అనుత్తరాష్టికా

సంక్రామోఽత్ర న భావనా న చ కథాయుక్తిర్న చర్చా న చ

     ధ్యానం వా న చ ధారణా న చ జపాభ్యాసప్రయాసో న చ .

తత్కిం నామ సునిశ్చితం వద పరం సత్యం చ తచ్ఛ్రూయతాం

     న త్యాగీ న పరిగ్రహీ భజ సుఖం సర్వం యథావస్థితః .. 1..

సంసారోఽస్తి న తత్త్వతస్తనుభృతాం బంధస్య వార్తైవ కా

     బంధో యస్య న జాతు తస్య వితథా ముక్తస్య ముక్తిక్రియా .

మిథ్యామోహకృదేష రజ్జుభుజగచ్ఛాయాపిశాచభ్రమో

     మా కించిత్త్యజ మా గృహాణ విలస్వస్థో యథావస్థితః .. 2..

పూజాపూజకపూజ్యభేదసరణిః కేయం కథానుత్తరే సంక్రామః

     కిల కస్య కేన విదధే కో వా ప్రవేశక్రమః .

మాయేయం న చిదద్వయాత్పరతయా భిన్నాప్యహో వర్తతే

     సర్వం స్వానుభవస్వభావవిమలం చింతాం వృథా మా కృథాః .. 3..

ఆనందోఽత్ర న విత్తమధ్యమదవన్నైవాంగనాసంగవత్

     దీపార్కేందుకృతప్రభాప్రకరవత్ నైవ ప్రకాశోదయః .

హర్షః సంభృతభేదముక్తిసుఖభూర్భారావతారోపమః

     సర్వాద్వైతపదస్య విస్మృతనిధేః ప్రాప్తిః ప్రకాశోదయః .. 4..

రాగద్వేషసుఖాసుఖోదయలయాహంకారదైన్యాదయో యే భావాః

     ప్రవిభాంతి విశ్వవపుషో భిన్నస్వభావా న తే .

వ్యక్తిం పశ్యసి యస్య యస్య సహసా తత్తత్తదేకాత్మతా-

     సంవిద్రూపమవేక్ష్య కిం న రమసే తద్భావనానిర్భరః .. 5..

పూర్వాభావభవక్రియా హి సహసా భావాః సదాఽస్మిన్భవే

     మధ్యాకారవికారసంకరవతాం తేషాం కుతః సత్యతా .

నిఃసత్యే చపలే ప్రపంచనిచయే స్వప్నభ్రమే పేశలే

     శంకాతంకకలంకయుక్తికలనాతీతః ప్రబుద్ధో భవ .. 6..

భావానాం న సముద్భవోఽస్తి సహజస్త్వద్భావితా భాంత్యమీ

     నిఃసత్యా అపి సత్యతామనుభవభ్రాంత్యా భజంతి క్షణం .

త్వత్సంకల్పజ ఏష విశ్వమహిమా నాస్త్యస్య జన్మాన్యతః

     తస్మాత్త్వం విభవేన భాసి భువనేష్వేకోప్యనేకాత్మకః .. 7..

యత్సత్యం యదసత్యమల్పబహులం నిత్యం న నిత్యం చ యత్

     యన్మాయామలినం యదాత్మవిమలం చిద్దర్పణే రాజతే .

తత్సర్వం స్వవిమర్శసంవిదుదయాద్ రూపప్రకాశాత్మకం

     జ్ఞాత్వా స్వానుభవాధిరూఢమహిమా విశ్వేశ్వరత్వం భజ .. 8..

.. ఇతి శ్రీమదాచార్యాభినవగుప్తపాదైర్విరచితానుత్తరాష్టికా సమాప్తా ..