శ్రీ అనంతకృష్ణవరదరాజాష్టకం

శ్రీ-భూమి-నీలా-పరిసేవ్యమాన-

       మనంతకృష్ణం వరదాఖ్య-విష్ణుం .

అఘౌఘవిధ్వంసకరం జనానాం

       అఘంహరేశం ప్రభజే సదాఽహం .. 1..

తిష్ఠన్ స్వధిష్ణ్యే పరితో విపశ్యన్

       ఆనందయన్ స్వానభిరామమూర్త్యా .

యోఽఘంహరగ్రామజనాన్ పునీతే

       హ్యనంతకృష్ణం వరదేశమీడే .. 2..

భక్తాన్ జనాన్ పాలనదక్షమేకం

       విభుం శ్రియాఽఽశ్లిష్యతనుం మహాంతం .

సుపర్ణపక్షోపరిరోచమాన-

       మనంతకృష్ణం వరదేశమీడే .. 3..

సూర్యస్య కాంత్యా సదృశైర్విరాజద్-

       రత్నైః సమాలంకృతవేషభూషం .

తమో వినాశాయ ముహుర్ముహుస్త్వా-

       మనంతకృష్ణం వరదేశమీడే .. 4..

అనంతసంసార-సముద్రతార-

       నౌకాయితం శ్రీపతిమాననాబ్జం .

అనంతభక్తైః పరిదృశ్యమాన-

       మనంతకృష్ణం వరదేశమీడే .. 5..

నమంతి దేవాః సతతం యమేవ

       కిరీటినం గదినం చక్రిణం తం .

వైఖానసైః సూరిభిరర్చయంత-

       మనంతకృష్ణం వరదేశమీడే .. 6..

తనోతి దేవః కృపయా వరాన్ యో

       చిరాయుషం భూతిమనన్యసిద్ధిం .

తం దేవదేవం వరదానదక్ష-

       మనంతకృష్ణం వరదేశమీడే .. 7..

కృష్ణం నమస్కృత్య మహామునీంద్రాః

       స్వానందతుష్టా విగతాన్యవాచః .

తం స్వానుభూత్యై భవ-పాద్మ-వంద్య-

       మనంతకృష్ణం వరదేశమీడే .. 8..

అనంతకృష్ణస్య కృపావలోకా-

       దఘంహర-గ్రామజ-దీక్షితేన .

సుసూక్తిమాలాం రచితాం మనోజ్ఞాం

       గృహ్ణాతు దేవో వరదేశ- విష్ణుః ..

.. ఇతి అఘంహర-గ్రామ-వాసినా అనంతకృష్ణవరదరాజస్య

పార్శ్వవర్తినా బ్రహ్మశ్రీ రంగస్వామి-దీక్షితేన విరచితం

అనంత-కృష్ణ-వరదరాజాష్టకం సంపూర్ణం ..