శ్రీమదనంతార్యాష్టకం

శ్రీమదనంతార్యకుమార రామానుజార్యపుత్ర నారాయణార్య ప్రణీతా

.. శ్రీమదనంతార్య విషయా అష్టశ్లోకీ ..

వందేఽనంతగురూత్తంస వంశముక్తాఫలాత్మనః .

రామానుజార్యస్య సుతం శ్రీనారాయణదేశికం ..

శ్రీరామానుజవరజే మునౌ శఠరిపోర్గాథా విశేషార్థదే

శిష్యాన్ ప్రేక్ష్య భవత్సు వేంకటపతేఃకఃకింకరస్స్యా దితి .

ప్రశ్నం కుర్వతి తేషు మౌనిషుచ యో బద్ధాంజలిః ప్రార్థయన్

ప్రాప శ్రీనిధికింకరత్వమనఘం తం శేష సూరిం భజే .. 1..

        శ్రీరంగాద్వ్రృషభాచలం ప్రచలితేశ్వార్యేషు భోజ్యార్థిషు

        శ్రాంతేష్వధ్వని వేంకటాచలపతిః చిత్రాన్న పాత్రం వహన్ .

        పృష్టస్తైరితి కో భవాన్ కుత ఇదం యఃశిష్యభావం వదన్

        పద్యేయద్విషయే బభాణ ఫణిరాట్ సూర్యుత్తమం తం భజే .. 2..

స్నాతుం స్వామి సరోవరం ప్రతి చలన్ శేషార్యవర్యఃపథి

వ్యాఘ్రే చేల దశాంచల స్పృశి తతః శిష్యేషుముక్త్యర్థిషు .

భూయాదేవమితిబ్రువన్ పునరపి స్నాత్వైత్య పశ్యన్ మృతం

దీప్తం వేంకటనాయకాంఘ్రికమలే హృష్టోఽస్తునః శ్రేయసే .. 3..

        తిష్ఠన్ శేషగురో మమివహిగురౌ ముక్తిం పరౌదుర్లభాం

        వ్యాఘ్రాదేశ్చ దదాతి చేదపి భవాన్ కింమేఽత్ర యాస్యామ్యహం .

        ఇత్యుక్తశ్చ వృషాద్రి రాజపతినాఽనంతార్య చూడామణిః

        మత్తః శ్రైష్ఠ్యమిదం తవాత్ర న పరం సప్తాహ ఇత్యబ్రవీత్ .. 4..

యాస్యన్ కేరలసంజ్ఞకం జనపదం పాథేయ బంధం పథి

స్నాత్వాఽఽరాధ్య జగద్గురుం తదను యో భోక్తుం వివిచ్యాదరాత్ .

ధృష్ట్వా తత్రపిపీలికా ఇతి మయా నాన్యత్ర నేయా ఇమాః

శేషాద్రిం పునరేత్య తాశ్చముముశే నంతాస్మ్యనంతం గురుం .. 5..

        శ్రీమచ్చంపక జాతి కుందకుటజా ధ్యుత్ఫుల్ల పుష్పాకరే

        యస్యోద్యానవరే పరస్స భగవాన్ శ్రీవేంకటేశో నిశి .

        త్యక్త్వానందవిమానమన్వహమహో లక్ష్మ్యాసహారంస్త హా

        తస్మై శేషగురూత్తమాయ సతతం కుర్యాం నమస్సంతతిం .. 6..

శ్రీమద్వేంకటనాయక ప్రియతమా వాత్సల్య సీమా రమా

నిశ్యుద్యాన లతాంత కేలిసమయే గ్రస్తాతి భీతేవ సా .

సప్రేమస్మితమాహ ముగ్ధమధురం భోస్తాత తాతేతి యం

తం వందే గురుమౌలి శేఖరమహం శేషార్యవర్యం సదా .. 7..

        కన్యాకక్షకరాత్త పుష్పపిటకం కాల్యాగతం శ్రీనిధిః

        మహ్యం దేహి తవాత్మజామితి భృశం యం ప్రార్థ్యలేభే నతః .

        కన్యాశుల్కమితీవ సస్పృహతరం ప్రోద్ధృత్య కంటాన్నిజాత్

        మాలాం యస్య గలేఽర్పయన్ తమనిశం శేషార్యవర్యం శ్రయే .. 8..

శ్రీమద్రామానుజాచార్య పుత్ర నారాయణోదితం .

కలయంతు సదా సంతోఽనంతార్యాష్టకమాదరాత్ ..

.. శ్రీమదనంతార్య అష్టశ్లోకీ సంపూర్ణం ..