వేదమంత్రమంజరి - 1

హరిః ఓం

.. ఓం శ్రీ గురుభ్యో నమః హరిః ఓం ..

.. మంగలాచరణం ..

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే .. 1..

అగజానన పద్మార్కం గజాననమహర్నిశం .

అనేకదం తం భక్తానాం ఏకదంతముపాస్మహే .. 2..

వాగర్థావివ సంపృక్తౌ వాగర్థప్రతిపత్తయే .

జగతః పితరౌ వందే పార్వతీపరమేశ్వరౌ .. 3..

గురుర్బ్రహ్మా గురుర్విష్ణుః గురుర్దేవో మహేశ్వరః .

గురుస్సాక్షాత్ పరబ్రహ్మ తస్మై శ్రీ గురవే నమః .. 4..

ఆంగికం భువనం యస్య వాచికం సర్వవాఙ్మయం .

ఆహార్యం చంద్ర తారాది తం నుమః సాత్వికం శివం .. 5..

సర్వమంగలమాంగల్యే శివే సర్వార్థసాధికే .

శరణ్యే త్ర్యంబకే గౌరి నారాయణి నమోఽస్తుతే .. 6..

సరస్వతి నమస్తుభ్యం వరదే కామరూపిణి .

విద్యారంభం కరిష్యామి సిద్ధిర్భవతు మే సదా .. 7..

త్వమేవ మాతా చ పితా త్వమేవ త్వమేవ బంధుశ్చ సఖా త్వమేవ .

త్వమేవ విద్యా ద్రవిణం త్వమేవ త్వమేవ సర్వం మమ దేవ దేవ .. 8..

కాయేన వాచా మనసేంద్రియైర్వా బుధ్యాత్మనా వా ప్రకృతేః స్వభావాత్ .

కరోమి యద్యత్సకలం పరస్మై నారాయణాయేతి సమర్పయామి .. 9..

ఓం అసతో మా సద్గమయ . తమసో మా జ్యోతిర్గమయ . మృత్యోర్మా అమృతం గమయ .. 10..

ఓం భూః ఓం భువః ఓం సువః ఓం మహః ఓం జనః ఓం తపః ఓం సత్యం .

ఓం తత్స॑వి॒తుర్వరే᳚ణ్యం॒ భర్గో॑దే॒వస్య॑ ధీమహి . ధియో॒ యో నః॑ ప్రచో॒దయా᳚త్ ..11..

ఓం గ॒ణానాం᳚ త్వా గ॒ణప॑తిగ్ం హవామహే క॒విం క॑వీ॒నాము॑ప॒మశ్ర॑వస్తమం .

జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభి॑స్సీద॒ సాద॑నం .. 12..

.. మహాగణపతయే॒ నమః ..

ఓం ప్రణో॑ దే॒వి సర॑స్వతీ॒ వాజే॑భిర్వా॒జినీ॑వతీ . ధీ॒నామ॑వి॒త్ర్య॑వతు ..

వాగ్దేవ్యై॒ నమః॑ ..

ఓం నమో॒ బ్రహ్మ॑ణే ధా॒రణం॑ మే అ॒స్త్వని॑రాకరణం ధా॒రయి॑తా భూయాసం॒

కర్ణ॑యోశ్శ్రు॒తం మా చ్యో᳚ఢ్వం॒ మమా॒ముష్య॒ ఓం ..

ఓం శాంతిః॒ శాంతిః॒ శాంతిః॑ .

.. గణపత్యథర్వశీర్షోపనిషత్ ..

ఓం భ॒ద్రం కర్ణే॑భిః శృణు॒యామ॑ దేవాః . భ॒ద్రం ప॑శ్యేమా॒క్షభి॒ర్యజ॑త్రాః .

స్థి॒రైరంగై᳚స్తుష్టు॒వాగ్ం స॑స్త॒నూభిః॑ . వ్యశే॑మ దే॒వహి॑తం॒ యదాయుః॑ .

స్వ॒స్తి న॒ ఇంద్రో॑ వృ॒ద్ధశ్ర॑వాః . స్వ॒స్తి నః॑ పూ॒షా వి॒శ్వవే॑దాః . స్వ॒స్తి

న॒స్తార్క్ష్యో॒ అరి॑ష్టనేమిః . స్వ॒స్తి నో॒ బృహ॒స్పతి॑ర్దధాతు .. ఓం శాంతిః॒ శాంతిః॒

శాంతిః॑ ..

ఓం నమ॑స్తే గ॒ణప॑తయే . త్వమే॒వ ప్ర॒త్యక్షం॒ తత్త్వ॑మసి . త్వమే॒వ కే॒వలం॒

కర్తా॑ఽసి . త్వమే॒వ కే॒వలం॒ ధర్తా॑ఽసి . త్వమే॒వ కే॒వలం॒ హర్తా॑ఽసి . త్వమేవ

సర్వం ఖల్విదం॑ బ్రహ్మా॒సి . త్వం సాక్షాదాత్మా॑ఽసి ని॒త్యం .. 1 .. ఋ॑తం వ॒చ్మి .

స॑త్యం వ॒చ్మి .. 2 .. 

అవ॒ త్వం॒ మాం . అవ॑ వ॒క్తారం᳚ . అవ॑ శ్రో॒తారం᳚ . అవ॑

దా॒తారం᳚ . అవ॑ ధా॒తారం᳚ . అవానూచానమ॑వ శి॒ష్యం . అవ॑ ప॒శ్చాత్తా᳚త్ .

అవ॑ పు॒రస్తా᳚త్ . అవోత్త॒రాత్తా᳚త్ . అవ॑ దక్షి॒ణాత్తా᳚త్ . అవ॑ చో॒ర్ధ్వాత్తా᳚త్ .

అవాధ॒రాత్తా᳚త్ . సర్వతో మాం పాహి పాహి॑ సమం॒తాత్ .. 3 .. త్వం వాఙ్మయ॑స్త్వం చిన్మ॒యః .

త్వమానందమయ॑స్త్వం బ్రహ్మ॒మయః . త్వం సచ్చిదానందాఽద్వి॑తీయో॒ఽసి . త్వం ప్ర॒త్యక్షం॒

బ్రహ్మా॑సి . త్వం జ్ఞానమయో విజ్ఞాన॑మయో॒ఽసి .. 4 ..

సర్వం జగదిదం త్వ॑త్తో జా॒యతే . సర్వం జగదిదం త్వ॑త్తస్తి॒ష్ఠతి . సర్వం జగదిదం త్వయి

లయ॑మేష్య॒తి . సర్వం జగదిదం త్వయి॑ ప్రత్యే॒తి . త్వం భూమిరాపోఽనలోఽని॑లో న॒భః

. త్వం చత్వారి వా᳚క్పదా॒ని .. 5.. 

త్వం గు॒ణత్ర॑యాతీ॒తః . త్వం అవస్థాత్ర॑యాతీ॒తః .

త్వం దే॒హత్ర॑యాతీ॒తః . త్వం కా॒లత్ర॑యాతీ॒తః . త్వం మూలాధారస్థితో॑ఽసి ని॒త్యం .

త్వం శక్తిత్ర॑యాత్మ॒కః . త్వాం యోగినో ధ్యాయం॑తి ని॒త్యం . త్వం బ్రహ్మా త్వం విష్ణుస్త్వం

రుద్రస్త్వమింద్రస్త్వమగ్నిస్త్వం వాయుస్త్వం సూర్యస్త్వం చంద్రమాస్త్వం బ్రహ్మ॒ భూర్భువః॒ స్వరోం ..

6 ..

గ॒ణాదిం᳚ పూర్వ॑ముచ్చా॒ర్య॒ వ॒ర్ణాదీం᳚ స్తదనం॒తరం . అనుస్వారః ప॑రత॒రః .

అర్ధేం᳚దుల॒సితం . తారే॑ణ ఋ॒ద్ధం . ఏతత్తవ మను॑స్వరూ॒పం . గకారః పూ᳚ర్వరూ॒పం .

అకారో మధ్య॑మరూ॒పం . అనుస్వారశ్చాం᳚త్యరూ॒పం . బిందురుత్త॑రరూ॒పం . నాదః॑ సంధా॒నం

. సగ్ంహి॑తా సం॒ధిః . సైషా గణే॑శవి॒ద్యా . గణ॑క ఋ॒షిః . నిచృద్గాయ॑త్రీచ్ఛం॒దః

. గణపతి॑ర్దేవ॒తా . ఓం గం గ॒ణప॑తయే నమః .. 7 ..

ఏకదం॒తాయ॑ వి॒ద్మహే॑ వక్రతుం॒డాయ॑ ధీమహి . తన్నో॑ దంతిః ప్రచో॒దయా᳚త్ .. 8

.. ఏకదం॒తం చ॑తుర్హ॒స్తం॒ పా॒శమం॑కుశ॒ధారి॑ణం . రదం॑ చ॒ వర॑దం

హ॒స్తై॒ర్బి॒భ్రాణం॑ మూష॒కధ్వ॑జం . రక్తం॑ లం॒బోద॑రం శూ॒ర్ప॒క॒ర్ణకం॑

రక్త॒వాస॑సం . రక్త॑గం॒ధాను॑లిప్తాం॒గం॒ ర॒క్తపు॑ష్పైః సు॒పూజి॑తం .

భక్తా॑ను॒కంపి॑నం దే॒వం॒ జ॒గత్కా॑రణ॒మచ్యు॑తం . ఆవి॑ర్భూ॒తం చ॑

సృ॒ష్ట్యా॒దౌ॒ ప్ర॒కృతేః᳚ పురు॒షాత్ప॑రం . ఏవం॑ ధ్యా॒యతి॑ యో ని॒త్యం॒ స॒

యోగీ॑ యోగి॒నాం వ॑రః.. 9.. నమో వ్రాతపతయే నమో గణపతయే నమః ప్రమథపతయే నమస్తేఽస్తు

లంబోదరాయైకదంతాయ విఘ్ననాశినే శివసుతాయ వరదమూర్తయే॒ నమః॑ .. 10 ..

ఏతదథర్వశీర్షం॑ యోఽధీ॒తే స బ్రహ్మభూయా॑య క॒ల్పతే . స సర్వవిఘ్నై᳚ర్న బా॒ధ్యతే

. స సర్వత్ర సుఖ॑మేధ॒తే . స పంచమహాపాపా᳚త్ ప్రము॒చ్యతే . సా॒యమ॑ధీయా॒నో॒

దివసకృతం పాపం॑ నాశ॒యతి . ప్రా॒తర॑ధీయా॒నో॒ రాత్రి॑కృతం పాపం॑ నాశ॒యతి .

సాయం ప్రాతః ప్ర॑యుంజా॒నో॒ పాపోఽపా॑పో భ॒వతి . సర్వత్రాధీయానోఽపవి॑ఘ్నో భ॒వతి .

ధర్మార్థకామమోక్షం॑ చ విం॒దతి . ఇదమథర్వశీర్షమశిష్యాయ॑ న దే॒యం . యో యది

మో॑హాద్ దా॒స్యతి స పాపీ॑యాన్ భ॒వతి . సహస్రావర్తనాద్యం యం కామ॑మధీ॒తే తం తమనే॑న

సా॒ధయేత్ .. 11 ..

అనేన గణపతిమ॑భిషిం॒చతి స వా॑గ్మీ భ॒వతి . చతుర్థ్యామన॑శ్నన్ జ॒పతి స

విద్యా॑వాన్ భ॒వతి . ఇత్యథర్వ॑ణవా॒క్యం . బ్రహ్మాద్యా॒వర॑ణం వి॒ద్యాన్న బిభేతి

కదా॑చనే॒తి .. 12 .. యో దూర్వాంకు॑రైర్య॒జతి స వైశ్రవణోప॑మో భ॒వతి . యో

లా॑జైర్య॒జతి స యశో॑వాన్ భ॒వతి . స మేధా॑వాన్ భ॒వతి . యో మోదకసహస్రే॑ణ

య॒జతి స వాంఛితఫలమ॑వాప్నో॒తి . యః సాజ్య సమి॑ద్భిర్య॒జతి స సర్వం లభతే స

స॑ర్వం ల॒భతే .. 13 .. అష్టౌ బ్రాహ్మణాన్ సమ్యగ్ గ్రా॑హయి॒త్వా సూర్యవర్చ॑స్వీ భ॒వతి .

సూర్యగ్రహే మ॑హాన॒ద్యాం ప్రతిమాసన్నిధౌ వా జ॒ప్త్వా సిద్ధమం॑త్రో భ॒వతి . మహావిఘ్నా᳚త్

ప్రము॒చ్యతే . మహాదోషా᳚త్ ప్రము॒చ్యతే . మహాప్రత్యవాయా᳚త్ ప్రము॒చ్యతే . స సర్వవిద్భవతి

స సర్వ॑విద్భ॒వతి . య ఏ॑వం వే॒ద . ఇత్యు॑ప॒నిష॑త్ .. 14 .. ఓం శాంతిః॒ శాంతిః॒

శాంతిః॑ ..

.. పుణ్యాహవాచనం ..

ఓం బ్రహ్మ॑జజ్ఞా॒నం ప్ర॑థ॒మం పు॒రస్తా॒ద్విసీ॑మ॒తస్సు॒రుచో॑ వే॒న ఆ॑వః .

సబు॒ధ్నియా॑ ఉప॒మా అ॑స్య వి॒ష్ఠాస్స॒తశ్చ॒ యోని॒మస॑తశ్చ॒ వివః॑ . నాకే॑

సుప॒ర్ణము॑ప॒ యత్పతం॑తం హృ॒దా వేనం॑తో అ॒భ్య చ॑క్షత త్వా . హిర॑ణ్యపక్షం॒

వరు॑ణస్య దూ॒తం య॒మస్య॒ యోనౌ॑ శకు॒నం భు॑ర॒ణ్యుం . ఆప్యా॑యస్వ॒ సమే॑తు తే

వి॒శ్వతః॑ సోమ॒ వృష్ణి॑యం . భవా॒ వాజ॑స్య సంగ॒థే . యో రు॒ద్రో అ॒గ్నౌ యో

అ॒ప్సు య ఓష॑ధీషు॒ యో రు॒ద్రో విశ్వా॒ భువ॑నా వి॒వేశ॒ తస్మై॑ రు॒ద్రాయ॒ నమో॑

అస్తు .. ఇ॒దం విష్ణు॒ర్విచ॑క్రమే త్రే॒ధా నిద॑ధే ప॒దం . సమూ॑ఢమస్య పాగ్ం సు॒రే

. ఇంద్రం॒ విశ్వా॑ అవీవృధంత్సము॒ద్రవ్య॑చసం॒గిరో॑ ర॒థీత॑మగ్ం రథీ॒నాం

వాజా॑నా॒గ్ం॒ సత్ప॑తిం॒ పతిం᳚ . ఆపో॒ వా ఇ॒దగ్ం సర్వం॒ విశ్వా॑ భూ॒తాన్యాపః॑

ప్రా॒ణా వా ఆపః॑ ప॒శవ॒ ఆపోఽన్న॒మాపోఽమృ॑త॒మాప॑స్సం॒రాడాపో॑

వి॒రాడాప॑స్స్వ॒రాడాప॒శ్ఛందా॒గ్॒స్యాపో॒ జ్యోతీ॒గ్॒ష్యాపో॒

యజూ॒గ్॒ష్యాప॑స్స॒త్యమాప॒స్సర్వా॑ దే॒వతా॒ ఆపో॒ భూర్భువ॒స్సువ॒రాప॒ ఓం ..

