ఆంగిరసః కుత్స ఋషిః, సూర్యోదేవతా, నిచృత్ త్రిష్తుప్ (1,2,6) ,
విరాట్ త్రిష్టుప్ (3), త్రిష్టుప్ఛందః (4,5), ధైవతః స్వరః .
చి॒త్రం దే॒వానా॒ముద॑గా॒దనీ॑కం॒ చక్షు॑ర్మి॒త్రస్య॒ వరు॑ణస్యా॒గ్నేః .
ఆప్రా॒ ద్యావా॑పృథి॒వీ అం॒తరి॑క్షం॒ సూర్య॑ ఆ॒త్మా జగ॑తస్త॒స్థుష॑శ్చ .. 1.115.01
సూర్యో॑ దే॒వీము॒షసం॒ రోచ॑మానాం॒ మర్యో॒ న యోషా॑మ॒భ్యే॑తి ప॒శ్చాత్ .
యత్రా॒ నరో॑ దేవ॒యంతో॑ యు॒గాని॑ వితన్వ॒తే ప్రతి॑ భ॒ద్రాయ॑ భ॒ద్రం .. 1.115.02
భ॒ద్రా అశ్వా॑ హ॒రితః॒ సూర్య॑స్య చి॒త్రా ఏత॑గ్వా అను॒మాద్యా॑సః .
న॒మ॒స్యంతో॑ ది॒వ ఆ పృ॒ష్ఠమ॑స్థుః॒ పరి॒ ద్యావా॑పృథి॒వీ యం॑తి స॒ద్యః .. 1.115.03
తత్సూర్య॑స్య దేవ॒త్వం తన్మ॑హి॒త్వం మ॒ధ్యా కర్తో॒ర్విత॑తం॒ సం జ॑భార .
య॒దేదయు॑క్త హ॒రితః॑ స॒ధస్థా॒దాద్రాత్రీ॒ వాస॑స్తనుతే సి॒మస్మై॑ .. 1.115.04
తన్మి॒త్రస్య॒ వరు॑ణస్యాభి॒చక్షే॒ సూర్యో॑ రూ॒పం కృ॑ణుతే॒ ద్యోరు॒పస్థే॑ .
అ॒నం॒తమ॒న్యద్రుశ॑దస్య॒ పాజః॑ కృ॒ష్ణమ॒న్యద్ధ॒రితః॒ సం భ॑రంతి .. 1.115.05
అ॒ద్యా దే॑వా॒ ఉది॑తా॒ సూర్య॑స్య॒ నిరంహ॑సః పిపృ॒తా నిర॑వ॒ద్యాత్ .
తన్నో॑ మి॒త్రో వరు॑ణో మామహంతా॒మది॑తిః॒ సింధుః॑ పృథి॒వీ ఉ॒త ద్యౌః .. 1.115.06
No comments:
Post a Comment