అచ్యుతాష్టకం 1

అచ్యుతం కేశవం రామనారాయణం కృష్ణదామోదరం వాసుదేవం హరిం .
శ్రీధరం మాధవం గోపికావల్లభం జానకీనాయకం రామచంద్రం భజే .. 1..

అచ్యుతం కేశవం సత్యభామాధవం మాధవం శ్రీధరం రాధికారాధితం .
ఇందిరామందిరం చేతసా సుందరం దేవకీనందనం నందనం సందధే .. 2..

విష్ణవే జిష్ణవే శంఖినే చక్రిణే రుక్మిణిఱాగిణే జానకీజానయే .
వల్లవీవల్లభాయాఽర్చితాయాత్మనే కంసవిధ్వంసినే వంశినే తే నమః .. 3..

కృష్ణ గోవింద హే రామ నారాయణ శ్రీపతే వాసుదేవాజిత శ్రీనిధే .
అచ్యుతానంత హే మాధవాధోక్షజ ద్వారకానాయక ద్రౌపదీరక్షక .. 4..

రాక్షసక్షోభితః సీతయా శోభితో దండకారణ్యభూపుణ్యతాకారణః .
లక్ష్మణేనాన్వితో వానరైః సేవితోఽగస్త్యసంపూజితో రాఘవః పాతు మాం .. 5..

ధేనుకారిష్టకోఽనిష్టకృద్ద్వేషిణాం కేశిహా కంసహృద్వంశికావాదకః .  var  ద్వేషిహా
పూతనాకోపకః సూరజాఖేలనో బాలగోపాలకః పాతు మాం సర్వదా .. 6..

విద్యుదుద్యోతవత్ప్రస్ఫురద్వాససం ప్రావృడంభోదవత్ప్రోల్లసద్విగ్రహం .  var  విద్యుదుద్యోతవాన్
వన్యయా మాలయా శోభితోరఃస్థలం లోహితాంఘ్రిద్వయం వారిజాక్షం భజే .. 7..

కుంచితైః కుంతలైర్భ్రాజమానాననం రత్నమౌలిం లసత్కుండలం గండయోః .
హారకేయూరకం కంకణప్రోజ్జ్వలం కింకిణీమంజులం శ్యామలం తం భజే .. 8..

అచ్యుతస్యాష్టకం యః పఠేదిష్టదం ప్రేమతః ప్రత్యహం పూరుషః సస్పృహం .
వృత్తతః సుందరం కర్తృ విశ్వంభరస్తస్య వశ్యో హరిర్జాయతే సత్వరం .. 9..

.. ఇతి శ్రీశంకరాచార్యవిరచితమచ్యుతాష్టకం సంపూర్ణం ..