అ॒పః ప్రణ॑యతి . శ్ర॒ద్ధా వా ఆపః॑ . శ్ర॒ద్ధామే॒వారభ్య॑ ప్ర॒ణీయ॒ ప్రచ॑రతి .

య॒జ్ఞో వా ఆపః॑ . య॒జ్ఞమే॒వారభ్య॑ ప్ర॒ణీయ॒ ప్రచ॑రతి . అ॒పః ప్రణ॑యతి . వజ్రో॒

వా ఆపః॑ . వజ్ర॑మే॒వ భ్రాతృ॑వ్యేభ్యః ప్ర॒హృత్య॑ ప్ర॒ణీయ॒ ప్రచ॑రతి . అ॒పః

ప్రణ॑యతి . ఆపో॒ వై ర॑క్షో॒ఘ్నీః . రక్ష॑సా॒మప॑హత్యై . అ॒పః ప్రణ॑యతి . ఆపో॒

వై దే॒వానాం᳚ ప్రి॒యం ధామ॑ . దే॒వానా॑మే॒వ ప్రి॒యం ధామ॑ ప్ర॒ణీయ॒ ప్రచ॑రతి

. అ॒పః ప్రణ॑యతి . ఆపో॒ వై సర్వా॑ దే॒వతాః᳚ . దేవతా॑ ఏ॒వారభ్య॑ ప్ర॒ణీయ॒

ప్రచ॑రతి . అ॒పః ప్రణ॑యతి . ఆపో॒ వై శాం॒తాః . శాం॒తాభి॑రే॒వాస్య॒ శుచగ్ం॑

శమయతి . దే॒వో వః॑ సవి॒తోత్పు॑నా॒త్వచ్ఛి॑ద్రేణ ప॒విత్రే॑ణ॒ వసో॒స్సూర్య॑స్య

ర॒శ్మిభిః॑ ..

కూర్చాగ్రైః రాక్షసాన్ ఘోరాన్ ఛింధి కర్మవిఘాతినః .

త్వామర్పయామి కుంభేఽస్మిన్ సాఫల్యం కురు కర్మణి .. 1 ..

వృక్షరాజ సముద్భూతాః శాఖాయాః పల్లవత్వచః .

యుష్మాన్ కుంభేష్వర్పయామి సర్వపాపాపనుత్తయే .. 2 ..

నాలికేర సముద్భూత త్రినేత్ర హరసత్తమ .

శిఖయా దురితం సర్వం పాపం పీడాం చ మే నుద .. 3 ..

స హి రత్నా॑ని దా॒శుషే᳚ సు॒వాతి॑ స॒వి॒తా భగః॑ . తం భా॒గం చి॒త్రమీ॑మహే ..

.. వరుణాఽవాహనం ..

ఓం తత్త్వా॑యామి॒ బ్రహ్మ॑ణా॒ వంద॑మాన॒స్తదాశా᳚స్తే॒ యజ॑మానో హ॒విర్భిః॑ . అహే॑డమానో

వరుణే॒హ బో॒ధ్యురు॑శగ్ం స॒ మా న॒ ఆయుః॒ ప్రమో॑షీః .. ఓం భూర్భువస్సువరోం . అస్మిన్

కుంభే వరుణమావాహయామి . వరుణస్య ఇదమాసనం . వరుణాయ నమః . ప్రచేతసే నమః . సురూపిణే

నమః . అపాం పతయే నమః . మకరవాహనాయ నమః . జలాఽధిపతయే నమః . పాశహస్తాయ నమః .

సర్వతీర్థాధిపతయే నమః . సకలారాధనైః స్వర్చితం .. (అథ పుణ్యాహవాచనం కుర్యాత్)

.. పవమానసూక్తం ..

ఓం .. హిర॑ణ్యవర్ణాః॒ శుచ॑యః పావ॒కా యాసు॑ జా॒తః క॒శ్యపో॒ యాస్వింద్రః॑ .

అ॒గ్నిం యా గర్భం॑ దధి॒రే విరూ॑పా॒స్తా న॒ ఆప॒శ్శగ్గ్ స్యో॒నా భ॑వంతు ..

యాసా॒గ్ం॒ రాజా॒ వరు॑ణో॒ యాతి॒ మధ్యే॑ సత్యానృ॒తే అ॑వ॒పశ్యం॒ జనా॑నాం .

మ॒ధు॒శ్చుత॒శ్శుచ॑యో॒ యాః పా॑వ॒కాస్తా న॒ ఆప॒శ్శగ్గ్ స్యో॒నా భ॑వంతు ..

యాసాం᳚ దే॒వా ది॒వి కృ॒ణ్వంతి॑ భ॒క్షం యా అం॒తరి॑క్షే బహు॒ధా భవం॑తి . యాః

పృ॑థి॒వీం పయ॑సోం॒దంతి శు॒క్రాస్తా న॒ ఆప॒శ్శగ్గ్ స్యో॒నా భ॑వంతు .. శి॒వేన॑

మా॒ చక్షు॑షా పశ్యతాపశ్శి॒వయా॑ త॒నువోప॑ స్పృశత॒ త్వచం॑ మే . సర్వాగ్ం॑

అ॒గ్నీగ్ం ర॑ప్సు॒షదో॑ హువే వో॒ మయి॒ వర్చో॒ బల॒మోజో॒ నిధ॑త్త ..

పవ॑మాన॒స్సువ॒ర్జనః॑ . ప॒విత్రే॑ణ॒ విచ॑ర్షణిః . యః పోతా॒ స పు॑నాతు మా .

పు॒నంతు॑ మా దేవజ॒నాః . పు॒నంతు॒ మన॑వో ధి॒యా . పు॒నంతు॒ విశ్వ॑ ఆ॒యవః॑ .

జాత॑వేదః ప॒విత్ర॑వత్ . ప॒విత్రే॑ణ పునాహి మా . శు॒క్రేణ॑ దేవ॒దీద్య॑త్ . అగ్నే॒

క్రత్వా॒ క్రతూ॒గ్ం॒ రను॑ . యత్తే॑ ప॒విత్ర॑మ॒ర్చిషి॑ . అగ్నే॒ విత॑తమంత॒రా .

బ్రహ్మ॒ తేన॑ పునీమహే . ఉ॒భాభ్యాం᳚ దేవసవితః . ప॒విత్రే॑ణ స॒వేన॑ చ . ఇ॒దం

బ్రహ్మ॑ పునీమహే . వై॒శ్వ॒దే॒వీ పు॑న॒తీ దే॒వ్యాగా᳚త్ . యస్యై॑ బ॒హ్వీస్త॒నువో॑

వీ॒తపృ॑ష్ఠాః . తయా॒ మదం॑తః సధ॒మాద్యే॑షు . వ॒యగ్గ్ స్యా॑మ॒ పత॑యో

రయీ॒ణాం . వై॒శ్వా॒న॒రో ర॒శ్మిభి॑ర్మా పునాతు . వాతః॑ ప్రా॒ణేనే॑షి॒రో మ॑యో॒

భూః . ద్యావా॑పృథి॒వీ పయ॑సా॒ పయో॑భిః . ఋ॒తావ॑రీ య॒జ్ఞియే॑ మా పునీతాం ..

బృ॒హద్భిః॑ సవిత॒స్తృభిః॑ . వర్షి॑ష్ఠై-ర్దేవ॒మన్మ॑భిః . అగ్నే॒ దక్షైః᳚

పునాహి మా . యేన॑ దే॒వా అపు॑నత . యేనాపో॑ ది॒వ్యంకశః॑ . తేన॑ ది॒వ్యేన॒ బ్రహ్మ॑ణా

. ఇ॒దం బ్రహ్మ॑ పునీమహే . యః పా॑వమా॒నీర॒ద్ధ్యేతి॑ . ఋషి॑భి॒స్సంభృ॑త॒గ్ం॒

రసం᳚ . సర్వ॒గ్ం॒ స పూ॒తమ॑శ్నాతి . స్వ॒ది॒తం మా॑త॒రిశ్వ॑నా . పా॒వ॒మా॒నీర్యో

అ॒ధ్యేతి॑ . ఋషి॑భి॒స్సంభృ॑త॒గ్ం॒ రసం᳚ . తస్మై॒ సర॑స్వతీ దుహే .

క్షీ॒రగ్ం స॒ర్పిర్మధూ॑ద॒కం .. పా॒వ॒మా॒నీస్స్వ॒స్త్యయ॑నీః . సు॒దుఘా॒హి

పయ॑స్వతీః . ఋషి॑భి॒స్సంభృ॑తో॒ రసః॑ . బ్రా॒హ్మ॒ణేష్వ॒మృతగ్ం॑ హి॒తం

. పా॒వ॒మా॒నీర్ది॑శంతు నః . ఇ॒మం లో॒కమథో॑ అ॒ముం . కామాం॒థ్సమ॑ర్ధయంతు

నః . దే॒వీ-ర్దే॒వైః స॒మాభృ॑తాః . పా॒వ॒మా॒నీస్స్వ॒స్త్యయ॑నీః . సు॒దుఘా॒హి

ఘృ॑త॒శ్చుతః॑ . ఋషి॑భిః॒ సంభృ॑తో॒ రసః॑ . బ్రా॒హ్మ॒ణేష్వ॒మృతగ్ం॑

హి॒తం . యేన॑ దే॒వాః ప॒విత్రే॑ణ . ఆ॒త్మానం॑ పు॒నతే॒ సదా᳚ . తేన॑ స॒హస్ర॑ధారేణ

. పా॒వ॒మా॒న్యః పు॑నంతు మా . ప్రా॒జా॒ప॒త్యం ప॒విత్రం᳚ . శ॒తోద్యా॑మగ్ం హిర॒ణ్మయం᳚

. తేన॑ బ్రహ్మ॒ విదో॑ వ॒యం . పూ॒తం బ్రహ్మ॑ పునీమహే . ఇంద్ర॑స్సునీ॒తీ స॒హమా॑

పునాతు . సోమ॑స్స్వ॒స్త్యా వ॑రుణస్స॒మీచ్యా᳚ . య॒మో రాజా᳚ ప్రమృ॒ణాభిః॑ పునాతు మా .

జా॒తవే॑దా మో॒ర్జయం॑త్యా పునాతు . భూర్భువ॒స్సువః॑ ..

ఓం తచ్ఛం॒ యోరావృ॑ణీమహే . గా॒తుం య॒జ్ఞాయ॑ . గా॒తుం య॒జ్ఞప॑తయే

. దైవీ᳚స్స్వ॒స్తిర॑స్తు నః . స్వ॒స్తిర్మాను॑షేభ్యః . ఊ॒ర్ధ్వం జి॑గాతు భేష॒జం .

శన్నో॑ అస్తు ద్వి॒పదే᳚ . శం చతు॑ష్పదే .. ఓం శాంతిః॒ శాంతిః॒ శాంతిః॑ ..

.. లఘున్యాసః ..

ఓం అథాత్మానగ్ం శివాత్మానగ్ శ్రీరుద్రరూపం ధ్యాయేత్ ..

శుద్ధస్ఫటికసంకాశం త్రినేత్రం పంచవక్త్రకం . గంగాధరం దశభుజం

సర్వాభరణభూషితం .. నీలగ్రీవం శశాంకాంకం నాగయజ్ఞోపవీతినం . వ్యాఘ్రచర్మోత్తరీయం

చ వరేణ్యమభయప్రదం .. కమండల్వక్షసూత్రాణాం ధారిణం శూలపాణినం . జ్వలంతం

పింగలజటా-శిఖాముద్యోతధారిణం .. వృషస్కంధ-సమారూఢం ఉమాదేహార్ధ-ధారిణం .

అమృతేనాప్లుతం శాంతం దివ్యభోగసమన్వితం .. దిగ్దేవతాసమాయుక్తం సురాసురనమస్కృతం . నిత్యం

చ శాశ్వతం శుద్ధం ధ్రువమక్షరమవ్యయం .. సర్వవ్యాపినమీశానం రుద్రం వై విశ్వరూపిణం .

ఏవం ధ్యాత్వా ద్విజసమ్యక్ తతో యజనమారభేత్ ..

ఓం ప్రజననే బ్రహ్మా తిష్ఠతు . పాదయోర్విష్ణుస్తిష్ఠతు . హస్తయోర్హరస్తిష్ఠతు .

బాహ్వోరింద్రస్తిష్ఠతు . జఠరేఽగ్నిస్తిష్ఠతు . హృదయే శివస్తిష్ఠతు . కంఠే

వసవస్తిష్ఠంతు . వక్త్రే సరస్వతీ తిష్ఠతు . నాసికయోర్వాయుస్తిష్ఠతు . నయనయోశ్చంద్రాదిత్యౌ

తిష్ఠేతాం . కర్ణయోరశ్వినౌ తిష్ఠేతాం . లలాటే రుద్రాస్తిష్ఠంతు . మూర్ధ్న్యాదిత్యాస్తిష్ఠంతు

. శిరసి మహాదేవస్తిష్ఠతు . శిఖాయాం వామదేవస్తిష్ఠతు . పృష్ఠే పినాకీ తిష్ఠతు .

పురతః శూలీ తిష్ఠతు . పార్శ్వయోః శివాశంకరౌ తిష్ఠేతాం . సర్వతో వాయుస్తిష్ఠతు . తతో

బహిః సర్వతోఽగ్నిర్జ్వాలామాలా పరివృతస్తిష్ఠతు . సర్వేష్వంగేషు సర్వా దేవతా యథాస్థానం

తిష్ఠంతు . మాగ్ం రక్షంతు . సర్వాన్ మహాజనాన్ రక్షంతు ..

