వరుణసూక్తం 2

ఋగ్వేదసంహితాయాం ప్రథమం మండలం, పంచవింశం సూక్తం .

ఋషిః - శునఃశేప ఆజీగర్తిః, దేవతా - వరుణః, ఛందః గాయత్రీ, స్వరః - షడ్జః .

యచ్చి॒ద్ధి తే॒ విశో॑ యథా॒ ప్ర దే॑వ వరుణ వ్ర॒తం .

మి॒నీ॒మసి॒ ద్యవి॑ద్యవి .. 1.025.01

మా నో॑ వ॒ధాయ॑ హ॒త్నవే॑ జిహీళా॒నస్య॑ రీరధః .

మా హృ॑ణా॒నస్య॑ మ॒న్యవే॑ .. 1.025.02

వి మృ॑ళీ॒కాయ॑ తే॒ మనో॑ ర॒థీరశ్వం॒ న సంది॑తం .

గీ॒ర్భిర్వ॑రుణ సీమహి .. 1.025.03

పరా॒ హి మే॒ విమ॑న్యవః॒ పతం॑తి॒ వస్య॑ఇష్టయే .

వయో॒ న వ॑స॒తీరుప॑ .. 1.025.04

క॒దా క్ష॑త్ర॒శ్రియం॒ నర॒మా వరు॑ణం కరామహే .

మృ॒ళీ॒కాయో॑రు॒చక్ష॑సం .. 1.025.05

తదిత్స॑మా॒నమా॑శాతే॒ వేనం॑తా॒ న ప్ర యు॑చ్ఛతః .

ధృ॒తవ్ర॑తాయ దా॒శుషే॑ .. 1.025.06

వేదా॒ యో వీ॒నాం ప॒దమం॒తరి॑క్షేణ॒ పత॑తాం .

వేద॑ నా॒వః స॑ము॒ద్రియః॑ .. 1.025.07

వేద॑ మా॒సో ధృ॒తవ్ర॑తో॒ ద్వాద॑శ ప్ర॒జావ॑తః .

వేదా॒ య ఉ॑ప॒జాయ॑తే .. 1.025.08

వేద॒ వాత॑స్య వర్త॒నిము॒రోరృ॒ష్వస్య॑ బృహ॒తః .

వేదా॒ యే అ॒ధ్యాస॑తే .. 1.025.09

ని ష॑సాద ధృ॒తవ్ర॑తో॒ వరు॑ణః ప॒స్త్యా॒3॒॑స్వా .

సామ్రా॑జ్యాయ సు॒క్రతుః॑ .. 1.025.10

అతో॒ విశ్వా॒న్యద్భు॑తా చికి॒త్వాఀ అ॒భి ప॑శ్యతి .

కృ॒తాని॒ యా చ॒ కర్త్వా॑ .. 1.025.11

స నో॑ వి॒శ్వాహా॑ సు॒క్రతు॑రాది॒త్యః సు॒పథా॑ కరత్ .

ప్ర ణ॒ ఆయూం॑షి తారిషత్ .. 1.025.12

బిభ్ర॑ద్ద్రా॒పిం హి॑ర॒ణ్యయం॒ వరు॑ణో వస్త ని॒ర్ణిజం॑ .

పరి॒ స్పశో॒ ని షే॑దిరే .. 1.025.13

న యం దిప్సం॑తి ది॒ప్సవో॒ న ద్రుహ్వా॑ణో॒ జనా॑నాం .

న దే॒వమ॒భిమా॑తయః .. 1.025.14

ఉ॒త యో మాను॑షే॒ష్వా యశ॑శ్చ॒క్రే అసా॒మ్యా .

అ॒స్మాక॑ము॒దరే॒ష్వా .. 1.025.15

పరా॑ మే యంతి ధీ॒తయో॒ గావో॒ న గవ్యూ॑తీ॒రను॑ .

ఇ॒చ్ఛంతీ॑రురు॒చక్ష॑సం .. 1.025.16

సం ను వో॑చావహై॒ పున॒ర్యతో॑ మే॒ మధ్వాభృ॑తం .

