అచ్యుతాష్టకం 2

అభిలపననిసర్గాదచ్యుతాఖ్యే భజే త్వాం

హరసి మదఘవృందం త్వద్భుబుక్షావశాత్ త్వం .

అఘహృదితి తవాంబ ప్రత్యుత ఖ్యాతిదోఽహం

త్వయి మమ వద కా వా సంగతిర్దైన్యవాచాం .. 1..

చిరాతీతా సాందీపనితనుభువః కాలభవన-

ప్రపత్తిస్తం పిత్రోః పునరగమయత్ సన్నిధిమితి .

యశః కృష్ణస్యేదం కథమహహ న త్వాం రసనయా

యది శ్రీకృష్ణాఖ్యే భజతి స తాదనీం మునిసుతః .. 2..

హరేర్యచ్చోరత్వం యదపి చ తథా జారచరితం

తదేతత్ సర్వాంహస్తతికృతే సంకథనతః .

ఇతీదం మాహాత్మ్యం మధుమథన తే దీపితమిదం

వదంత్యాః కృష్ణాఖ్యే తవహి విచరంత్యా విలసితం .. 3..

సభాయాం ద్రౌపత్యాఽంశుకసృతిభియా తద్రసనయా

ధృతా తస్యాశ్చేలం ప్రతను తదవస్థం విదధతీ .

వ్యతానీశ్శైలాభం వసనవిసరం చాంబ హరతా-

మియాన్ గోవిందాఖ్యే వద వసనరాశిస్తవ కుతః .. 4..

అధిరసనమయి త్వామచ్యుతాఖ్యే దధానం

వనజభవముఖానాం వంద్యమాహుర్మహాంతః .

సతు వినమతి మాతశ్చాశ్వగోశ్వాదనాదీన్

భవతి నను విచిత్రా పద్ధతిస్తావకానాం .. 5..

జనని మురభిదాఖ్యే జాహ్నవీనిమ్నగైకా

సమజని పదపద్మాచ్చక్రిణస్త్వాశ్రితానాం .

పరిణమతి సమస్తాః పాదవార్ఘిందురేకో

జగతి నను తటిన్యో జాహ్నవీసహ్యజాద్యాః .. 6..

సమవహితమపశ్యన్ సన్నిధౌ వైనతేయం

ప్రసభవిధుతపద్మాపాణిరీశోఽచ్యుతాఖ్యే .

సమవితుముపనీతః సాగజేంద్రం త్వయా ద్రాక్

వద జనని వినా త్వాం కేన వా కిం తదాభూత్ .. 7..

యదేష స్తౌమి త్వాం త్రియుగచరణత్రాయిణి తతో

మహిమ్నః కా హానిస్తవతు మమ సంపన్నిరవధిః .

శునా లీలాకామం భవతి సురసింధుర్భగవతీ

తదేషా కింభూతా సతు సపది సంతాపభరితః .. 8..

ఇతి శ్రీశ్రీధరవేంకటేశార్యకృతౌ అచ్యుతాష్టకం సంపూర్ణం ..