ఓం అ॒గ్నిర్మే॑ వా॒చి శ్రి॒తః . వాగ్ధృద॑యే . హృద॑యం॒ మయి॑ . అ॒హమ॒మృతే᳚ .

అ॒మృతం॒ బ్రహ్మ॑ణి . వా॒యుర్మే᳚ ప్రా॒ణే శ్రి॒తః . ప్రా॒ణో హృద॑యే . హృద॑యం॒

మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి . సూర్యో॑ మే॒ చక్షుషి శ్రి॒తః .

చక్షు॒ర్హృద॑యే . హృద॑యం॒ మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి

. చం॒ద్రమా॑ మే॒ మన॑సి శ్రి॒తః . మనో॒ హృద॑యే . హృద॑యం॒ మయి॑ .

అ॒హమ॒మృతే᳚ . అ॒మృతం॒ బ్రహ్మ॑ణి . దిశో॑ మే॒ శ్రోత్రే᳚ శ్రి॒తాః . శ్రోత్ర॒గ్ం॒

హృద॑యే . హృద॑యం॒ మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి . ఆపో॑ మే॒

రేత॑సి శ్రి॒తాః . రేతో॒ హృద॑యే . హృద॑యం॒ మయి॑ . అ॒హమ॒మృతే᳚ . అ॒మృతం॒

బ్రహ్మ॑ణి . పృ॒థి॒వీ మే॒ శరీ॑రే శ్రి॒తా . శరీ॑ర॒గ్ం॒ హృద॑యే . హృద॑యం॒

మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి . ఓ॒ష॒ధి॒వ॒న॒స్ప॒తయో॑

మే॒ లోమ॑సు శ్రి॒తాః . లోమా॑ని॒ హృద॑యే . హృద॑యం॒ మయి॑ . అ॒హమ॒మృతే᳚ .

అ॒మృతం॒ బ్రహ్మ॑ణి . ఇంద్రో॑ మే॒ బలే᳚ శ్రి॒తః . బల॒గ్ం॒ హృద॑యే . హృద॑యం॒

మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి . ప॒ర్జన్యో॑ మే మూ॒ర్ధ్ని శ్రి॒తః .

మూ॒ర్ధా హృద॑యే . హృద॑యం॒ మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి .

ఈశా॑నో మే మ॒న్యౌ శ్రి॒తః . మ॒న్యుర్హృద॑యే . హృద॑యం॒ మయి॑ . అ॒హమ॒మృతే᳚ .

అ॒మృతం॒ బ్రహ్మ॑ణి . ఆ॒త్మా మ॑ ఆ॒త్మని॑ శ్రి॒తః . ఆ॒త్మా హృద॑యే . హృద॑యం॒

మయి॑ . అ॒హమ॒మృతే᳚ . అ॒మృతం॒ బ్రహ్మ॑ణి . పున॑ర్మ ఆ॒త్మా పున॒రాయు॒రాగా᳚త్ .

పునః॑ ప్రా॒ణః పున॒రాకూ॑త॒మాగా᳚త్ . వై॒శ్వా॒న॒రో ర॒శ్మిభి॑ర్వావృధా॒నః .

అం॒తస్తి॑ష్ఠత్వ॒మృత॑స్య గో॒పాః ..

అస్య శ్రీ రుద్రాధ్యాయ ప్రశ్న మహామంత్రస్య అఘోర ఋషిః, అనుష్టుప్ ఛందః,

సంకర్షణమూర్తిస్వరూపో యోఽసావాదిత్యః పరమపురుషః స ఏష రుద్రో దేవతా . నమః శివాయేతి

బీజం . శివతరాయేతి శక్తిః . మహాదేవాయేతి కీలకం . శ్రీ సాంబసదాశివ ప్రసాద సిద్ధ్యర్థే

జపే వినియోగః ..

ఓం అగ్నిహోత్రాత్మనే అంగుష్ఠాభ్యాం నమః . దర్శపూర్ణమాసాత్మనే తర్జనీభ్యాం నమః .

చాతుర్మాస్యాత్మనే మధ్యమాభ్యాం నమః . నిరూఢపశుబంధాత్మనే అనామికాభ్యాం నమః .

జ్యోతిష్టోమాత్మనే కనిష్ఠికాభ్యాం నమః . సర్వక్రత్వాత్మనే కరతలకరపృష్ఠాభ్యాం నమః

. అగ్నిహోత్రాత్మనే హృదయాయ నమః . దర్శపూర్ణమాసాత్మనే శిరసే స్వాహా . చాతుర్మాస్యాత్మనే

శిఖాయై వషట్ . నిరూఢపశుబంధాత్మనే కవచాయ హుం . జ్యోతిష్టోమాత్మనే నేత్రత్రయాయ వౌషట్

. సర్వక్రత్వాత్మనే అస్త్రాయ ఫట్ . భూర్భువస్సువరోమితి దిగ్బంధః .

.. ధ్యానం ..

ఆపాతాళ-నభః స్థలాంత-భువన-బ్రహ్మాండ-మావిస్ఫుర-

జ్జ్యోతిః స్ఫాటిక-లింగ-మౌళి-విలసత్పూర్ణేందు-వాంతామృతైః .

అస్తోకాప్లుత-మేక-మీశ-మనిశం రుద్రానువాకాంజపన్

ధ్యాయే-దీప్సిత-సిద్ధయే ధ్రువపదం విప్రోఽభిషించే-చ్ఛివం ..

బ్రహ్మాండవ్యాప్తదేహా భసితహిమరుచా భాసమానా భుజంగైః

కంఠే కాలాః కపర్దాకలిత శశికలా-శ్చండకోదండ హస్తాః ..

త్ర్యక్షా రుద్రాక్షమాలాః ప్రకటితవిభవాః శాంభవా మూర్తిభేదా

రుద్రాః శ్రీరుద్రసూక్త-ప్రకటితవిభవా నః ప్రయచ్ఛంతు సౌఖ్యం ..

ఓం గ॒ణానాం᳚ త్వా గ॒ణప॑తిగ్ం హవామహే క॒విం క॑వీ॒నాము॑ప॒మశ్ర॑వస్తమం .

జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభి॑స్సీద॒ సాద॑నం

.. మహాగణపతయే॒ నమః ..

ఓం శం చ॑ మే॒ మయ॑శ్చ మే ప్రి॒యం చ॑ మేఽనుకా॒మశ్చ॑ మే॒ కామ॑శ్చ మే

సౌమన॒సశ్చ॑ మే భ॒ద్రం చ॑ మే॒ శ్రేయ॑శ్చ మే॒ వస్య॑శ్చ మే॒ యశ॑శ్చ

మే॒ భగ॑శ్చ మే॒ ద్రవి॑ణం చ మే యం॒తా చ మే ధ॒ర్తా చ॑ మే॒ క్షేమ॑శ్చ మే॒

ధృతి॑శ్చ మే॒ విశ్వం॑ చ మే॒ మహ॑శ్చ మే సం॒విచ్చ॑ మే॒ జ్ఞాత్రం॑ చ మే॒

సూశ్చ॑ మే ప్ర॒సూశ్చ॑ మే॒ సీరం॑ చ మే ల॒యశ్చ॑ మ ఋ॒తం చ॑ మే॒ఽమృతం॑ చ

మేఽయ॒క్ష్మం చ॒ మేఽనా॑మయచ్చ మే జీ॒వాతుశ్చ మే దీర్ఘాయు॒త్వం చ॑ మేఽనమి॒త్రం

చ॒ మేఽభ॑యం చ మే సు॒గం చ॑ మే॒ శయ॑నం చ మే సూ॒షా చ॑ మే సు॒దినం॑

చ మే .. ఓం శాంతిః॒ శాంతిః॒ శాంతిః॑ ..

.. శివోపాసన మంత్రాః ..

నిధ॑నపతయే॒ నమః . నిధ॑నపతాంతికాయ॒ నమః . ఊర్ధ్వాయ॒ నమః . ఊర్ధ్వలింగాయ॒ నమః

. హిరణ్యాయ॒ నమః . హిరణ్యలింగాయ॒ నమః . సువర్ణాయ॒ నమః . సుర్వర్ణలింగాయ॒ నమః .

దివ్యాయ॒ నమః . దివ్యలింగాయ॒ నమః . భవాయ॒ నమః . భవలింగాయ॒ నమః . శర్వాయ॒

నమః . శర్వలింగాయ॒ నమః . శివాయ॒ నమః . శివలింగాయ॒ నమః . జ్వలాయ॒ నమః .

జ్వలలింగాయ॒ నమః . ఆత్మాయ॒ నమః . ఆత్మలింగాయ॒ నమః . పరమాయ॒ నమః . పరమలింగాయ॒

నమః . ఏతథ్సోమస్య॑ సూర్య॒స్య॒ సర్వలింగగ్గ్॑ స్థాప॒య॒తి॒ పాణిమంత్రం॑ పవి॒త్రం ..

స॒ద్యోజా॒తం ప్ర॑పద్యా॒మి స॒ద్యోజా॒తాయ॒ వై నమో॒ నమః॑ . భ॒వే భ॑వే॒

నాతి॑భవే భవస్వ॒ మాం . భ॒వోద్భ॑వాయ॒ నమః॑ .. వా॒మ॒దే॒వాయ॒ నమో᳚

జ్యే॒ష్ఠాయ॒ నమ॑శ్శ్రే॒ష్ఠాయ॒ నమో॑ రు॒ద్రాయ॒ నమః॒ కాలా॑య॒ నమః॒

కల॑వికరణాయ॒ నమో॒ బల॑వికరణాయ॒ నమో॒ బలా॑య॒ నమో॒ బల॑ప్రమథనాయ॒

నమ॒స్సర్వ॑భూతదమనాయ॒ నమో॑ మ॒నోన్మ॑నాయ॒ నమః॑ .. అ॒ఘోరే᳚భ్యోఽథ॒

ఘోరే᳚భ్యో॒ ఘోర॒ఘోర॑తరేభ్యః . సర్వే᳚భ్యః సర్వ॒శర్వే᳚భ్యో॒ నమ॑స్తే

అస్తు రు॒ద్రరూ॑పేభ్యః .. తత్పురు॑షాయ వి॒ద్మహే॑ మహాదే॒వాయ॑ ధీమహి . తన్నో॑

రుద్రః ప్రచో॒దయా᳚త్ .. ఈశాన-స్స॑ర్వవిద్యా॒నా॒-మీశ్వర-స్సర్వ॑ భూతా॒నాం॒

బ్రహ్మాఽధి॑పతి॒ర్బ్రహ్మ॒ణోఽధి॑పతి॒ర్బ్రహ్మా॑ శి॒వో మే॑ అస్తు సదాశి॒వోం ..

నమో హిరణ్యబాహవే హిరణ్యవర్ణాయ హిరణ్యరూపాయ హిరణ్యపతయేఽమ్బికాపతయ ఉమాపతయే పశుపతయే॑

నమో॒ నమః . ఋ॒తగ్ం స॒త్యం ప॑రం బ్ర॒హ్మ॒ పు॒రుషం॑ కృష్ణ॒పింగ॑లం .

ఊ॒ర్ధ్వరే॑తం వి॑రూపా॒క్షం॒ వి॒శ్వరూ॑పాయ॒ వై నమో॒ నమః॑ .. సర్వో॒ వై

రు॒ద్ర-స్తస్మై॑ రు॒ద్రాయ॒ నమో॑ అస్తు . పురు॑షో॒ వై రు॒ద్ర-స్సన్మ॒హో నమో॒

నమః॑ . విశ్వం॑ భూ॒తం భువ॑నం చి॒త్రం బ॑హు॒ధా జా॒తం జాయ॑మానం చ॒ యత్ .

సర్వో॒ హ్యే॑ష రు॒ద్ర-స్తస్మై॑ రు॒ద్రాయ॒ నమో॑ అస్తు . కద్రు॒ద్రాయ॒ ప్రచే॑తసే

మీ॒ఢుష్ట॑మాయ॒ తవ్య॑సే . వో॒ చేమ॒ శంత॑మగ్ం హృ॒దే . సర్వో॒ హ్యే॑ష

రు॒ద్ర-స్తస్మై॑ రు॒ద్రాయ॒ నమో॑ అస్తు ..

.. శ్రీ రుద్రప్రశ్నః ..

ఓం నమో భగవతే॑ రుద్రా॒య ..

