ఋగ్వేదసంహితాయాం ప్రథమం మండలం .
ఋషిః మధుచ్ఛందా వైశ్వామిత్రః , దేవతా అగ్నిః ,
ఛంద గాయత్రీ, స్వర షడ్జ ..
అ॒గ్నిమీ॑ళే పు॒రోహి॑తం య॒జ్ఞస్య॑ దే॒వమృ॒త్విజం॑ .
హోతా॑రం రత్న॒ధాత॑మం .. 1.001.01
అ॒గ్నిః పూర్వే॑భి॒రృషి॑భి॒రీడ్యో॒ నూత॑నైరు॒త .
స దే॒వాఀ ఏహ వ॑క్షతి .. 1.001.02
అ॒గ్నినా॑ ర॒యిమ॑శ్నవ॒త్పోష॑మే॒వ ది॒వేది॑వే .
య॒శసం॑ వీ॒రవ॑త్తమం .. 1.001.03
అగ్నే॒ యం య॒జ్ఞమ॑ధ్వ॒రం వి॒శ్వతః॑ పరి॒భూరసి॑ .
స ఇద్దే॒వేషు॑ గచ్ఛతి .. 1.001.04
అ॒గ్నిర్హోతా॑ క॒విక్ర॑తుః స॒త్యశ్చి॒త్రశ్ర॑వస్తమః .
దే॒వో దే॒వేభి॒రా గ॑మత్ .. 1.001.05
యదం॒గ దా॒శుషే॒ త్వమగ్నే॑ భ॒ద్రం క॑రి॒ష్యసి॑ .
తవేత్తత్స॒త్యమం॑గిరః .. 1.001.06
ఉప॑ త్వాగ్నే ది॒వేది॑వే॒ దోషా॑వస్తర్ధి॒యా వ॒యం .
నమో॒ భరం॑త॒ ఏమ॑సి .. 1.001.07
రాజం॑తమధ్వ॒రాణాం॑ గో॒పామృ॒తస్య॒ దీది॑విం .
వర్ధ॑మానం॒ స్వే దమే॑ .. 1.001.08
స నః॑ పి॒తేవ॑ సూ॒నవేఽగ్నే॑ సూపాయ॒నో భ॑వ .
సచ॑స్వా నః స్వ॒స్తయే॑ .. 1.001.09
స్వరరహితం .
అగ్నిమీళే పురోహితం యజ్ఞస్య దేవమృత్విజం .
హోతారం రత్నధాతమం .. 1.001.01
అగ్నిః పూర్వేభిరృషిభిరీడ్యో నూతనైరుత .
స దేవాఀ ఏహ వక్షతి .. 1.001.02
అగ్నినా రయిమశ్నవత్పోషమేవ దివేదివే .
యశసం వీరవత్తమం .. 1.001.03
అగ్నే యం యజ్ఞమధ్వరం విశ్వతః పరిభూరసి .
స ఇద్దేవేషు గచ్ఛతి .. 1.001.04
అగ్నిర్హోతా కవిక్రతుః సత్యశ్చిత్రశ్రవస్తమః .
దేవో దేవేభిరా గమత్ .. 1.001.05
యదంగ దాశుషే త్వమగ్నే భద్రం కరిష్యసి .
తవేత్తత్సత్యమంగిరః .. 1.001.06
ఉప త్వాగ్నే దివేదివే దోషావస్తర్ధియా వయం .
నమో భరంత ఏమసి .. 1.001.07
రాజంతమధ్వరాణాం గోపామృతస్య దీదివిం .
వర్ధమానం స్వే దమే .. 1.001.08
స నః పితేవ సూనవేఽగ్నే సూపాయనో భవ .
సచస్వా నః స్వస్తయే .. 1.001.09
No comments:
Post a Comment