శ్రీఅగస్త్యేశలింగాష్టకం

శ్రీమత్పర్వతపుత్రికాశ్రితలసద్వామాంగమిందూజ్జ్వల-
త్కోటీరం కనకాద్రికార్ముకధరం కల్పద్రుమాలావలీ-
సక్తోరఃస్థలమంతకాంతకమనంతాహీంద్రసద్భూషణం
శ్రీగుంటూరిపురాధివాసమతులాగస్త్యేశలింగం భజే .. 1..

భక్తాభీష్టఫలప్రదం భవహరం పాపౌఘవిచ్ఛేదనం
      శక్రాద్యష్టదిగీశసన్నుతపదం శుంభద్గణాధీశ్వరం .
గంగోత్తుంగతరంగిణీయుతజటాజూటం మునీంద్రార్చితం
      శ్రీగుంటూరిపురాధివాసమతులాగస్త్యేశలింగం భజే .. 2..

మార్కండేయమునీంద్రరక్షణమజం మృత్యుంజయం శాశ్వతం
      మత్తామర్త్యవిరోధిగర్వనగరీదంభోలిధారాయితం .
విత్తాధీశసఖం వియత్తలలసత్కేశం త్రిలోకేశ్వరం
      శ్రీగుంటూరిపురాధివాసమతులాగస్త్యేశలింగం భజే .. 3..

భూమ్యాపోఽగ్నిసమీరణా(ప్రభంజనా)మ్బరలసత్సోమార్కయజ్వా(స్వాత్మా)భిధై-
      రష్టైరిష్టవరప్రదానచతురైః స్పష్టైః స్వరూపైః సదా .
భాస్వంతం జగతీతలే గజహరం కర్పూరగౌరం శివం
      శ్రీగుంటూరిపురాధివాసమతులాగస్త్యేశలింగం భజే .. 4..

సూర్యాగ్నీందువిలోచనం సురవరం ఫాలాగ్నిభస్మీకృత-
      ప్రద్యుమ్నం పరమేశ్వరం గురువరం కాలాగ్నిరుద్రం హరం .
కంఠాకల్పవిలాసభాసురమహాహాలాహలం శంకరం
      శ్రీగుంటూరిపురాధివాసమతులాగస్త్యేశలింగం భజే .. 5..

శ్రీమద్భూమిరథం విరించివిలసత్సూతం నగాధీశస-
      చ్చాపం విష్ణుశరం రథాంగయుగలీభూతార్కచంద్రం శివం .
పూర్వామర్త్యపురత్రయాంతకరణోద్యుక్తం శివాలింగితం
      శ్రీగుంటూరిపురాధివాసమతులాగస్త్యేశలింగం భజే .. 6..

దక్షాక్షుద్రమఖాగతామరగణాన్ తత్రత్యఋత్విగ్వరాన్
      చంద్రం తచ్ఛ్వశురం భగం మునిగణానగ్నిం చ దక్షం లసత్ .
స్వేదోద్భూతవినీలదేహరుచినా వీరేణ సంత్రాసితం(త్రాసకం)
      శ్రీగుంటూరిపురాధివాసమతులాగస్త్యేశలింగం భజే .. 7..

శ్రీలక్ష్మీశవిరించిపూజితపదం శుంభత్త్రిశూలాయుధం
      శ్రీమద్భృంగికుమారనందిగణపశ్రీవీరభద్రాదిభిః .
సర్వైర్భక్తియుతైర్మహాగణవరైః సంసేవ్యమానం సదా
      శ్రీగుంటూరిపురాధివాసమతులాగస్త్యేశలింగం భజే .. 8..

శ్రీకోప్పరాజకులవార్ధినిశాకరేణ
స్తోత్రం కృతం జగతి సుబ్బయనామభాజా-
గస్త్యేశ్వరస్య నిజభక్తజనావనస్య
యో వై పఠేల్లభతి సోఽపి సదా విముక్తిం .. 9..

.. ఇతి శ్రీఅగస్త్యేశలింగాష్టకం సంపూర్ణం ..