ఓం నమ॑స్తే రుద్ర మ॒న్యవ॑ ఉ॒తోత॒ ఇష॑వే॒ నమః॑ . నమ॑స్తే అస్తు॒ ధన్వ॑నే

బా॒హుభ్యా॑ము॒త తే॒ నమః॑ . యా త॒ ఇషుః॑ శి॒వత॑మా శి॒వం బ॒భూవ॑ తే॒

ధనుః॑ . శి॒వా శ॑ర॒వ్యా॑ యా తవ॒ తయా॑ నో రుద్ర మృడయ . యా తే॑ రుద్ర శి॒వా

త॒నూరఘో॒రాఽపా॑పకాశినీ . తయా॑ నస్త॒నువా॒ శంత॑మయా॒ గిరి॑శంతా॒భిచా॑కశీహి

. యామిషుం॑ గిరిశంత॒ హస్తే॒ బిభ॒ర్ష్యస్త॑వే . శి॒వాం గి॑రిత్ర॒ తాం కు॑రు॒ మా

హిగ్ం॑సీః॒ పురు॑షం॒ జగ॑త్ . శి॒వేన॒ వచ॑సా త్వా॒ గిరి॒శాచ్ఛా॑వదామసి . యథా॑

నః॒ సర్వ॒మిజ్జగ॑దయ॒క్ష్మగ్ం సు॒మనా॒ అస॑త్ . అధ్య॑వోచదధివ॒క్తా ప్ర॑థ॒మో

దైవ్యో॑ భి॒షక్ . అహీగ్॑శ్చ॒ సర్వాం᳚జం॒భయం॒త్సర్వా᳚శ్చ యాతుధా॒న్యః॑ . అ॒సౌ

యస్తా॒మ్రో అ॑రు॒ణ ఉ॒త బ॒భ్రుః సు॑మం॒గలః॑ . యే చే॒మాగ్ం రు॒ద్రా అ॒భితో॑ ది॒క్షు

శ్రి॒తాః స॑హస్ర॒శోఽవై॑షా॒గ్ం॒ హేడ॑ ఈమహే . అ॒సౌ యో॑ఽవ॒సర్ప॑తి॒ నీల॑గ్రీవో॒

విలో॑హితః . ఉ॒తైనం॑ గో॒పా అ॑దృశ॒న్నదృ॑శన్నుదహా॒ర్యః॑ . ఉ॒తైనం॒ విశ్వా॑

భూ॒తాని॒ స దృ॒ష్టో మృ॑డయాతి నః . నమో॑ అస్తు॒ నీల॑గ్రీవాయ సహస్రా॒క్షాయ॑

మీ॒ఢుషే᳚ . అథో॒ యే అ॑స్య॒ సత్త్వా॑నో॒ఽహం తేభ్యో॑ఽకర॒న్నమః॑ . ప్రముం॑చ॒

ధన్వ॑న॒స్త్వము॒భయో॒రార్త్ని॑యో॒ర్జ్యాం . యాశ్చ॑ తే॒ హస్త॒ ఇష॑వః॒ పరా॒ తా

భ॑గవో వప . అ॒వ॒తత్య॒ ధను॒స్తవగ్ం సహ॑స్రాక్ష॒ శతే॑షుధే . ని॒శీర్య॑

శ॒ల్యానాం॒ ముఖా॑ శి॒వో నః॑ సు॒మనా॑ భవ . విజ్యం॒ ధనుః॑ కప॒ర్దినో॒

విశ॑ల్యో॒ బాణ॑వాగ్ం ఉ॒త . అనే॑శన్న॒స్యేష॑వ ఆ॒భుర॑స్య నిషం॒గథిః॑

. యా తే॑ హే॒తిర్మీ॑ఢుష్టమ॒ హస్తే॑ బ॒భూవ॑ తే॒ ధనుః॑ . తయా॒ఽస్మాన్,

వి॒శ్వత॒స్త్వమ॑య॒క్ష్మయా॒ పరి॑బ్భుజ . నమ॑స్తే అ॒స్త్వాయు॑ధా॒యానా॑తతాయ

ధృ॒ష్ణవే᳚ . ఉ॒భాభ్యా॑ము॒త తే॒ నమో॑ బా॒హుభ్యాం॒ తవ॒ ధన్వ॑నే . పరి॑

తే॒ ధన్వ॑నో హే॒తిర॒స్మాన్వృ॑ణక్తు వి॒శ్వతః॑ . అథో॒ య ఇ॑షు॒ధిస్తవా॒రే

అ॒స్మన్నిధే॑హి॒ తం .. 1 ..

శంభ॑వే॒ నమః॑ . నమ॑స్తే అస్తు భగవన్విశ్వేశ్వ॒రాయ॑ మహాదే॒వాయ॑ త్ర్యంబ॒కాయ॑

త్రిపురాంత॒కాయ॑ త్రికాగ్నికా॒లాయ॑ కాలాగ్నిరు॒ద్రాయ॑ నీలకం॒ఠాయ॑ మృత్యుంజ॒యాయ॑

సర్వేశ్వ॒రాయ॑ సదాశి॒వాయ॑ శ్రీమన్మహాదే॒వాయ॒ నమః॑ ..

నమో॒ హిర॑ణ్యబాహవే సేనా॒న్యే॑ ది॒శాం చ॒ పత॑యే॒ నమో॒ నమో॑ వృ॒క్షేభ్యో॒

హరి॑కేశేభ్యః పశూ॒నాం పత॑యే॒ నమో॒ నమః॑ స॒స్పింజ॑రాయ॒ త్విషీ॑మతే

పథీ॒నాం పత॑యే॒ నమో॒ నమో॑ బభ్లు॒శాయ॑ వివ్యా॒ధినేఽన్నా॑నాం॒ పత॑యే॒ నమో॒

నమో॒ హరి॑కేశాయోపవీ॒తినే॑ పు॒ష్టానాం॒ పత॑యే॒ నమో॒ నమో॑ భ॒వస్య॑ హే॒త్యై

జగ॑తాం॒ పత॑యే॒ నమో॒ నమో॑ రు॒ద్రాయా॑తతా॒వినే॒ క్షేత్రా॑ణాం॒ పత॑యే॒ నమో॒

నమః॑ సూ॒తాయాహం॑త్యాయ॒ వనా॑నాం॒ పత॑యే॒ నమో॒ నమో॒ రోహి॑తాయ స్థ॒పత॑యే

వృ॒క్షాణాం॒ పత॑యే॒ నమో॒ నమో॑ మం॒త్రిణే॑ వాణి॒జాయ॒ కక్షా॑ణాం॒ పత॑యే॒

నమో॒ నమో॑ భువం॒తయే॑ వారివస్కృ॒తాయౌష॑ధీనాం॒ పత॑యే॒ నమో॒ నమ॑

ఉ॒చ్చైర్ఘో॑షాయాక్రం॒దయ॑తే పత్తీ॒నాం పత॑యే॒ నమో॒ నమః॑ కృత్స్నవీ॒తాయ॒

ధావ॑తే॒ సత్త్వ॑నాం॒ పత॑యే॒ నమః॑ .. 2 ..

నమః॒ సహ॑మానాయ నివ్యా॒ధిన॑ ఆవ్యా॒ధినీ॑నాం॒ పత॑యే॒ నమో॒ నమః॑ కకు॒భాయ॑

నిషం॒గిణే᳚ స్తే॒నానాం॒ పత॑యే॒ నమో॒ నమో॑ నిషం॒గిణ॑ ఇషుధి॒మతే॒

తస్క॑రాణాం॒ పత॑యే॒ నమో॒ నమో॒ వంచ॑తే పరి॒వంచ॑తే స్తాయూ॒నాం పత॑యే॒

నమో॒ నమో॑ నిచే॒రవే॑ పరిచ॒రాయార॑ణ్యానాం॒ పత॑యే॒ నమో॒ నమః॑ సృకా॒విభ్యో॒

జిఘాగ్ం॑సద్భ్యో ముష్ణ॒తాం పత॑యే॒ నమో॒ నమో॑ఽసి॒మద్భ్యో॒ నక్తం॒చర॑ద్భ్యః

ప్రకృం॒తానాం॒ పత॑యే॒ నమో॒ నమ॑ ఉష్ణీ॒షిణే॑ గిరిచ॒రాయ॑ కులుం॒చానాం॒

పత॑యే॒ నమో॒ నమ॒ ఇషు॑మద్భ్యో ధన్వా॒విభ్య॑శ్చ వో॒ నమో॒ నమ॑ ఆతన్వా॒నేభ్యః॑

ప్రతి॒దధా॑నేభ్యశ్చ వో॒ నమో॒ నమ॑ ఆ॒యచ్ఛ॑ద్భ్యో విసృ॒జద్భ్య॑శ్చ వో॒ నమో॒

నమోఽస్య॑ద్భ్యో॒ విధ్య॑ద్భ్యశ్చ వో॒ నమో॒ నమ॒ ఆసీ॑నేభ్యః॒ శయా॑నేభ్యశ్చ

వో॒ నమో॒ నమః॑ స్వ॒పద్భ్యో॒ జాగ్ర॑ద్భ్యశ్చ వో॒ నమో॒ నమ॒స్తిష్ఠ॑ద్భ్యో॒

ధావ॑ద్భ్యశ్చ వో॒ నమో॒ నమః॑ స॒భాభ్యః॑ స॒భాప॑తిభ్యశ్చ వో॒ నమో॒ నమో॒

అశ్వే॒భ్యోఽశ్వ॑పతిభ్యశ్చ వో॒ నమః॑ .. 3 ..

నమ॑ ఆవ్య॒ధినీ᳚భ్యో వి॒విధ్యం॑తీభ్యశ్చ వో॒ నమో॒ నమ॒

ఉగ॑ణాభ్యస్తృగ్ంహ॒తీభ్య॑శ్చ వో॒ నమో॒ నమో॑ గృ॒త్సేభ్యో॑ గృ॒త్సప॑తిభ్యశ్చ

వో॒ నమో॒ నమో॒ వ్రాతే᳚భ్యో॒ వ్రాత॑పతిభ్యశ్చ వో॒ నమో॒ నమో॑ గ॒ణేభ్యో॑

గ॒ణప॑తిభ్యశ్చ వో॒ నమో॒ నమో॒ విరూ॑పేభ్యో వి॒శ్వరూ॑పేభ్యశ్చ వో॒ నమో॒ నమో॑

మ॒హద్భ్యః॑, క్షుల్ల॒కేభ్య॑శ్చ వో॒ నమో॒ నమో॑ ర॒థిభ్యో॑ఽర॒థేభ్య॑శ్చ

వో॒ నమో॒ నమో॒ రథే᳚భ్యో॒ రథ॑పతిభ్యశ్చ వో॒ నమో॒ నమః॒ సేనా᳚భ్యః

సేనా॒నిభ్య॑శ్చ వో॒ నమో॒ నమః॑, క్ష॒త్తృభ్యః॑ సంగ్రహీ॒తృభ్య॑శ్చ వో॒ నమో॒

నమ॒స్తక్ష॑భ్యో రథకా॒రేభ్య॑శ్చ వో॒ నమో॒ నమః॒ కులా॑లేభ్యః క॒ర్మారే᳚భ్యశ్చ

వో॒ నమో॒ నమః॑ పుం॒జిష్టే᳚భ్యో నిషా॒దేభ్య॑శ్చ వో॒ నమో॒ నమ॑ ఇషు॒కృద్భ్యో॑

ధన్వ॒కృద్భ్య॑శ్చ వో॒ నమో॒ నమో॑ మృగ॒యుభ్యః॑ శ్వ॒నిభ్య॑శ్చ వో॒ నమో॒

నమః॒ శ్వభ్యః॒ శ్వప॑తిభ్యశ్చ వో॒ నమః॑ .. 4 ..

నమో॑ భ॒వాయ॑ చ రు॒ద్రాయ॑ చ॒ నమః॑ శ॒ర్వాయ॑ చ పశు॒పత॑యే చ॒ నమో॒

నీల॑గ్రీవాయ చ శితి॒కంఠా॑య చ॒ నమః॑ కప॒ర్దినే॑ చ॒ వ్యు॑ప్తకేశాయ చ॒ నమః॑

సహస్రా॒క్షాయ॑ చ శ॒తధ॑న్వనే చ॒ నమో॑ గిరి॒శాయ॑ చ శిపివి॒ష్టాయ॑ చ॒

నమో॑ మీ॒ఢుష్ట॑మాయ॒ చేషు॑మతే చ॒ నమో᳚ హ్ర॒స్వాయ॑ చ వామ॒నాయ॑ చ॒ నమో॑

బృహ॒తే చ॒ వర్షీ॑యసే చ॒ నమో॑ వృ॒ద్ధాయ॑ చ సం॒వృధ్వ॑నే చ॒ నమో॒

అగ్రి॑యాయ చ ప్రథ॒మాయ॑ చ॒ నమ॑ ఆ॒శవే॑ చాజి॒రాయ॑ చ॒ నమః॒ శీఘ్రి॑యాయ

చ॒ శీభ్యా॑య చ॒ నమ॑ ఊ॒ర్మ్యా॑య చావస్వ॒న్యా॑య చ॒ నమః॑ స్రోత॒స్యా॑య చ॒

ద్వీప్యా॑య చ .. 5 ..

నమో᳚ జ్యే॒ష్ఠాయ॑ చ కని॒ష్ఠాయ॑ చ॒ నమః॑ పూర్వ॒జాయ॑ చాపర॒జాయ॑ చ॒

నమో॑ మధ్య॒మాయ॑ చాపగ॒ల్భాయ॑ చ॒ నమో॑ జఘ॒న్యా॑య చ॒ బుధ్ని॑యాయ చ॒

నమః॑ సో॒భ్యా॑య చ ప్రతిస॒ర్యా॑య చ॒ నమో॒ యామ్యా॑య చ॒ క్షేమ్యా॑య చ॒

నమ॑ ఉర్వ॒ర్యా॑య చ॒ ఖల్యా॑య చ॒ నమః॒ శ్లోక్యా॑య చాఽవసా॒న్యా॑య చ॒

నమో॒ వన్యా॑య చ॒ కక్ష్యా॑య చ॒ నమః॑ శ్ర॒వాయ॑ చ ప్రతిశ్ర॒వాయ॑ చ॒

నమ॑ ఆ॒శుషే॑ణాయ చా॒శుర॑థాయ చ॒ నమః॒ శూరా॑య చావభింద॒తే చ॒ నమో॑

వ॒ర్మిణే॑ చ వరూ॒థినే॑ చ॒ నమో॑ బి॒ల్మినే॑ చ కవ॒చినే॑ చ॒ నమః॑ శ్రు॒తాయ॑

చ శ్రుతసే॒నాయ॑ చ .. 6 ..

నమో॑ దుందు॒భ్యా॑య చాహన॒న్యా॑య చ॒ నమో॑ ధృ॒ష్ణవే॑ చ ప్రమృ॒శాయ॑

చ॒ నమో॑ దూ॒తాయ॑ చ॒ ప్రహి॑తాయ చ॒ నమో॑ నిషం॒గిణే॑ చేషుధి॒మతే॑

చ॒ నమ॑స్తీ॒క్ష్ణేష॑వే చాయు॒ధినే॑ చ॒ నమః॑ స్వాయు॒ధాయ॑ చ సు॒ధన్వ॑నే

చ॒ నమః॒ స్రుత్యా॑య చ॒ పథ్యా॑య చ॒ నమః॑ కా॒ట్యా॑య చ నీ॒ప్యా॑య చ॒

నమః॒ సూద్యా॑య చ సర॒స్యా॑య చ॒ నమో॑ నా॒ద్యాయ॑ చ వైశం॒తాయ॑ చ॒ నమః॒

కూప్యా॑య చావ॒ట్యా॑య చ॒ నమో॒ వర్ష్యా॑య చావ॒ర్ష్యాయ॑ చ॒ నమో॑ మే॒ఘ్యా॑య

చ విద్యు॒త్యా॑య చ॒ నమ॑ ఈ॒ధ్రియా॑య చాత॒ప్యా॑య చ॒ నమో॒ వాత్యా॑య చ॒

రేష్మి॑యాయ చ॒ నమో॑ వాస్త॒వ్యా॑య చ వాస్తు॒ పాయ॑ చ .. 7 ..

