భిః॒ సని॑త్వః .

అ॒స్మాభిః॒ సు తం స॑నుహి .. 8.081.08..

స॒ద్యో॒జువ॑స్తే॒ వాజా॑ అ॒స్మభ్యం॑ వి॒శ్వశ్చం॑ద్రాః .

వశై॑శ్చ మ॒క్షూ జ॑రంతే .. 8.081.09..

.. ఓం శాంతిః॒ శాంతిః॒ శాంతిః॑ ..

ఇతి బ్రహ్మణస్పతిసూక్తం సంపూర్ణం ..