శ్రీసూక్తమహాత్మ్యం

రామ ఉవాచ-

ఏకం మంత్రం సమాచక్ష్వ దేవ లక్ష్మీ వివర్ధనం .

ప్రతివేదం జగన్నాథ యాదోగణనృపాత్మజ .. 1..

పుష్కర ఉవాచ-

శ్రీసూక్తం ప్రతివేదంచ జ్ఞేయం లక్ష్మీవివర్ధనం .

అస్మిల్లోకే పరే వాపి యథాకామం ద్విజస్య తు .. 2..

రామ ఉవాచ-

ప్రతివేదం సమాచక్ష్వ శ్రీసూక్తం పుష్టివర్ధనం .

శ్రీసూక్తస్య తథా కర్మ సర్వధర్మభృతాం వర .. 3..

పుష్కర ఉవాచ-

హిరణ్యవర్ణాం హరిణీం ౠచః పంచదశ ద్విజ .

శ్రీసూక్తం కథితం పుణ్యం ౠగ్వేదే పుష్టివర్ధనం .. 4..

రథే అక్షేషు వాజేతి చతస్రస్తు తథా ౠచః .

శ్రీసూక్తం తు యజుర్వేదే కథితం పుష్టివర్ధనం .. 5..

శ్రాయంతీయం తథా సామ సామవేదే ప్రకీర్తితం .

శ్రియం దాతుర్మయిదేహి ప్రోక్తమాథర్వణే తథా .. 6..

శ్రీసూక్తం యో జపేద్భక్త్యా తస్యాలక్ష్మీర్వినశ్యతి .

జుహుయాద్యశ్చ ధర్మజ్ఞ హవిష్యేణ విశేషతః .. 7..

శ్రీసూక్తేన తు పద్మానాం ఘృతాక్తానాం భృగూత్తమ .

అయుతం హోమయేద్యస్తు వహ్నౌ భక్తియుతో నరః .. 8..

పద్మహస్తా చ సా దేవీ తం నరం తూపతిష్టతి .

దశాయుతం తు పద్మానాం జుహుయాద్యస్తథా జలే .. 9..

నాపైతి తత్కులాల్లక్ష్మీః విష్ణోర్వక్షగతా యథా .

ఘృతాక్తానాంతు బిల్వానాం హుత్వా రామాయుతం తథా .. 10..

బహువిత్తమవాప్నోతి స యావన్మనసేచ్ఛతి .

బిల్వానాం లక్షహోమేన కులే లక్ష్మీముపాశ్నుతే .. 11..

పద్మానామథ బిల్వానాం కోటిహోమం సమాచరేత్ .

శ్రద్దధానః సమాప్నోతి దేవేంద్రత్వమపి ధ్రువం .. 12..

సంపూజ్య దేవీం వరదాం యథావత్

        పద్మైస్సితైర్వా కుసుమైస్తథాన్యైః .

క్షీరేణ ధూపైః పరమాన్నభక్ష్యైః

        లక్ష్మీమవాప్నోతి విధానతశ్చ .. 13..

ఇతి శ్రీ విష్ణుధర్మోత్తరే ద్వితీయఖండే మార్కండేయవజ్రసంవాదే

రామం ప్రతి పుష్కరోపాఖ్యానే శ్రీసూక్తమహాత్మ్యకథనం నామ

అష్టావింశత్యుత్తర శతతమోఽధ్యాయః ..