నమః॒ సోమా॑య చ రు॒ద్రాయ॑ చ॒ నమ॑స్తా॒మ్రాయ॑ చారు॒ణాయ॑ చ॒ నమః॑ శం॒గాయ॑

చ పశు॒పత॑యే చ॒ నమ॑ ఉ॒గ్రాయ॑ చ భీ॒మాయ॑ చ॒ నమో॑ అగ్రేవ॒ధాయ॑

చ దూరేవ॒ధాయ॑ చ॒ నమో॑ హం॒త్రే చ॒ హనీ॑యసే చ॒ నమో॑ వృ॒క్షేభ్యో॒

హరి॑కేశేభ్యో॒ నమ॑స్తా॒రాయ॒ నమ॑శ్శం॒భవే॑ చ మయో॒భవే॑ చ॒ నమః॑

శంక॒రాయ॑ చ మయస్క॒రాయ॑ చ॒ నమః॑ శి॒వాయ॑ చ శి॒వత॑రాయ చ॒

నమ॒స్తీర్థ్యా॑య చ॒ కూల్యా॑య చ॒ నమః॑ పా॒ర్యా॑య చావా॒ర్యా॑య చ॒ నమః॑

ప్ర॒తర॑ణాయ చో॒త్తర॑ణాయ చ॒ నమ॑ ఆతా॒ర్యా॑య చాలా॒ద్యా॑య చ॒ నమః॒

శష్ప్యా॑య చ॒ ఫేన్యా॑య చ॒ నమః॑ సిక॒త్యా॑య చ ప్రవా॒హ్యా॑య చ .. 8 ..

నమ॑ ఇరి॒ణ్యా॑య చ ప్రప॒థ్యా॑య చ॒ నమః॑ కిగ్ంశి॒లాయ॑ చ॒ క్షయ॑ణాయ చ॒

నమః॑ కప॒ర్దినే॑ చ పుల॒స్తయే॑ చ॒ నమో॒ గోష్ఠ్యా॑య చ॒ గృహ్యా॑య చ॒

నమ॒స్తల్ప్యా॑య చ॒ గేహ్యా॑య చ॒ నమః॑ కా॒ట్యా॑య చ గహ్వరే॒ష్ఠాయ॑ చ॒ నమో᳚

హ్రద॒య్యా॑య చ నివే॒ష్ప్యా॑య చ॒ నమః॑ పాగ్ం స॒వ్యా॑య చ రజ॒స్యా॑య చ॒ నమః॒

శుష్క్యా॑య చ హరి॒త్యా॑య చ॒ నమో॒ లోప్యా॑య చోల॒ప్యా॑య చ॒ నమ॑ ఊ॒ర్వ్యా॑య

చ సూ॒ర్మ్యా॑య చ॒ నమః॑ ప॒ర్ణ్యా॑య చ పర్ణశ॒ద్యా॑య చ॒ నమో॑ఽపగు॒రమా॑ణాయ

చాభిఘ్న॒తే చ॒ నమ॑ ఆఖ్ఖిద॒తే చ॑ ప్రఖ్ఖిద॒తే చ॒ నమో॑ వః కిరి॒కేభ్యో॑

దే॒వానా॒గ్ం॒ హృద॑యేభ్యో॒ నమో॑ విక్షీణ॒కేభ్యో॒ నమో॑ విచిన్వ॒త్కేభ్యో॒ నమ॑

ఆనిర్హ॒తేభ్యో॒ నమ॑ ఆమీవ॒త్కేభ్యః॑ .. 9 ..

ద్రాపే॒ అంధ॑సస్పతే॒ దరి॑ద్ర॒న్నీల॑లోహిత . ఏ॒షాం పురు॑షాణామే॒షాం ప॑శూ॒నాం

మా భేర్మాఽరో॒ మో ఏ॑షాం॒ కించ॒నామ॑మత్ . యా తే॑ రుద్ర శి॒వా త॒నూః శి॒వా

వి॒శ్వాహ॑భేషజీ . శి॒వా రు॒ద్రస్య॑ భేష॒జీ తయా॑ నో మృడ జీ॒వసే᳚ . ఇ॒మాగ్ం

రు॒ద్రాయ॑ త॒వసే॑ కప॒ర్దినే᳚ క్ష॒యద్వీ॑రాయ॒ ప్రభ॑రామహే మ॒తిం . యథా॑

నః॒ శమస॑ద్ద్వి॒పదే॒ చతు॑ష్పదే॒ విశ్వం॑ పు॒ష్టం గ్రామే॑ అ॒స్మిన్ననా॑తురం

. మృ॒డా నో॑ రుద్రో॒త నో॒ మయ॑స్కృధి క్ష॒యద్వీ॑రాయ॒ నమ॑సా విధేమ తే .

యచ్ఛం చ॒ యోశ్చ॒ మను॑రాయ॒జే పి॒తా తద॑శ్యామ॒ తవ॑ రుద్ర॒ ప్రణీ॑తౌ .

మా నో॑ మ॒హాంత॑ము॒త మా నో॑ అర్భ॒కం మా న॒ ఉక్షం॑తము॒త మా న॑ ఉక్షి॒తం .

మా నో॑ఽవధీః పి॒తరం॒ మోత మా॒తరం॑ ప్రి॒యా మా న॑స్త॒నువో॑ రుద్ర రీరిషః . మా

న॑స్తో॒కే తన॑యే॒ మా న॒ ఆయు॑షి॒ మా నో॒ గోషు॒ మా నో॒ అశ్వే॑షు రీరిషః . వీ॒రాన్మా

నో॑ రుద్ర భామి॒తోఽవ॑ధీర్హ॒విష్మం॑తో॒ నమ॑సా విధేమ తే . ఆ॒రాత్తే॑ గో॒ఘ్న ఉ॒త

పూ॑రుష॒ఘ్నే క్ష॒యద్వీ॑రాయ సు॒మ్నమ॒స్మే తే॑ అస్తు . రక్షా॑ చ నో॒ అధి॑ చ దేవ

బ్రూ॒హ్యధా॑ చ నః॒ శర్మ॑ యచ్ఛ ద్వి॒బర్హాః᳚ . స్తు॒హి శ్రు॒తం గ॑ర్త॒సదం॒

యువా॑నం మృ॒గన్న భీ॒మము॑పహ॒త్నుము॒గ్రం . మృ॒డా జ॑రి॒త్రే రు॑ద్ర॒ స్తవా॑నో

అ॒న్యంతే॑ అ॒స్మన్నివ॑పంతు॒ సేనాః᳚ . పరి॑ణో రు॒ద్రస్య॑ హే॒తిర్వృ॑ణక్తు॒

పరి॑ త్వే॒షస్య॑ దుర్మ॒తి ర॑ఘా॒యోః . అవ॑ స్థి॒రా మ॒ఘవ॑ద్భ్యస్తనుష్వ॒

మీఢ్వ॑స్తో॒కాయ॒ తన॑యాయ మృడయ . మీఢు॑ష్టమ॒ శివ॑తమ శి॒వో నః॑ సు॒మనా॑

భవ . ప॒ర॒మే వృ॒క్ష ఆయు॑ధన్ని॒ధాయ॒ కృత్తిం॒ వసా॑న॒ ఆచ॑ర॒ పినా॑కం॒

బిభ్ర॒దాగ॑హి . వికి॑రిద॒ విలో॑హిత॒ నమ॑స్తే అస్తు భగవః . యాస్తే॑ స॒హస్రగ్ం॑

హే॒తయో॒న్యమ॒స్మన్నివ॑పంతు॒ తాః . స॒హస్రా॑ణి సహస్ర॒ధా బా॑హు॒వోస్తవ॑ హే॒తయః॑

. తాసా॒మీశా॑నో భగవః పరా॒చీనా॒ ముఖా॑ కృధి .. 10 ..

స॒హస్రా॑ణి సహస్ర॒శో యే రు॒ద్రా అధి॒ భూమ్యాం᳚ . తేషాగ్ం॑ సహస్రయోజ॒నేఽవ॒ధన్వా॑ని

తన్మసి . అ॒స్మిన్మ॑హ॒త్య॑ర్ణ॒వే᳚ఽన్తరి॑క్షే భ॒వా అధి॑ . నీల॑గ్రీవాః

శితి॒కంఠాః᳚ శ॒ర్వా అ॒ధః, క్ష॑మాచ॒రాః . నీల॑గ్రీవాః శితి॒కంఠా॒ దివగ్ం॑

రు॒ద్రా ఉప॑శ్రితాః . యే వృ॒క్షేషు॑ స॒స్పింజ॑రా॒ నీల॑గ్రీవా॒ విలో॑హితాః .

యే భూ॒తానా॒మధి॑పతయో విశి॒ఖాసః॑ కప॒ర్దినః॑ . యే అన్నే॑షు వి॒విధ్యం॑తి॒

పాత్రే॑షు॒ పిబ॑తో॒ జనాన్॑ . యే ప॒థాం ప॑థి॒రక్ష॑య ఐలబృ॒దా య॒వ్యుధః॑

. యే తీ॒ర్థాని॑ ప్ర॒చరం॑తి సృ॒కావం॑తో నిషం॒గిణః॑ . య ఏ॒తావం॑తశ్చ॒

భూయాగ్ం॑సశ్చ॒ దిశో॑ రు॒ద్రా వి॑తస్థి॒రే . తేషాగ్ం॑ సహస్రయోజ॒నేఽవ॒ధన్వా॑ని

తన్మసి . నమో॑ రు॒ద్రేభ్యో॒ యే పృ॑థి॒వ్యాం యే᳚ఽన్తరి॑క్షే॒ యే ది॒వి యేషా॒మన్నం॒

వాతో॑ వ॒ర్॒షమిష॑వ॒స్తేభ్యో॒ దశ॒ ప్రాచీ॒ర్దశ॑ దక్షి॒ణా దశ॑

ప్ర॒తీచీ॒ర్దశోదీ॑చీ॒ర్దశో॒ర్ధ్వాస్తేభ్యో॒ నమ॒స్తే నో॑ మృడయంతు॒ తే యం ద్వి॒ష్మో

యశ్చ॑ నో॒ ద్వేష్టి॒ తం వో॒ జంభే॑ దధామి .. 11 ..

త్ర్యం॑బకం యజామహే సుగం॒ధిం పు॑ష్టి॒వర్ధ॑నం . ఉ॒ర్వా॒రు॒కమి॑వ॒

బంధ॑నాన్మృ॒త్యోర్ము॑క్షీయ॒ మాఽమృతా᳚త్ . యో రు॒ద్రో అ॒గ్నౌ యో అ॒ప్సు య ఓష॑ధీషు॒

యో రు॒ద్రో విశ్వా॒ భువ॑నా వి॒వేశ॒ తస్మై॑ రు॒ద్రాయ॒ నమో॑ అస్తు . తము॑ ష్టు॒హి॒

యః స్వి॒షుః సు॒ధన్వా॒ యో విశ్వ॑స్య॒ క్షయ॑తి భేష॒జస్య॑ . యక్ష్వా᳚మ॒హే

సౌ᳚మన॒సాయ॑ రు॒ద్రం నమో᳚భిర్దే॒వమసు॑రం దువస్య . అ॒యం మే॒ హస్తో॒ భగ॑వాన॒యం

మే॒ భగ॑వత్తరః . అ॒యం మే᳚ వి॒శ్వభే᳚షజో॒ఽయగ్ం శి॒వాభి॑మర్శనః . యే తే॑

స॒హస్ర॑మ॒యుతం॒ పాశా॒ మృత్యో॒ మర్త్యా॑య॒ హంత॑వే . తాన్ య॒జ్ఞస్య॑ మా॒యయా॒

సర్వా॒నవ॑ యజామహే . మృ॒త్యవే॒ స్వాహా॑ మృ॒త్యవే॒ స్వాహా᳚ . ఓం నమో భగవతే రుద్రాయ

విష్ణవే మృత్యు॑ర్మే పా॒హి ..

ప్రాణానాం గ్రంథిరసి రుద్రో మా॑ విశాం॒తకః . తేనాన్నేనా᳚ప్యాయ॒స్వ . సదాశి॒వోం ..

ఓం శాంతిః॒ శాంతిః॒ శాంతిః॑ ..

.. చమకప్రశ్నః ..

ఓం అగ్నా॑విష్ణూ స॒జోష॑సే॒మా వ॑ర్ధంతు వాం॒ గిరః॑ . ద్యు॒మ్నైర్వాజే॑భి॒రాగ॑తం .

వాజ॑శ్చ మే ప్రస॒వశ్చ॑ మే॒ ప్రయ॑తిశ్చ మే॒ ప్రసి॑తిశ్చ మే ధీ॒తిశ్చ॑ మే॒

క్రతు॑శ్చ మే॒ స్వర॑శ్చ మే॒ శ్లోక॑శ్చ మే శ్రా॒వశ్చ॑ మే॒ శ్రుతి॑శ్చ మే॒

జ్యోతి॑శ్చ మే॒ సువ॑శ్చ మే ప్రా॒ణశ్చ॑ మేఽపా॒నశ్చ॑ మే వ్యా॒నశ్చ॒ మేఽసు॑శ్చ

మే చి॒త్తం చ॑ మ॒ ఆధీ॑తం చ మే॒ వాక్చ॑ మే॒ మన॑శ్చ మే॒ చక్షు॑శ్చ మే॒

శ్రోత్రం॑ చ మే॒ దక్ష॑శ్చ మే॒ బలం॑ చ మ॒ ఓజ॑శ్చ మే॒ సహ॑శ్చ మ॒

ఆయు॑శ్చ మే జ॒రా చ॑ మ ఆ॒త్మా చ॑ మే త॒నూశ్చ॑ మే॒ శర్మ॑ చ మే॒ వర్మ॑

చ మే॒ఽఙ్గా॑ని చ మే॒ఽస్థాని॑ చ మే॒ పరూగ్ం॑షి చ మే॒ శరీ॑రాణి చ మే .. 1..

జ్యైష్ఠ్యం॑ చ మ॒ ఆధి॑పత్యం చ మే మ॒న్యుశ్చ॑ మే॒ భామ॑శ్చ॒ మేఽమ॑శ్చ॒

మేఽమ్భ॑శ్చ మే జే॒మా చ॑ మే మహి॒మా చ॑ మే వరి॒మా చ॑ మే ప్రథి॒మా చ॑ మే

వ॒ర్ష్మా చ॑ మే ద్రాఘు॒యా చ॑ మే వృ॒ద్ధం చ॑ మే॒ వృద్ధి॑శ్చ మే స॒త్యం చ॑

మే శ్ర॒ద్ధా చ॑ మే॒ జగ॑చ్చ మే॒ ధనం॑ చ మే॒ వశ॑శ్చ మే॒ త్విషి॑శ్చ

మే క్రీ॒డా చ॑ మే॒ మోద॑శ్చ మే జా॒తం చ॑ మే జని॒ష్యమా॑ణం చ మే సూ॒క్తం చ॑

మే సుకృ॒తం చ॑ మే వి॒త్తం చ॑ మే॒ వేద్యం॑ చ మే భూ॒తం చ॑ మే భవి॒ష్యచ్చ॑

మే సు॒గం చ॑ మే సు॒పథం॑ చ మ ఋ॒ద్ధం చ॑ మ॒ ఋద్ధి॑శ్చ మే కౢ॒ప్తం చ॑

మే॒ కౢప్తి॑శ్చ మే మ॒తిశ్చ॑ మే సుమ॒తిశ్చ॑ మే .. 2..