హోతే॑వ॒ క్షద॑సే ప్రి॒యం .. 1.025.17

దర్శం॒ ను వి॒శ్వద॑ర్శతం॒ దర్శం॒ రథ॒మధి॒ క్షమి॑ .

ఏ॒తా జు॑షత మే॒ గిరః॑ .. 1.025.18

ఇ॒మం మే॑ వరుణ శ్రుధీ॒ హవ॑మ॒ద్యా చ॑ మృళయ .

త్వామ॑వ॒స్యురా చ॑కే .. 1.025.19

త్వం విశ్వ॑స్య మేధిర ది॒వశ్చ॒ గ్మశ్చ॑ రాజసి .

స యామ॑ని॒ ప్రతి॑ శ్రుధి .. 1.025.20

ఉదు॑త్త॒మం ము॑ముగ్ధి నో॒ వి పాశం॑ మధ్య॒మం చృ॑త .

అవా॑ధ॒మాని॑ జీ॒వసే॑ .. 1.025.21

స్వరరహితం .

యచ్చిద్ధి తే విశో యథా ప్ర దేవ వరుణ వ్రతం .

మినీమసి ద్యవిద్యవి .. 1.025.01

మా నో వధాయ హత్నవే జిహీళానస్య రీరధః .

మా హృణానస్య మన్యవే .. 1.025.02

వి మృళీకాయ తే మనో రథీరశ్వం న సందితం .

గీర్భిర్వరుణ సీమహి .. 1.025.03

పరా హి మే విమన్యవః పతంతి వస్యఇష్టయే .

వయో న వసతీరుప .. 1.025.04

కదా క్షత్రశ్రియం నరమా వరుణం కరామహే .

మృళీకాయోరుచక్షసం .. 1.025.05

తదిత్సమానమాశాతే వేనంతా న ప్ర యుచ్ఛతః .

ధృతవ్రతాయ దాశుషే .. 1.025.06

వేదా యో వీనాం పదమంతరిక్షేణ పతతాం .

వేద నావః సముద్రియః .. 1.025.07

వేద మాసో ధృతవ్రతో ద్వాదశ ప్రజావతః .

వేదా య ఉపజాయతే .. 1.025.08

వేద వాతస్య వర్తనిమురోరృష్వస్య బృహతః .

వేదా యే అధ్యాసతే .. 1.025.09

ని షసాద ధృతవ్రతో వరుణః పస్త్యా3స్వా .

సామ్రాజ్యాయ సుక్రతుః .. 1.025.10

అతో విశ్వాన్యద్భుతా చికిత్వాఀ అభి పశ్యతి .

కృతాని యా చ కర్త్వా .. 1.025.11

స నో విశ్వాహా సుక్రతురాదిత్యః సుపథా కరత్ .

ప్ర ణ ఆయూంషి తారిషత్ .. 1.025.12

బిభ్రద్ద్రాపిం హిరణ్యయం వరుణో వస్త నిర్ణిజం .

పరి స్పశో ని షేదిరే .. 1.025.13

న యం దిప్సంతి దిప్సవో న ద్రుహ్వాణో జనానాం .

న దేవమభిమాతయః .. 1.025.14

ఉత యో మానుషేష్వా యశశ్చక్రే అసామ్యా .

అస్మాకముదరేష్వా .. 1.025.15

పరా మే యంతి ధీతయో గావో న గవ్యూతీరను .

ఇచ్ఛంతీరురుచక్షసం .. 1.025.16

సం ను వోచావహై పునర్యతో మే మధ్వాభృతం .

హోతేవ క్షదసే ప్రియం .. 1.025.17

దర్శం ను విశ్వదర్శతం దర్శం రథమధి క్షమి .

ఏతా జుషత మే గిరః .. 1.025.18

ఇమం మే వరుణ శ్రుధీ హవమద్యా చ మృళయ .

త్వామవస్యురా చకే .. 1.025.19

త్వం విశ్వస్య మేధిర దివశ్చ గ్మశ్చ రాజసి .

స యామని ప్రతి శ్రుధి .. 1.025.20

ఉదుత్తమం ముముగ్ధి నో వి పాశం మధ్యమం చృత .

అవాధమాని జీవసే .. 1.025.21