శం చ॑ మే॒ మయ॑శ్చ మే ప్రి॒యం చ॑ మేఽనుకా॒మశ్చ॑ మే॒ కామ॑శ్చ మే

సౌమన॒సశ్చ॑ మే భ॒ద్రం చ॑ మే॒ శ్రేయ॑శ్చ మే॒ వస్య॑శ్చ మే॒ యశ॑శ్చ

మే॒ భగ॑శ్చ మే॒ ద్రవి॑ణం చ మే యం॒తా చ॑ మే ధ॒ర్తా చ॑ మే॒ క్షేమ॑శ్చ

మే॒ ధృతి॑శ్చ మే॒ విశ్వం॑ చ మే॒ మహ॑శ్చ మే సం॒విచ్చ॑ మే॒ జ్ఞాత్రం॑

చ మే॒ సూశ్చ॑ మే ప్ర॒సూశ్చ॑ మే॒ సీరం॑ చ మే ల॒యశ్చ॑ మ ఋ॒తం చ॑

మే॒ఽమృతం॑ చ మేఽయ॒క్ష్మం చ॒ మేఽనా॑మయచ్చ మే జీ॒వాతు॑శ్చ మే దీర్ఘాయు॒త్వం

చ॑ మేఽనమి॒త్రం చ॒ మేఽభ॑యం చ మే సు॒గం చ॑ మే॒ శయ॑నం చ మే సూ॒షా చ॑

మే సు॒దినం॑ చ మే .. 3..

ఊర్క్చ॑ మే సూ॒నృతా॑ చ మే॒ పయ॑శ్చ మే॒ రస॑శ్చ మే ఘృ॒తం చ॑ మే॒

మధు॑ చ మే॒ సగ్ధి॑శ్చ మే॒ సపీ॑తిశ్చ మే కృ॒షిశ్చ॑ మే॒ వృష్టి॑శ్చ

మే॒ జైత్రం॑ చ మ॒ ఔద్భి॑ద్యం చ మే ర॒యిశ్చ॑ మే॒ రాయ॑శ్చ మే పు॒ష్టం చ॑

మే॒ పుష్టి॑శ్చ మే వి॒భు చ॑ మే ప్ర॒భు చ॑ మే బ॒హు చ॑ మే॒ భూయ॑శ్చ మే

పూ॒ర్ణం చ॑ మే పూ॒ర్ణత॑రం చ॒ మేఽక్షి॑తిశ్చ మే॒ కూయ॑వాశ్చ॒ మేఽన్నం॑ చ॒

మేఽక్షు॑చ్చ మే వ్రీ॒హయ॑శ్చ మే॒ యవా᳚శ్చ మే॒ మాషా᳚శ్చ మే॒ తిలా᳚శ్చ మే

ము॒ద్గాశ్చ॑ మే ఖ॒ల్వా᳚శ్చ మే గో॒ధూమా᳚శ్చ మే మ॒సురా᳚శ్చ మే ప్రి॒యంగ॑వశ్చ॒

మేఽణ॑వశ్చ మే శ్యా॒మకా᳚శ్చ మే నీ॒వారా᳚శ్చ మే .. 4..

అశ్మా॑ చ మే॒ మృత్తి॑కా చ మే గి॒రయ॑శ్చ మే॒ పర్వ॑తాశ్చ మే॒ సిక॑తాశ్చ మే॒

వన॒స్పత॑యశ్చ మే॒ హిర॑ణ్యం చ॒ మేఽయ॑శ్చ మే॒ సీసం॑ చ మే॒ త్రపు॑శ్చ

మే శ్యా॒మం చ॑ మే లో॒హం చ॑ మే॒ఽగ్నిశ్చ॑ మ॒ ఆప॑శ్చ మే వీ॒రుధ॑శ్చ మ॒

ఓష॑ధయశ్చ మే కృష్టప॒చ్యం చ॑ మేఽకృష్టప॒చ్యం చ॑ మే గ్రా॒మ్యాశ్చ॑ మే

ప॒శవ॑ ఆర॒ణ్యాశ్చ॑ య॒జ్ఞేన॑ కల్పంతాం వి॒త్తం చ మే॒ విత్తి॑శ్చ మే భూ॒తం

చ॑ మే॒ భూతి॑శ్చ మే॒ వసు॑ చ మే వస॒తిశ్చ॑ మే॒ కర్మ॑ చ మే॒ శక్తి॑శ్చ॒

మేఽర్థ॑శ్చ మ॒ ఏమ॑శ్చ మ॒ ఇతి॑శ్చ మే॒ గతి॑శ్చ మే .. 5..

అ॒గ్నిశ్చ॑ మ॒ ఇంద్ర॑శ్చ మే॒ సోమ॑శ్చ మ॒ ఇంద్ర॑శ్చ మే సవి॒తా చ॑ మ॒

ఇంద్ర॑శ్చ మే॒ సర॑స్వతీ చ మ॒ ఇంద్ర॑శ్చ మే పూ॒షా చ॑ మ॒ ఇంద్ర॑శ్చ మే॒

బృహ॒స్పతి॑శ్చ మ॒ ఇంద్ర॑శ్చ మే మి॒త్రశ్చ॑ మ॒ ఇంద్ర॑శ్చ మే॒ వరు॑ణశ్చ

మ॒ ఇంద్ర॑శ్చ మే॒ త్వష్టా॑ చ మ॒ ఇంద్ర॑శ్చ మే ధా॒తా చ॑ మ॒ ఇంద్ర॑శ్చ మే॒

విష్ణు॑శ్చ మ॒ ఇంద్ర॑శ్చ మే॒ఽశ్వినౌ॑ చ మ॒ ఇంద్ర॑శ్చ మే మ॒రుత॑శ్చ మ॒

ఇంద్ర॑శ్చ మే॒ విశ్వే॑ చ మే దే॒వా ఇంద్ర॑శ్చ మే పృథి॒వీ చ॑ మ॒ ఇంద్ర॑శ్చ

మే॒ఽన్తరి॑క్షం చ మ॒ ఇంద్ర॑శ్చ మే॒ ద్యౌశ్చ॑ మ॒ ఇంద్ర॑శ్చ మే॒ దిశ॑శ్చ మ॒

ఇంద్ర॑శ్చ మే మూ॒ర్ధా చ॑ మ॒ ఇంద్ర॑శ్చ మే ప్ర॒జాప॑తిశ్చ మ॒ ఇంద్ర॑శ్చ మే .. 6..

అ॒గ్ం॒శుశ్చ॑ మే ర॒శ్మిశ్చ॒ మేఽదా᳚భ్యశ్చ॒ మేఽధి॑పతిశ్చ మ ఉపా॒గ్ం॒శుశ్చ॑

మేఽన్తర్యా॒మశ్చ॑ మ ఐంద్రవాయ॒వశ్చ॑ మే మైత్రావరు॒ణశ్చ॑ మ ఆశ్వి॒నశ్చ॑

మే ప్రతిప్ర॒స్థాన॑శ్చ మే శు॒క్రశ్చ॑ మే మం॒థీ చ॑ మ ఆగ్రయ॒ణశ్చ॑

మే వైశ్వదే॒వశ్చ॑ మే ధ్రు॒వశ్చ॑ మే వైశ్వాన॒రశ్చ॑ మ ఋతుగ్ర॒హాశ్చ॑

మేఽతిగ్రా॒హ్యా᳚శ్చ మ ఐంద్రా॒గ్నశ్చ॑ మే వైశ్వదే॒వశ్చ॑ మే మరుత్వ॒తీయా᳚శ్చ మే

మాహేం॒ద్రశ్చ॑ మ ఆది॒త్యశ్చ॑ మే సావి॒త్రశ్చ॑ మే సారస్వ॒తశ్చ॑ మే పౌ॒ష్ణశ్చ॑

మే పాత్నీవ॒తశ్చ॑ మే హారియోజ॒నశ్చ॑ మే .. 7..

ఇ॒ధ్మశ్చ॑ మే బ॒ర్హిశ్చ॑ మే॒ వేది॑శ్చ మే॒ ధిష్ణి॑యాశ్చ మే॒ స్రుచ॑శ్చ మే

చమ॒సాశ్చ॑ మే॒ గ్రావా॑ణశ్చ మే॒ స్వర॑వశ్చ మ ఉపర॒వాశ్చ॑ మేఽధి॒షవ॑ణే చ

మే ద్రోణకల॒శశ్చ॑ మే వాయ॒వ్యా॑ని చ మే పూత॒భృచ్చ॑ మ ఆధవ॒నీయ॑శ్చ మ॒

ఆగ్నీ᳚ధ్రం చ మే హవి॒ర్ధానం॑ చ మే గృ॒హాశ్చ॑ మే॒ సద॑శ్చ మే పురో॒డాశా᳚శ్చ

మే పచ॒తాశ్చ॑ మేఽవభృ॒థశ్చ॑ మే స్వగాకా॒రశ్చ॑ మే .. 8..

అ॒గ్నిశ్చ॑ మే ఘ॒ర్మశ్చ॑ మే॒ఽర్కశ్చ॑ మే॒ సూర్య॑శ్చ మే ప్రా॒ణశ్చ॑

మేఽశ్వమే॒ధశ్చ॑ మే పృథి॒వీ చ॒ మేఽది॑తిశ్చ మే॒ దితి॑శ్చ మే॒ ద్యౌశ్చ॑

మే॒ శక్క్వ॑రీరం॒గుల॑యో॒ దిశ॑శ్చ మే య॒జ్ఞేన॑ కల్పంతా॒మృక్చ॑ మే॒ సామ॑

చ మే॒ స్తోమ॑శ్చ మే॒ యజు॑శ్చ మే దీ॒క్షా చ॑ మే॒ తప॑శ్చ మ ఋ॒తుశ్చ॑

మే వ్ర॒తం చ॑ మేఽహోరా॒త్రయో᳚ర్వృ॒ష్ట్యా బృ॑హద్రథంత॒రే చ॑ మే య॒జ్ఞేన॑

కల్పేతాం .. 9..

గర్భా᳚శ్చ మే వ॒త్సాశ్చ॑ మే॒ త్ర్యవి॑శ్చ మే త్ర్య॒వీ చ॑ మే దిత్య॒వాట్ చ॑ మే

దిత్యౌ॒హీ చ॑ మే॒ పంచా॑విశ్చ మే పంచా॒వీ చ॑ మే త్రివ॒త్సశ్చ॑ మే త్రివ॒త్సా

చ॑ మే తుర్య॒వాట్ చ॑ మే తుర్యౌ॒హీ చ॑ మే పష్ఠ॒వాట్ చ॑ మే పష్ఠౌ॒హీ చ॑

మ ఉ॒క్షా చ॑ మే వ॒శా చ॑ మ ఋష॒భశ్చ॑ మే వే॒హచ్చ॑ మేఽన॒డ్వాంచ॑

మే ధే॒నుశ్చ॑ మ॒ ఆయు॑ర్య॒జ్ఞేన॑ కల్పతాం ప్రా॒ణో య॒జ్ఞేన॑ కల్పతామపా॒నో

య॒జ్ఞేన॑ కల్పతాం వ్యా॒నో య॒జ్ఞేన॑ కల్పతాం॒ చక్షు॑ర్య॒జ్ఞేన॑ కల్పతా॒గ్॒

శ్రోత్రం॑ య॒జ్ఞేన॑ కల్పతాం॒ మనో॑ య॒జ్ఞేన॑ కల్పతాం॒ వాగ్య॒జ్ఞేన॑ కల్పతామా॒త్మా

య॒జ్ఞేన॑ కల్పతాం య॒జ్ఞో య॒జ్ఞేన॑ కల్పతాం .. 10..

ఏకా॑ చ మే తి॒స్రశ్చ॑ మే॒ పంచ॑ చ మే స॒ప్త చ॑ మే॒ నవ॑ చ

మ॒ ఏకా॑దశ చ మే॒ త్రయో॑దశ చ మే॒ పంచ॑దశ చ మే స॒ప్తద॑శ

చ మే॒ నవ॑దశ చ మ॒ ఏక॑విగ్ంశతిశ్చ మే॒ త్రయో॑విగ్ంశతిశ్చ మే॒

పంచ॑విగ్ంశతిశ్చ మే స॒ప్తవిగ్ం॑శతిశ్చ మే॒ నవ॑విగ్ంశతిశ్చ మ॒

ఏక॑త్రిగ్ంశచ్చ మే॒ త్రయ॑స్త్రిగ్ంశచ్చ మే॒ చత॑స్రశ్చ మే॒ఽష్టౌ చ॑ మే॒

ద్వాద॑శ చ మే॒ షోడ॑శ చ మే విగ్ంశ॒తిశ్చ॑ మే॒ చతు॑ర్విగ్ంశతిశ్చ

మే॒ఽష్టావిగ్ం॑శతిశ్చ మే॒ ద్వాత్రిగ్ం॑శచ్చ మే॒ షట్త్రిగ్ం॑శచ్చ మే

చత్వరి॒గ్ం॒శచ్చ॑ మే॒ చతు॑శ్చత్వారిగ్ంశచ్చ మే॒ఽష్టాచ॑త్వారిగ్ంశచ్చ

మే॒ వాజ॑శ్చ ప్రస॒వశ్చా॑పి॒జశ్చ॒ క్రతు॑శ్చ॒ సువ॑శ్చ మూ॒ర్ధా చ॒

వ్యశ్ని॑యశ్చాంత్యాయ॒నశ్చాంత్య॑శ్చ భౌవ॒నశ్చ॒ భువ॑న॒శ్చాధి॑పతిశ్చ ..

11..

ఓం ఇడా॑ దేవ॒హూర్మను॑ర్యజ్ఞ॒నీర్బృహ॒స్పతి॑రుక్థామ॒దాని॑ శగ్ంసిష॒ద్విశ్వే॑దే॒వాః

సూ᳚క్త॒వాచః॒ పృథి॑వీమాత॒ర్మా మా॑ హిగ్ంసీ॒ర్మధు॑ మనిష్యే॒ మధు॑ జనిష్యే॒ మధు॑

వక్ష్యామి॒ మధు॑ వదిష్యామి॒ మధు॑మతీం దే॒వేభ్యో॒ వాచ॑ముద్యాసగ్ం శుశ్రూ॒షేణ్యాం᳚

మను॒ష్యే᳚భ్య॒స్తం మా॑ దే॒వా అ॑వంతు శో॒భాయై॑ పి॒తరోఽను॑మదంతు.. ఓం శాంతిః॒

శాంతిః॒ శాంతిః॑ ..

.. పురుషసూక్తం ..

ఓం తచ్ఛం॒ యోరావృ॑ణీమహే . గా॒తుం య॒జ్ఞాయ॑ . గా॒తుం య॒జ్ఞప॑తయే . దైవీః᳚

స్వ॒స్తిర॑స్తు నః . స్వ॒స్తిర్మాను॑షేభ్యః . ఊ॒ర్ధ్వం జి॑గాతు భేష॒జం . శన్నో॑

అస్తు ద్వి॒పదే᳚ . శం చతు॑ష్పదే .. ఓం శాంతిః॒ శాంతిః॒ శాంతిః॑ ..

ఓం స॒హస్ర॑శీర్షా॒ పురు॑షః . స॒హ॒స్రా॒క్షః స॒హస్ర॑పాత్ . స భూమిం॑ వి॒శ్వతో॑

వృ॒త్వా . అత్య॑తిష్ఠద్దశాంగు॒లం . పురు॑ష ఏ॒వేదగ్ం సర్వం᳚ . యద్భూ॒తం యచ్చ॒

భవ్యం᳚ . ఉ॒తామృ॑త॒త్వస్యేశా॑నః . య॒దన్నే॑నాతి॒రోహ॑తి . ఏ॒తావా॑నస్య మహి॒మా .

అతో॒ జ్యాయాగ్॑శ్చ॒ పూరు॑షః .. 1 ..

పాదో᳚ఽస్య॒ విశ్వా॑ భూ॒తాని॑ . త్రి॒పాద॑స్యా॒మృతం॑ ది॒వి . త్రి॒పాదూ॒ర్ధ్వ

ఉదై॒త్పురు॑షః . పాదో᳚ఽస్యే॒హాఽఽభ॑వా॒త్పునః॑ . తతో॒ విష్వ॒ఙ్వ్య॑క్రామత్ .

సా॒శ॒నా॒న॒శ॒నే అ॒భి . తస్మా᳚ద్వి॒రాడ॑జాయత . వి॒రాజో॒ అధి॒ పూరు॑షః .

స జా॒తో అత్య॑రిచ్యత . ప॒శ్చాద్భూమి॒మథో॑ పు॒రః .. 2 ..

యత్పురు॑షేణ హ॒విషా᳚ . దే॒వా య॒జ్ఞమత॑న్వత . వ॒సం॒తో అ॑స్యాసీ॒దాజ్యం᳚ .

గ్రీ॒ష్మ ఇ॒ధ్మశ్శ॒రద్ధ॒విః . స॒ప్తాస్యా॑సన్పరి॒ధయః॑ . త్రిః స॒ప్త స॒మిధః॑

కృ॒తాః . దే॒వా యద్య॒జ్ఞం త॑న్వా॒నాః . అబ॑ధ్న॒న్పురు॑షం ప॒శుం . తం య॒జ్ఞం

బ॒ర్॒హిషి॒ ప్రౌక్షన్॑ . పురు॑షం జా॒తమ॑గ్ర॒తః .. 3 ..

తేన॑ దే॒వా అయ॑జంత . సా॒ధ్యా ఋష॑యశ్చ॒ యే . తస్మా᳚ద్య॒జ్ఞాత్స॑ర్వ॒హుతః॑

. సంభృ॑తం పృషదా॒జ్యం . ప॒శూగ్స్తాగ్శ్చ॑క్రే వాయ॒వ్యాన్॑ .

ఆ॒ర॒ణ్యాన్గ్రా॒మ్యాశ్చ॒ యే . తస్మా᳚ద్య॒జ్ఞాత్స॑ర్వ॒హుతః॑ . ఋచః॒ సామా॑ని జజ్ఞిరే .

ఛందాగ్ం॑సి జజ్ఞిరే॒ తస్మా᳚త్ . యజు॒స్తస్మా॑దజాయత .. 4 ..

తస్మా॒దశ్వా॑ అజాయంత . యే కే చో॑భ॒యాద॑తః . గావో॑ హ జజ్ఞిరే॒ తస్మా᳚త్ .

తస్మా᳚జ్జా॒తా అ॑జా॒వయః॑ . యత్పురు॑షం॒ వ్య॑దధుః . క॒తి॒ధా వ్య॑కల్పయన్ .

ముఖం॒ కిమ॑స్య॒ కౌ బా॒హూ . కావూ॒రూ పాదా॑వుచ్యేతే . బ్రా॒హ్మ॒ణో᳚ఽస్య॒ ముఖ॑మాసీత్ .

బా॒హూ రా॑జ॒న్యః॑ కృ॒తః .. 5 ..

ఊ॒రూ తద॑స్య॒ యద్వైశ్యః॑ . ప॒ద్భ్యాగ్ం శూ॒ద్రో అ॑జాయత . చం॒ద్రమా॒ మన॑సో జా॒తః

. చక్షోః॒ సూర్యో॑ అజాయత . ముఖా॒దింద్ర॑శ్చా॒గ్నిశ్చ॑ . ప్రా॒ణాద్వా॒యుర॑జాయత .

నాభ్యా॑ ఆసీదం॒తరి॑క్షం . శీ॒ర్ష్ణో ద్యౌః సమ॑వర్తత . ప॒ద్భ్యాం భూమి॒ర్దిశః॒

శ్రోత్రా᳚త్ . తథా॑ లో॒కాగ్ం అ॑కల్పయన్ .. 6 ..

వేదా॒హమే॒తం పురు॑షం మ॒హాంతం᳚ . ఆ॒ది॒త్యవ॑ర్ణం॒ తమ॑స॒స్తు పా॒రే .

సర్వా॑ణి రూ॒పాణి॑ వి॒చిత్య॒ ధీరః॑ . నామా॑ని కృ॒త్వాఽభి॒వద॒న్॒, యదాస్తే᳚

. ధా॒తా పు॒రస్తా॒ద్యము॑దాజ॒హార॑ . శ॒క్రః ప్రవి॒ద్వాన్ప్ర॒దిశ॒శ్చత॑స్రః .

తమే॒వం వి॒ద్వాన॒మృత॑ ఇ॒హ భ॑వతి . నాన్యః పంథా॒ అయ॑నాయ విద్యతే . య॒జ్ఞేన॑

య॒జ్ఞమ॑యజంత దే॒వాః . తాని॒ ధర్మా॑ణి ప్రథ॒మాన్యా॑సన్ . తే హ॒ నాకం॑ మహి॒మానః॑

సచంతే . యత్ర॒ పూర్వే॑ సా॒ధ్యాః సంతి॑ దే॒వాః .. 7 ..

అ॒ద్భ్యః సంభూ॑తః పృథి॒వ్యై రసా᳚చ్చ . వి॒శ్వక॑ర్మణః॒ సమ॑వర్త॒తాధి॑

. తస్య॒ త్వష్టా॑ వి॒దధ॑ద్రూ॒పమే॑తి . తత్పురు॑షస్య॒ విశ్వ॒మాజా॑న॒మగ్రే᳚

. వేదా॒హమే॒తం పురు॑షం మ॒హాంతం᳚ . ఆ॒ది॒త్యవ॑ర్ణం॒ తమ॑సః॒ పర॑స్తాత్

. తమే॒వం వి॒ద్వాన॒మృత॑ ఇ॒హ భ॑వతి . నాన్యః పంథా॑ విద్య॒తేయ॑ఽనాయ .

ప్ర॒జాప॑తిశ్చరతి॒ గర్భే॑ అం॒తః . అ॒జాయ॑మానో బహు॒ధా విజా॑యతే .. 8 ..

తస్య॒ ధీరాః॒ పరి॑జానంతి॒ యోనిం᳚ . మరీ॑చీనాం ప॒దమి॑చ్ఛంతి వే॒ధసః॑ .

యో దే॒వేభ్య॒ ఆత॑పతి . యో దే॒వానాం᳚ పు॒రోహి॑తః . పూర్వో॒ యో దే॒వేభ్యో॑ జా॒తః .

నమో॑ రు॒చాయ॒ బ్రాహ్మ॑యే . రుచం॑ బ్రా॒హ్మం జ॒నయం॑తః . దే॒వా అగ్రే॒ తద॑బ్రువన్ .

యస్త్వై॒వం బ్రా᳚హ్మ॒ణో వి॒ద్యాత్ . తస్య॑ దే॒వా అస॒న్ వశే᳚ .. 9 ..

హ్రీశ్చ॑ తే ల॒క్ష్మీశ్చ॒ పత్న్యౌ᳚ . అ॒హో॒రా॒త్రే పా॒ర్శ్వే . నక్ష॑త్రాణి రూ॒పం .

అ॒శ్వినౌ॒ వ్యాత్తం᳚ . ఇ॒ష్టం మ॑నిషాణ . అ॒ముం మ॑నిషాణ . సర్వం॑ మనిషాణ .. 10 ..

.. దుర్గా సూక్తం ..

ఓం జా॒తవే॑దసే సునవామ॒ సోమ॑ మరాతీయ॒తో నిద॑హాతి॒ వేదః॑ . స నః॑ పర్ష॒దతి॑

దు॒ర్గాణి॒ విశ్వా॑ నా॒వేవ॒ సింధుం॑ దురి॒తాఽత్య॒గ్నిః .. తామ॒గ్నివ॑ర్ణాం॒

తప॑సా జ్వలం॒తీం వై॑రోచ॒నీం క॑ర్మఫ॒లేషు॒ జుష్టాం᳚ . దు॒ర్గాం దే॒వీగ్ం

శర॑ణమ॒హం ప్రప॑ద్యే సు॒తర॑సి తరసే॒ నమః॑ .. అగ్నే॒ త్వం పా॑రయా॒ నవ్యో॑

అ॒స్మాంథ్స్వ॒స్తిభి॒రతి॑ దు॒ర్గాణి॒ విశ్వా᳚ . పూశ్చ॑ పృ॒థ్వీ బ॑హు॒లా న॑ ఉ॒ర్వీ

భవా॑ తో॒కాయ॒ తన॑యాయ॒ శంయోః .. విశ్వా॑ని నో దు॒ర్గహా॑ జాతవేదః॒ సింధు॒న్న నా॒వా

దు॑రి॒తాఽతి॑పర్షి . అగ్నే॑ అత్రి॒వన్మన॑సా గృణా॒నో᳚ఽస్మాకం॑ బోధ్యవి॒తా త॒నూనాం᳚

.. పృ॒త॒నా॒ జిత॒గ్ం॒ సహ॑మానము॒గ్రమ॒గ్నిగ్ం హు॑వేమ పర॒మాథ్స॒ధస్థా᳚త్ .

స నః॑ పర్ష॒దతి॑ దు॒ర్గాణి॒ విశ్వా॒ క్షామ॑ద్దే॒వో అతి॑ దురి॒తాఽత్య॒గ్నిః

.. ప్ర॒త్నోషి॑ క॒మీడ్యో॑ అధ్వ॒రేషు॑ స॒నాచ్చ॒ హోతా॒ నవ్య॑శ్చ॒ సత్సి॑

. స్వాంచా᳚ఽగ్నే త॒నువం॑ పి॒ప్రయ॑స్వా॒స్మభ్యం॑ చ॒ సౌభ॑గ॒మాయ॑జస్వ ..

గోభి॒ర్జుష్ట॑మ॒యుజో॒ నిషి॑క్తం॒ తవేం᳚ద్ర విష్ణో॒రను॒సంచ॑రేమ . నాక॑స్య

పృ॒ష్ఠమ॒భి సం॒వసా॑నో॒ వైష్ణ॑వీం లో॒క ఇ॒హ మా॑దయంతాం ..

ఓం కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి . తన్నో॑ దుర్గిః ప్రచో॒దయా᳚త్ ..

ఓం శాంతిః॒ శాంతిః॒ శాంతిః॑ ..

.. ఆయుష్య సూక్తం ..

యో బ్రహ్మా బ్రహ్మణ ఉ॑జ్జహా॒ర ప్రా॒ణైః శి॒రః కృత్తివాసాః᳚ పినా॒కీ .

ఈశానో దేవః స న ఆయు॑ర్దధా॒తు॒ తస్మై జుహోమి హవిషా॑ ఘృతే॒న .. 1 ..

విభ్రాజమానః సరిర॑స్య మ॒ధ్యా॒-ద్రో॒చ॒మా॒నో ఘర్మరుచి॑ర్య ఆ॒గాత్ .

స మృత్యుపాశానపను॑ద్య ఘో॒రా॒ని॒హా॒యు॒షే॒ణో ఘృతమ॑త్తు దే॒వః .. 2 ..

బ్రహ్మజ్యోతి-ర్బ్రహ్మ-పత్నీ॑షు గ॒ర్భం॒ య॒మా॒ద॒ధాత్ పురురూపం॑ జయం॒తం .

సువర్ణరంభగ్రహ-మ॑ర్కమ॒ర్చ్యం॒ త॒మా॒యు॒షే వర్ధయామో॑ ఘృతే॒న .. 3 ..

శ్రియం లక్ష్మీ-మౌబలా-మంబికాం॒ గాం॒ ష॒ష్ఠీం చ యా॒మింద్రసేనే᳚త్యుదా॒హుః .

తాం విద్యాం బ్రహ్మయోనిగ్ం॑ సరూ॒పా॒మి॒హా॒యు॒షే తర్పయామో॑ ఘృతే॒న .. 4 ..

దాక్షాయణ్యః సర్వయోన్యః॑ స యో॒న్యః॒ స॒హ॒స్ర॒శో విశ్వరూపా॑ విరూ॒పాః .

ససూనవః సపతయః॑ సయూ॒థ్యా॒ ఆ॒యు॒షే॒ణో ఘృతమిదం॑ జుషం॒తాం .. 5 ..

దివ్యా గణా బహురూపాః᳚ పురా॒ణా॒ ఆయుశ్ఛిదో నః ప్రమథ్నం॑తు వీ॒రాన్ .

తేభ్యో జుహోమి బహుధా॑ ఘృతే॒న॒ మా॒ నః॒ ప్ర॒జాగ్ం రీరిషో మో॑త వీ॒రాన్ .. 6 ..

ఏ॒కః॒ పు॒ర॒స్తాత్ య ఇదం॑ బభూ॒వ॒ యతో బభూవ భువన॑స్య గో॒పాః .

యమప్యేతి భువనగ్ం సాం᳚పరా॒యే॒ స నో హవిర్ఘృత-మిహాయుషే᳚త్తు దే॒వః .. 7 ..

వ॒సూ॒న్ రుద్రా॑-నాది॒త్యాన్ మరుతో॑ఽథ సా॒ధ్యా॒న్ ఋ॑భూన్ య॒క్షా॒న్ గంధర్వాగ్శ్చ

పితౄగ్శ్చ వి॒శ్వాన్ .

భృగూన్ సర్పాగ్శ్చాంగిరసో॑ఽథ స॒ర్వా॒న్ ఘృ॒త॒గ్ం హు॒త్వా స్వాయుష్యా మహయా॑మ

శ॒శ్వత్ .. 8 ..

విష్ణో॒ త్వం నో॒ అంత॑మ॒శ్శర్మ॑యచ్ఛ సహంత్య . ప్రతే॒ధారా॑ మధు॒శ్చుత॒

ఉథ్సం॑ దుహ్రతే॒ అక్షి॑తం ..

.. ఓం శాంతిః॒ శాంతిః॒ శాంతిః॑ ..

.. భాగ్య సూక్తం ..

ఓం ప్రా॒తర॒గ్నిం ప్రా॒తరింద్రగ్ం॑ హవామహే ప్రా॒తర్మి॒త్రా వరు॑ణా ప్రా॒తర॒శ్వినా᳚ .

ప్రా॒తర్భగం॑ పూ॒షణం॒ బ్రహ్మ॑ణ॒స్పతిం॑ ప్రా॒తః సోమ॑ము॒త రు॒ద్రగ్ం హు॑వేమ ..

1 .. ప్రా॒త॒ర్జితం॒ భ॑గము॒గ్రగ్ం హు॑వేమ వ॒యం పు॒త్ర-మది॑తే॒ర్యో వి॑ధ॒ర్తా .

ఆ॒ద్ధ్రశ్చి॒ద్యం మన్య॑మానస్తు॒రశ్చి॒ద్రాజా॑ చి॒ద్యం భగం॑ భ॒క్షీత్యాహ॑ .. 2 ..

భగ॒ ప్రణే॑త॒-ర్భగ॒ సత్య॑రాధో॒ భగే॒మాం ధియ॒ముద॑వ॒దద॑న్నః .

భగ॒ప్రణో॑ జనయ॒ గోభి॒-రశ్వై॒ర్భగ॒ప్రనృభి॑-ర్నృ॒వంత॑స్స్యామ ..

3 .. ఉ॒తేదానీం॒ భగ॑వంతస్స్యామో॒త ప్రపి॒త్వ ఉ॒త మధ్యే॒ అహ్నాం᳚ . ఉ॒తోది॑తా

మఘవం॒థ్సూర్య॑స్య వ॒యం దే॒వానాగ్ం॑ సుమ॒తౌ స్యా॑మ .. 4 ..

భగ॑ ఏ॒వ భగ॑వాగ్ం అస్తు దేవా॒స్తేన॑ వ॒యం భగ॑వంతస్స్యామ . తం త్వా॑ భగ॒ సర్వ॒

ఇజ్జో॑హవీమి॒ సనో॑ భగ పుర ఏ॒తా భ॑వేహ .. 5 .. సమ॑ధ్వ॒రాయో॒షసో॑ఽనమంత

దధి॒క్రావే॑వ॒ శుచయే॑ ప॒దాయ॑ . అ॒ర్వా॒చీ॒నం వ॑సు॒విదం॒ భగ॑న్నో॒

రథ॑మి॒వాఽశ్వా॑వా॒జిన॒ ఆవ॑హంతు .. 6 ..

అశ్వా॑వతీ॒-ర్గోమ॑తీ-ర్న ఉ॒షాసో॑ వీ॒రవ॑తీ॒స్సద॑-ముచ్ఛంతు భ॒ద్రాః . ఘృ॒తం

దుహా॑నా వి॒శ్వతః॒ ప్రపీ॑నా యూ॒యం పా॑త స్వ॒స్తిభి॒స్సదా॑ నః .. 7 .. యో మా᳚ఽగ్నే

భా॒గినగ్ం॑ సం॒తమథా॑భా॒గం చికీ॑ఋషతి . అభా॒గమ॑గ్నే॒ తం కు॑రు॒ మామ॑గ్నే

భా॒గినం॑ కురు .. 8 ..

ఓం శాంతిః॒ శాంతిః॒ శాంతిః॑ ..

.. మంత్రపుష్పం ..

ఓం భ॒ద్రం కర్ణే॑భిః శృణు॒యామ॑ దేవాః . భ॒ద్రం ప॑శ్యేమా॒క్షభి॒ర్యజ॑త్రాః

. స్థి॒రైరంగై᳚స్తుష్టు॒వాగ్ంస॑స్త॒నూభిః॑ . వ్యశే॑మ దే॒వహి॑తం॒ యదాయుః॑ .

స్వ॒స్తి న॒ ఇంద్రో॑ వృ॒ద్ధశ్ర॑వాః . స్వ॒స్తి నః॑ పూ॒షా వి॒శ్వవే॑దాః . స్వ॒స్తి

న॒స్తార్క్ష్యో॒ అరి॑ష్టనేమిః . స్వ॒స్తి నో॒ బృహ॒స్పతి॑ర్దధాతు .. ఓం శాంతిః॒ శాంతిః॒

శాంతిః॑ .

ఓం యో॑ఽపాం పుష్పం॒ వేద॑ . పుష్ప॑వాన్ ప్ర॒జావా᳚న్ పశు॒మాన్ భ॑వతి . చం॒ద్రమా॒

వా అ॒పాం పుష్పం᳚ . పుష్ప॑వాన్ ప్ర॒జావా᳚న్ పశు॒మాన్ భ॑వతి . య ఏ॒వం వేద॑ .

యో॑ఽపామా॒యత॑నం॒ వేద॑ . ఆ॒యత॑నవాన్ భవతి . అ॒గ్నిర్వా అ॒పామా॒యత॑నం .

ఆ॒యత॑నవాన్ భవతి . యో᳚ఽగ్నేరా॒యత॑నం॒ వేద॑ .. ఆ॒యత॑నవాన్ భవతి . ఆపో॒

వా అ॒గ్నేరా॒యత॑నం . ఆ॒యత॑నవాన్ భవతి . య ఏ॒వం వేద॑ . యో॑ఽపామా॒యత॑నం॒

వేద॑ . ఆ॒యత॑నవాన్ భవతి . వా॒యుర్వా అ॒పామా॒యత॑నం . ఆ॒యత॑నవాన్ భవతి .

యో వా॒యోరా॒యత॑నం॒ వేద॑ . ఆ॒యత॑నవాన్ భవతి ..

ఆపో॒ వై వా॒యోరా॒యత॑నం . ఆ॒యత॑నవాన్ భవతి . య ఏ॒వం వేద॑ . యో॑ఽపామా॒యత॑నం॒

వేద॑ . ఆ॒యత॑నవాన్ భవతి . అ॒సౌ వై తప॑న్న॒పామా॒యత॑నం . ఆ॒యత॑నవాన్ భవతి

. యో॑ఽముష్య॒ తప॑త ఆ॒యత॑నం॒ వేద॑ . ఆ॒యత॑నవాన్ భవతి . ఆపో॒ వా అ॒ముష్య॒

తప॑త ఆ॒యత॑నం .. ఆ॒యత॑నవాన్ భవతి . య ఏ॒వం వేద॑ . యో॑ఽపామా॒యత॑నం॒

వేద॑ . ఆ॒యత॑నవాన్ భవతి . చం॒ద్రమా॒ వా అ॒పామా॒యత॑నం . ఆ॒యత॑నవాన్ భవతి .

యశ్చం॒ద్రమ॑స ఆ॒యత॑నం॒ వేద॑ . ఆ॒యత॑నవాన్ భవతి . ఆపో॒ వై చం॒ద్రమ॑స

ఆ॒యత॑నం. ఆ॒యత॑నవాన్ భవతి ..

య ఏ॒వం వేద॑ . యో॑ఽపామా॒యత॑నం॒ వేద॑ . ఆ॒యత॑నవాన్ భవతి . నక్ష॑త్రాణి॒

వా అ॒పామా॒యత॑నం . ఆ॒యత॑నవాన్ భవతి . యో నక్ష॑త్రాణామా॒యత॑నం॒ వేద॑ .

ఆ॒యత॑నవాన్ భవతి . ఆపో॒ వై నక్ష॑త్రాణామా॒యత॑నం . ఆ॒యత॑నవాన్ భవతి .

య ఏ॒వం వేద॑ .. యో॑ఽపామా॒యత॑నం॒ వేద॑ . ఆ॒యత॑నవాన్ భవతి . ప॒ర్జన్యో॒

వా అ॒పామా॒యత॑నం . ఆ॒యత॑నవాన్ భవతి . యః ప॒ర్జన్య॑స్యా॒యత॑నం॒ వేద॑ .

ఆ॒యత॑నవాన్ భవతి . ఆపో॒ వై ప॒ర్జన్య॑స్యా॒ఽఽయత॑నం . ఆ॒యత॑నవాన్ భవతి .

య ఏ॒వం వేద॑ . యో॑ఽపామా॒యత॑నం॒ వేద॑ ..

ఆ॒యత॑నవాన్ భవతి . సం॒వ॒త్స॒రో వా అ॒పామా॒యత॑నం . ఆ॒యత॑నవాన్

భవతి . యస్సం॑వత్స॒రస్యా॒యత॑నం॒ వేద॑ . ఆ॒యత॑నవాన్ భవతి . ఆపో॒ వై

సం॑వత్స॒రస్యా॒యత॑నం . ఆ॒యత॑నవాన్ భవతి . య ఏ॒వం వేద॑ . యో᳚ఽప్సు నావం॒

ప్రతి॑ష్ఠితాం॒ వేద॑ . ప్రత్యే॒వ తి॑ష్ఠతి ..

ఓం రా॒జా॒ధి॒రా॒జాయ॑ ప్రసహ్యసా॒హినే᳚ . నమో॑ వ॒యం వై᳚శ్రవ॒ణాయ॑ కుర్మహే . స

మే॒ కామా॒న్కామ॒కామా॑య॒ మహ్యం᳚ . కా॒మే॒శ్వ॒రో వై᳚శ్రవ॒ణో ద॑దాతు . కు॒బే॒రాయ॑

వైశ్రవ॒ణాయ॑ . మ॒హా॒రా॒జాయ॒ నమః॑ .. ఓం శాంతిః॒ శాంతిః॒ శాంతిః॑ ..

.. శాంతిమంత్రాః ..

.. ఓం శ్రీ గురుభ్యో నమః హరిః ఓం ..

ఓం స॒హ నా॑వవతు . స॒హ నౌ॑ భునక్తు . స॒హ వీ॒ర్యం॑ కరవావహై .

తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ .. ఓం శాంతిః॒ శాంతిః॒ శాంతిః॑ ..

ఓం యశ్ఛంద॑సామృష॒భో వి॒శ్వరూ॑పః . ఛందో॒భ్యోఽధ్య॒మృతా᳚థ్సంబ॒భూవ॑

. స మేంద్రో॑ మే॒ధయా᳚ స్పృణోతు . అ॒మృత॑స్య దేవ॒ధార॑ణో భూయాసం . శరీ॑రం

మే॒ విచ॑ర్షణం . జి॒హ్వా మే॒ మధు॑మత్తమా . కర్ణా᳚భ్యాం॒ భూరి॒విశ్రు॑వం .

బ్రహ్మ॑ణః కో॒శో॑ఽసి మే॒ధయా పి॑హితః . శ్రు॒తం మే॑ గోపాయ . ఓం శాంతిః॒

శాంతిః॒ శాంతిః॑ .. ఓం వాఙ్మే॒ మన॑సి॒ ప్రతి॑ష్ఠితా॒ మనో॑ మే॒ వాచి॒

ప్రతి॑ష్ఠితమా॒విరా॒వీర్మ॑ ఏధి వే॒దస్య మ॒ ఆణీ᳚స్థః శ్రు॒తం మే॒ మా

ప్రహా॑సీర॒నేనా॒ధీతే॑నాహోరా॒త్రాన్ సంద॑ధామ్యృ॒తం వ॑దిష్యామి స॒త్యం వ॑దిష్యామి॒

తన్మామ॑వతు॒ తద్వ॒క్తార॑మవ॒త్వవ॑తు॒ మామవ॑తు వ॒క్తార॒మవ॑తు వ॒క్తారం᳚ ..

ఓం శాంతిః॒ శాంతిః॒ శాంతిః॑ .. ఓం ఆప్యాయంతు మమాంగాని వాక్ప్రాణశ్చక్షుః శ్రోత్రమథో

బలమింద్రియాణి చ సర్వాణి . సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా

బ్రహ్మ నిరాకరోదనిరాకరణమస్త్వనిరాకరణం మేఽస్తు . తదాత్మని నిరతే య ఉపనిషత్సు

ధర్మాస్తే మయి సంతు తే మయి సంతు .. ఓం శాంతిః॒ శాంతిః॒ శాంతిః॑ .. ఓం భ॒ద్రం

కర్ణే॑భిః శృణు॒యామ॑ దేవాః . భ॒ద్రం ప॑శ్యేమా॒క్షభి॒ర్యజ॑త్రాః .

స్థి॒రైరంగై᳚స్తుష్టు॒వాగ్ంస॑స్త॒నూభిః॑ . వ్యశే॑మ దే॒వహి॑తం॒ యదాయుః॑

. స్వ॒స్తి న॒ ఇంద్రో॑ వృ॒ద్ధశ్ర॑వాః . స్వ॒స్తి నః॑ పూ॒షా వి॒శ్వవే॑దాః .

స్వ॒స్తి న॒స్తార్క్ష్యో॒ అరి॑ష్టనేమిః . స్వ॒స్తి నో॒ బృహ॒స్పతి॑ర్దధాతు .. ఓం శాంతిః॒

శాంతిః॒ శాంతిః॑ .. ఓం పూర్ణ॒మదః॒ పూర్ణ॒మిదం॒ పూర్ణా॒త్పూర్ణ॒ముద॒చ్యతే . పూర్ణ॒స్య

పూర్ణ॒మాదా॒య పూర్ణ॒మేవావశి॒ష్యతే .. ఓం శాంతిః॒ శాంతిః॒ శాంతిః॑ ..